Dukeneye gushyira umwihariko mu Rwenya Nyarwanda – Atome

  • NTAWITONDA JEAN CLAUDE
  • Ugushyingo 24, 2022
  • Hashize umwaka 1
Image

Iserukiramuco ry’urwenya ‘Seka Fest 2022’ rije ku nshuro ya 3, Atome abona hakwiye kubamo umwihariko w’urwenya Nyarwanda bizayiteza imbere nkuko ahandi bimeze muri Afurika no Isi.

Ibi yabitangarije mu kiganiro n’abanyamakuru cyabaye ku gicamunsi cyo kuri uyu wa Gatatu taliki ya 23 Ugushyingo 2022, muri KCC aho Atome uzwi cyane nka Gasumuni yavuze ko uruganda rw’urwenya Nyarwanda rukeneye kugira umwihariko warwo.

Ati “Ni byiza gutumira abanyamahanga kuko hari byo tubigiraho, cyane cyane aba bana bato bakizamuka, gusa dukeneye umwihariko wacu natwe aho dutumiwe naho dutumirwa bakabona ko urwenya Nyarwanda rumaze gufata indi ntera.”

Atome wamamaye cyane nka Gasumuni yahawe umwanya wihariye muri iri iserukiramuco ry’urwenya rya Seka Fest 2022, aho azakora wenyine akazifashisha umuhanzi Ruti Joel muri iki gitaramo. 

Iki gitaramo cy’urwenya giteganyijwe ko kizatangira ku wa 3 Ukuboza 2022, byitezwe ko uyu munyarwenya azakina imwe mu mikino azwiho irimo Kwirekura no Gutarama.

Umuyobozi wa Arthur Nation itegura Seka Fest Nkusi Arthur mu kiganiro n’itangazamakuru yavuze ko ku munsi wa mbere wa Seka Fest, hazaba ibirori byo gusetsa abantu mu modoka bikazitabirwa n’abanyarwenya b’intoranywa mu Rwanda.

Nyuma yo kuzengurukana n’abanyarwenya mu modoka, nimugoroba Atome azaba asusurutsa abitabiriye umunsi wa mbere wa Seka Live mu mugoroba wo gusangira uzabera muri Kigali Convention Centre.

Aha byitezwe ko azahabwa amasaha abiri wenyine, nubwo hari abandi bashobora kuzatungurana.

Umunyarwenya Ntarindwa Diogène wamamaye ku mazina ya Atome, Gasumuni n’andi menshi akaba umuhanga mu gucisha ubutumwa mu rwenya, ni umunyarwanda wavukiye i Burundi mu 1977 aho ababyeyi be bari barahungiye.

Yamenyekanye nka Atome binyuze mu gukina urwenya, ni Umwanditsi n’umukinnyi wa filimi n’ ikinamico yatangiye gukina kuva mu 1994.

Seka Fest izitabirwa n’abandi banyarwenya barimo Loyiso Gola, Celeste Ntuli bakomoka muri Afurika y’Epfo , Kigingi w’i Burundi na Salvado wo muri Uganda.

Kwinjira muri iki gitaramo ni 10.000Frw mu myanYa isanzwe , 20.000 Frw muri VIP na 30.000 Frw mu myanya ya VVIP.

  • NTAWITONDA JEAN CLAUDE
  • Ugushyingo 24, 2022
  • Hashize umwaka 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE