Dr. Ngirente yerekanye inyungu zo kongera imari ishorwa mu cyaro

  • NTAWITONDA JEAN CLAUDE
  • Gicurasi 25, 2022
  • Hashize imyaka 2
Image

Icyaro kibungabunzwe neza kandi kigashorwamo imari ihagije mu kubyaza umusaruro amahirwe akibonekamo ni yo soko y’ubuzima burambye bw’abagituye ndetse n’abari mu mijyi mito n’iminini ku Isi.

Impuguke mu by’ubukungu n’imiturire, zemeza ko iterambere rirambye ry’ibice by’icyaro, ari wo musingi w’ukwiyongera k’umutekano w’ibiribwa no kunoza imirire, kubungabunga urusobe rw’ibinyabuzima, umutungo kamere w’amazi n’indi mitungo kamere, kubaka imiryango ifite ubuzima buzira umuze ndetse no kwagurira urubyiruko amahirwe atangaje y’ubukire.

Mu nama ya 57 ya Banki Nyafurika Itsura Amajyambere iri kubera i Accra muri Ghana, Minisitiri w’Intebe Dr. Edouard Ngirente yakomoje kuri izo nyungu ziri mu gushora imari mu byaro bitandukanye by’Umugane w’Afurika, n’ibyo u Rwanda rwagezeho mu bihe bigoye, muri urwo rugamba rwo guharanira amajyambere arambye mu cyaro.

Yabigarutseho mu kiganiro cy’Abakuru b’Ibihugu na Guverinoma cyibanze ku mahirwe n’imbogamizi bikirangwa mu iterambere rya Afurika ku wa kabiri taliki ya 24 Gicurasi 2022, aho yari ahagarariye Perezida wa Repubulika Paul Kagame.

Dr. Ngirente yavuze ko ishoramari rya Leta y’u Rwanda mu bice by’icyaro rigizwe ingamba zashyizwe mu kubaka ubukungu bushingiye ku kwigobotora ingaruka z’icyorezo cya COVID-19.

Yagize ati: “Mu gihe cy’icyorezo, imijyi ntiyakoraga neza kubera gufunga ibintu bitandukanye, ariko mu duce tumwe na tumwe tw’icyaro ntihabayeho ibibazo byinshi bya COVID-19, bityo duhitamo kujya gushoramo imari. Ni yo mpamvu twabashije kubaka ibyumba by’amashuri bisaga 22,000 mu mezi icyenda ya mbere y’icyorezo, kuko twashakaga ko amafaranga ashoweyo akomeza gukoreshwa kandi agashyigikira urwego rw’ubuzima kuko twizera iterambere rya muntu rishingiye ku kumwubakira ubushobozi.”

Aha ni mu Karere ka Gakenke, ahuzuye amwe mu mashuri yubatswe mu gihe cya COVID-19

Aha Dr. Ngirente yagezaga ku bihumbi byitabiriye iyo nama gahunda zitandukanye u Rwanda rwafashe mu rugendo rwo kuzahura ubukungu bwarwo. Yavuze ko urworugendo rwayobowe kandi rukiyobowe n’ingingo enye za gahunda nzahurabukungu.

Izo ngingo zirimo Ikigega Nzahurabukungu (ERF) cyashyiriweho gufasha inzego z’ubukungu zahungabanyijwe na COVID-19 nk’urw’amahoteli n’ubukerarugendo, ubwikorezi ndetse n’ibindi bikorwa by’ubukungu.

Yakomeje agira ati: “Mu cyumweru gishize natangije icyiciro cya kabiri cy’Ikigega Nzahurabukungu kigiye kurushaho gufasha ubucuruzi bunini, ubuto n’ubuciriritse.

Icyo cyiciro cya kabiri kigizwe na miliyari 250 z’amafaranga y’u Rwanda kije gikurikira icya miliyari zisaga 100 z’amafaranga y’u Rwanda cyatangajwe muri Kamena 2020 cyafashije ubucuruzi buto busaga 3,000.

Dr. Ngirente yagarutse no ku kuba COVID-19 yaratumye u Rwanda rutahura ko hari bimwe mu bicuruzwa bidakorerwa mu Rwanda kandi hari ubushobozi bwo kubyikorera.

Yabwiye abitabiriye inama ko muri gahunda yo guteza inmbere inganda no Kubaka ubukungu bufasha mu kwigobotora ingaruka za COVID-19, Leta y’u Rwanda yakoze urutonde rw’ibicuruzwa nkenerwa abanyengnda babikora bashyirirwaho amahirwe arimo gusonerwa imisoro mu gihe cy’imyaka ibiri.

Iyo gahunda yakuruye imishinga isaga 90 mu rwego rw’inganda, bikaba byitezwe ko izafasha mu guhanga imirimo mishya isaga 30,000.

Ikindi cyiciro cy’ingenzi yagarutseho ni uguteza imbere urwego rw’ubuhinzi n’ubworozi no kongerera agaciro umusaruro ukomokaho.

Ati: “Kugira ngo ubashe gukundisha abantu ubuhinzi n’ubworozi, usabwa kubereke ko rutanga inyungu nyinshi. Twaharaniye ko hari inkunga ihagije ishyozwe muri urwo rwego ndetse turimo kugerageza gutangiza umushinga uzagabanya inyungu yakwa ku nguzanyo muri urwo rwego ikagera munsi ya 10%. Nibura aho abantu bashobora kwizera ko iyo ushaka gushora imari mu buhinzi ubona inguzanyo ku nyungu iri ku kigero kiri hasi cyane.”

Minisitiri w’Intebe yakomeje avuga ko u Rwanda rwageze ku ntego yo kwigobotora itumizwa ry’imbuto yo guhinga mu mahanga kuko imbuto zose by’umwihariko iz’ibinyampeke zirakorerwa mu gihugu imbere.

Yanakomoje kandi ku mushinga ukomeje wo gukorera ifumbire mvaruganda mu ruganda rugiye kuzura mu cyanya cyahariwe inganda cya Bugesera, yitezweho  kwihaza mu ifumbire ikenewe gushyirwa mu masambu yo mu Rwanda cyane ko izajya ikorwa hashingiwe ku bushakashatsi bwakozwe ku butaka butandukanye.

Abayobozi bitabiriye iyo nama batandukanye bagaragaje ko AfDB ikeneye gushyigikirwa mu guharanira ko irushaho kugira uruhare rukomeye mu iterambere ry’ubukungu bw’Afurika.

Perezida wa Ghana Nana Addo Dankwa Akufo-Addo yavuze ko ibiganiro byo muri iyi nama ya 57 bikwiye kwibanda ku gikwiye gukorwa mu gushyigikira iyi banki ngo irusheho kubona inkunga zo ku rwego mpuzamahanga, kuko byayifasha kurushaho kugira uruhare rw’ingenzi mu kubaka iterambere ry’ibihugu by’Afurika.

Minisitiri w’Intebe w’u Rwanda Dr. Ngirente Edouard, aganira n’Umuyobozi wa AfDB Dr Akinwumi A. Adesina
  • NTAWITONDA JEAN CLAUDE
  • Gicurasi 25, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE