Dr. Ngirente yahagarariye Perezida Kagame mu Nama ya G77 n’u Bushinwa

  • NTAWITONDA JEAN CLAUDE
  • Mutarama 21, 2024
  • Hashize ukwezi 1
Image

Kuri iki Cyumweru, Minisitiri w’Intebe Dr. Ngirente Edouard yahagarariye Perezida wa Repubulika mu Nama ya gatatu y’Abakuru b’Ibihugu na za Guverinoma bihuriye mu itsinda rya G77 rigizwe n’ibihugu biri mu nzira y’amajyambere, n’u Bushinwa, irimo kubera i Kampala muri Uganda.

Ni inama yatangiye kuri iki Cyumweru  yitezweho gusoza ku wa Kabiri tariki ya 23 Mutarama 2024, ije ikurikira indi nama mpuzamahanga ya 19 y’Abakuru b’Ibihugu byibumbiye mu Ihuriro ry’Ibihugu bidafite aho bibogamiye (NAM) na yo yabereye i Kampala.

Inama ya G77 n’u Bushinwa yateranye ku nsanganyamatsiko igira iti, “Nta n’Umwe Usigaye Inyuma”, ikaba igamije kurushaho kwimakaza ubutwererane hagati y’ibihugu 134 bihuriye mu Muryango G77 muri iyi Isi ikomeje kwihuta mu iterambere.

Iyo nama kandi igamije kongera ubutwererane by’umwihariko hagati y’ibihugu bikiri mu nzira y’amajyambere mu nzego zirimo ubucuruzi, ishoramari, iterambere rirambye, guhangana n’imihindagurikire y’ibihe, kurandura ubukene ndetse no kubaka ubukungu bushingiye ku ikoranabuhanga.

Biteganyijwe kandi ko muri iyo nama, ibihugu bihuriye muri G77 uko ari 134 n’u Bushinwa, bizashimangira ubufatanye, kunga ubumwe n’ubwuzuzanye mu bihugu by’amajyepfo y’Isi kandi binarangururire hamwe ijwi rigamije kugera ku ntego imwe n’icyerekezo gisangiwe.

Repubulika ya Uganda yiteguye kubonera inyungu nyinshi mu kwakira iyo nama, ndetse Perezida w’icyo gihugu Yoweri Kaguta Museveni yishimiye kuba ari we wakiriye inama itangije icyerekezo gishya cy’uburumbuke, ubumwe n’imbaraga z’ibihugu bikiri mu nzira y’amajyambere.

G77 ni Ihuriro ryashinzwe n’ibihugu 77 bikiri mu nzira y’amajyambere  ku wa 15 Kamena 1964, ndetse ibyo bihugu byashyize umukono ku masezerano ahuriweho mu Nama ya mbere y’Umuryango w’Abibumbye yiga ku Bucuruzi n’Iterambere (UNCTAD) yabereye i Geneva mu Busuwisi.

Nubwo ibihugu byakomeje kwiyongera muri uwo Muryango bikagera ku 135, izina rya mbere ryakomeje kugumaho kubera igisobanuro cy’amateka rifite.

Uwo Muryango ni wo wa mbere ku Isi uhuriyemo ibihugu bikiri mu nzira y’amajyambere mu Muryangio w’Abibumbye, ukaba utanga amahirwe kuri ibyo bihugu yo gukorana no kwimakaza ubufatanye bushingiye ku nyungu ibihugu bihuriyeho no kongera ubushobozi bwo kumvikana ku ngingo z’ubukungu mpuzamahanga binyuze muri gahunda zashyizweho n’Umuryango w’Abibumbye, nk’ubutwererane bw’ibihugu byo mu Majyepfo y’Isi.

Inama yiga ku butwererane bw’ibihugu bikiri mu nzira y’Amajyambere ni urwego rufatirwamo ibyemezo bihamye muri G77.

Inama ya mbere y’uyu Muryango yateraniye i Havana muri Cuba ku wa 10-14 Mata 2000 mu gihe iya kabiri yateraniye i Doha muri Qatar ku ya 12-16 Kamena 2005.

Hagendewe ku mahame y’ubutwererane bushingiye ku merekezo y’Isi, Inama ya gatatu yateraniye i Kampala ifite igisobanuro gikomeye cyane kubera ko ari yo ya mbere ibereye muri Afurika, bityo ikaba ishimangira agaciro k’ibihugu by’Afurika muri uwo Muryango.

Muri iyo nama kandi, biteganyijwe ko ari na ho habera umuhango wo gushyikiriza Repubulika ya Uganda inkoni y’ubushumba bwo kuyobora uyu Muryango muri uyu mwaka wa 2024, isimbuye Cuba.

  • NTAWITONDA JEAN CLAUDE
  • Mutarama 21, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE