Dr Doris Uwicyeza Picard yashimiye Perezida wa Repubulika y’u Rwanda Paul Kagame, nyuma yo kumuha inshingano nshya amwizeza kutazatezuka ku gukorera u Rwanda.
Ni nyuma y’aho ku gicamunsi cyo kuri uyu wa Kabiri tariki ya 12 Werurwe, Perezida Kagame yamuhaye inshingano zo kuba Umuhuzabikorwa w’Itsinda rishinzwe ishyirwa mu bikorwa ry’Amasezerano y’Ubufatanye mu Iterambere ry’Ubukungu no kwita ku Bimukira (MEDP).
Mu butumwa yanyujije ku mbuga nkoranyambaga, Dr. Uwicyeza yagize ati: “Urakoze Nyakubahwa Paul Kagame kubwo kungirira icyizere umpa amahirwe yo gukorera abandi. Ndanyuzwe kandi ndanezerewe. Ndabizeza kuzahora imbere kandi nkora ibirenze mu gukorera u Rwanda. Ndagushimiye kandi Imana iguhe umugisha.”
Dr Doris Uwicyeza Picard ahawe izo nshingano nshya, mu gihe yari asanzwe ari Umujyanama mu bya Tekiniki muri Minisiteri y’Ubutabera (MINIJUST).
Uretse Dr. Uwicyeza, Ambasaderi Monique Mukaruliza wari usanzwe ari Umujyanama muri Minisiteri y’Ububanyi n’Amahanga guhera mu 2021, yagizwe Ambasaderi Rusange “Ambassador at Large” muri iyo Minisiteri.
Itangazo riturutse mu Biro bya Minisitiri w’intebe, rivuga ko Perezida Kagame yahaye abo bayobozi inshingano nshya ashingiye ku biteganywa n’Itegeko Nshinga rya Repubulika y’u Rwanda cyane cyane mu ngingo ya 111 n’iya 112.
Nta gitekerezo kiratangwa. Ba uwa mbere gutanga igitekerezo.
Andika igitekerezo
AMATEGEKO AGENGA IYANDIKA RY'IGITEKEREZO CYAWE