Dorcas na Vestine ntibagitaramiye muri Canada

Itsinda ry’abaramyi rizwi nka ‘Vestine na Dorcas’ batangaje ko batakitabiriye igitaramo bari bategerejwemo muri Canada, bavuga ko kutazaririmba kwabo byatewe n’impamvu z’abagiteguraga.

Mu butumwa bageneye abakunzi babo ku mbuga nkoranyambaga kuri uyu wa 7 Nzeri 2026, abo baramyi biseguye ku bakunzi babo bavuga ko ntaho bahuriye n’izo mpinduka icyakora byaturutse ku byo batumvikanyeho n’abategura icyo gitaramo cyari kiswe ‘Vancouver Warship Encounter’.

Banditse bati: “Bakundwa bafana kandi bakunzi bacu kuri buri wese wari udutegereje mu gitaramo ‘Vancouver Warship Encounter’, bitewe n’imbogamizi zitari zitezwe zaturutse ku bategura, ntabwo tukibashije kwitabira icyo gitaramo.”

Bakomeza bashimira cyane abakunzi babo ku bufatanye, urukundo no kubashyigikira badahwema kubagaragariza mu bihe byose banyuramo.

Bati: “Tubiseguye ku ngaruka izi mpinduka zishobora kugira. Dukunda kandi dushimura kudushyigikira byanyu bihoraho, kandi si twe tuzarota twongeye kwifatanya namwe mu kuramya, ikindi gihe. Murakoze ko mudahwema kuba kimwe mu bice bigize urugendo rwacu.”

Nubwo iri tsinda ryatangaje ibyo, ku ruhande rw’abategura ‘Vancouver Worship Encounter’ rwo ntawe urasobanura ku mugaragaro impamvu y’ibibazo byatumye iryo tsinda ritakibashije kucyitabira.

Dorcas na Vestine baheruka gutaramira muri Canada ku wa 15 Ugushyingo 2025, ubwo bahasorezaga urugendo rw’ibitaramo bya “Yebo Concerts” birimo n’icyabereye mu Mujyi wa Edmonton uri mu Ntara ya Alberta, muri Canada.

Byari biteganyijwe ko Vestine na Dorcas bazitabira icyo gitaramo tariki 12 Nzeri 2026, kuva saa 11:00 z’umugoroba kugeza saa 5:00 za mu gitondo, kuri 5588 188 St, Surrey, BC.