Drones zikomeje gufasha u Rwanda mu kurwanya Malaria

  • NTAWITONDA JEAN CLAUDE
  • Mata 25, 2022
  • Hashize imyaka 2
Image

Kuri uyu wa Mbere taliki ya 25 Mata 2022, u Rwanda rwifatanyije n’Isi yose kwizihiza Umunsi Mpuzamahanga wahariwe kurwanya Malaria rwishimira ko indege nto zitagira abapilote (drones) zikomeje kugira uruhare rukomeye mu rugamba rwo kurwanya iyo ndwara yahitanye abantu 602 020 muri Afurika mu mwaka ushize.

Ni ikoranabuhanga rikomeje kubaka izina mu Rwanda uhereye ku gutanga serivisi zo gukwirakwiza amaraso, gutanga amakuru no kuyakwirakwiza mu baturage, gukusanya amakuru y’ubuhinzi, ay’umutekano n’iteganyagihe n’ibindi.

Minisiteri y’Ubuzima yatangaje ko ikoreshwa rya drones mu kurwanya Malaria ryatangiye kugeragerezwa mu bice by’Umujyi wa Kigali mu mwaka wa 2020, bikaba biteganyijwe ko zizakomeza gukoreshwa no mu tundi Turere dutandatu tw’Igihugu aho zifashishwa mu gutera imiti mu bishanga n’ahandi hantu hororokera imibu.

Bivugwa ko drones ziyongera ku zindi ngamba u Rwanda rushyira mu bikorwa mu kurwanya Malaria, zirimo gutera imiti yica imibu mu ngo z’abatuye mu Turere twibasirwa na Malaria, gutanga no gushishikariza abaturage kurara mu nzitiramibu n’ibindi.

Izo ngamba zagize uruhare mu igabanyuka ry’indwara ya Malaria mu Gihugu hose, mu gihe ku Isi hagiye haboneka ubwiyongere by’umwihariko mu bihe byo guhangana n’icyorezo cya COVID-19.

Imibare yagaragajwe n’Ikigo cy’Igihugu cy’Ubuzima (RBC) yerekana ko ikigereranyo cy’abarwayi ba Malaria cyagabanyutse mu buryo bufatika mu myaka itandatu ishize, aho cyavuye ku bantu 400/1000 mu mwaka wa 2016 kikagera ku 148/1000 mu 2020.

Izi drones zifashishwa mu kurwanya Malaria mu bice bitandukanye by’Igihugu

Ni mu gihe Malaria y’igikatu yagabanyutse ikava ku bantu 18,000 bayirwaye mu 2016 ikagera ku 3,000 byayirwaye mu 2020. Imfu ziterwa na Malaria na zo zavuye kuri 700 mu 2016 zigera kuri 19 mu mwaka wa 2021.

Minisiteri y’Ubuzima yishimira kandi ko u Rwanda rwizihije uyu munsi mu gihe igikorwa cyo gupima no kuvura Malaria cyorohejwe mu gihugu, bitewe n’uko kuri ubu abarwayi ba Malaria bose bavurwa nyuma yo gupimwa mu buryo bwihuse hagashimangirwa ko ari malaria barwaye.

Leta y’u Rwanda irashimira uruhare rw’Abajyanama b’Ubuzima mu guhashya iyi ndwara cyane ko ari bo bavura bakanakurikira hejuru ya 60% by’abafite ubu burwayi mbere y’uko bagera ku bigo nderabuzima.

Ubushakashatsi bw’Ishami ry’Umuryango w’Abibumbye ryita ku Buzima (OMS) bwagaragaje mu Rwanda haboneka ubwoko butatu bw’imibu y’ingore itera Malaria ari yo “Anopheles arabiensis, Anopheles gambiae na Anopheles funestus”. Iyo mibu ikwirakwiza udukoko dutera malaria, turimo dutatu tw’ingenzi ari two “Plasmodium falciparum, Plasmodium ovale na Plasmodium malariae”.

Agakoko gakunze gakunze kugaragara mu basanzwemo Malaria mu Rwanda ni Plasmodium falciparum igaragara mu baturage bari hejuru ya 97% na 99%.

Insanganyamatsiko y’uyu mwaka iragira iti: “Twimakaze udushya mu kugabanya indwara ya Malaria maze turokore ubuzima.” Ni insanganyamatsiko isaba ibihugu bitandukanye cyane cyane ibikiri mu nzira y’amajyambere guhanga udushya no gukwirakwiza ibikoresho bigezweho mu guhangana na Malaria ari na ko biharanira kugeza ingamba zo kwirinda n’iz’ubuvuzi kuri bose mu rwego rwo kubaka urwego rw’ubuzima rwishoboye.

Umwaka ushize ngo wagaragayemo impinduka mu rugamba rwo kurwana n’iki cyorezo, ugereranyije n’umwaka wabanje nubwo ari ibihe Isi yari ihanganye n’icyorezo cya COVID-19.

Muri iki gihe u Rwanda, Ghana na Senegal byiteze kwakira inganda zizagira uruhare mu gukora inkingo zirimo n’iza Malaria, ikaba ari intambwe ikomeye yitezweho guhindura icyerekezo cyo kurwanya iyi ndwara no kugera ku ntego yo kuyirandura burundu bitarenze mu 2030.

OMS ivuga ko kwizihiza uyu munsi bitanga amahirwe yo kwiyemeza bushyashya no gushishikariza ibihugu gukora ishoramari mu rwego rwo gukumira no kurwanya iyi ndwara ishobora kwirindwa no kurandurwa nk’uko biri mu Ntego z’Iterambere Rirambye (SDGs).

Ishami rya OMS muri Afurika ryatangaje ko ryiyemeje gufatanya n’ibihugu byose by’uyu mugabane mu rugamba rwo guhashya iki cyorezo, igasaba buri wese kugira uru rugamba urwe hagamijwe kugera kuri Afurika izira Malaria.

Rumwe mu rubyiruko rurimo gukoresha drones mu gutera imiti yica imibu
Ingo z’abaturage na zo ziterwamo imiti yica imibu itera Malaria
  • NTAWITONDA JEAN CLAUDE
  • Mata 25, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE