Dr. Paul Farmer waguye mu Rwanda yajyanywe gushyingurwa muri Amerika

  • Imvaho Nshya
  • Gashyantare 25, 2022
  • Hashize imyaka 2
Image

Ku wa Kane taliki ya 24 Gashyantare, Perezida wa Repubulika Paul Kagame na Madamu Jeannette Kagame bifatanyije na Dr. Didi Bertrand Farmer, umugore wa Dr. Paul Farmer waguye mu Rwanda ku wa Mbere w’iki Cyumweru, inshuti n’imiryango mu kumusezeraho bwa nyuma no kumuha icyubahiro ku bw’impinduka ubuzima bwe bwagize mu rwego rw’ubuvuzi ku Isi yose.

Umurambo wa Dr. Paul Farmer washinze Kaminuza Mpuzamahanga y’Ubuvuzi n’Ubuzima kuri bose (UGHE) akaba umwe mu bashinze Umuryango Partners In Health (Inshuti Mu Buzima/PIH), wasubijwe muri Leta Zunze Ubumwe z’Amerika nyuma y’uwo muhango wo kumusezeraho bwa nyuma wabereye i Kigali.

Umubiri wa Dr. Farmer wavuye ku Kibuga cy’Indege Mpuzamahanga cya Kigali mu ijoro ryo kuri uyu wa Kane.

Dr. Farmer, ufatwa nk’icyitegererezo mu rwego rw’ubuzima rusange ku Isi, yashizemo umwuka mu ntangiriro z’iki cyumweru ku ya 21 Gashyantare igihe yari aryamye mu buriri bwe nk’uko byatangajwe n’ubuyobozi bwa PIH mu Rwanada.

Mu Rwanda, bamwitaga ‘Muganga Mwiza’ kubera ubwitange budasanzwe yagaragazaga mu buvuzi n’ibindi bikorwa by’ubutabazi aho yabaga ageze hose.

Madamu Jeannette Kagame, yifashishije imbuga nkoranyambaga, yagize ati: “Muganga Mwiza yari inshuti magara ya benshi. Asize icyuho gikomeye mu mitima ya benshi, umworera munini cyane ungana n’urukundo kuri bose ndetse na buri kiremwa muntu. Umurage asize uzahoraho iteka ryose. Ubugingo bwe buruhukire mu mahoro.”

Perezida Kagame n’umuryango we bashenguwe n’urupfu rwa Dr. Paul Farmer

Mu myaka igera hafi kuri 20, Dr. Paul Farmer watabarutse ku myaka 62, yagize uruhare mu kuzahura urwego rw’ubuzima rusange bw’u Rwanda, agira uruhare rukomeye cyane mu kugabanya umubare w’imfu z’ababyeyi n’abana bapfa bavuka, guhangana n’indwara zitandukanye zari zarabaye akarande, guhugura abaganga no gukora ubushakashatsi muri uru rwego rw’ubuvuzi rwagiye rutera imbere muri iyo myaka.

Mu mwaka wa 2017, ni bwo Perezida wa Repubulika y’u Rwanda Paul Kagame yambitse umudali uyu munyamerika bitewe n’uruhare rukomeye yagize mu guteza imbere urwego rw’ubuzima ku Isi ndetse no mu Rwanda by’umwihariko. Uwo mudali ni uwambikwa Abarinzi b’Igihango bagaragaje ubwitange bukomeye mu rugendo rwo gukura Igihugu mu mworera wasizwe na Jenoside yakorewe Abatutsi n’imiyoborere mibi.

Umuryango PIH wamenyekanye mu Rwanda nka ‘Inshuti mu Buzima’ wagize uruhare rukomeye mu gufasha Igihugu kugera ku ntego z’ubuzima rusange uhereye ku kugabanya imfu z’ababyeyi n’abana bapfa bavuka, ukageza ku kwegereza abaturage serivisi z’ubuvuzi kongera umubare w’abaganga n’ibindi.

Uwo muryango unakorana n’izindi nzego za Leta n’iz’abikorera mu gutanga ubuvuzi bugezweho mu bitaro bitatu ari byo Ibitaro bya Butaro bivura Kanseri, ibya Rwinkwavu n’ibya Kirehe.

  • Imvaho Nshya
  • Gashyantare 25, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE