Doğuş Group yiteguye kubaka hoteli na resitora bigezweho mu Rwanda

  • NTAWITONDA JEAN CLAUDE
  • Nzeri 14, 2022
  • Hashize imyaka 2
Image

Ubuyobozi bwa Doğuş Holding A.Ş. (Doğuş Group) bwatangaje ko mu bikorwa by’ishoramari bwiteguye gukora mu Rwanda harimo kubaka hoteli nshya igezweho mu Mujyi wa Kigali na resitora z’akataraboneka mu bice bitandukanye by’Igihugu.

Byagarutsweho na Ferit Şahenk uyobora ikigo Doğuş Group, mu kiganiro yagiranye n’itangazamakuru nyuma yo kwakirwa na Minisitiri w’Intebe Dr. Ngirente Edouard ku wa Kabiri taliki ya 13 Nzeri 2022.

Ikigo Doğuş Group cyo muri Turukiya ni kimwe mu bigo bikomeye ku Isi kuko gihuje kompanyi zirenga 300 zikora ubucuruzi mu nzego zitandukanye ku Isi zirimo ubwubatsi, ubucuruzi bw’imodoka, amahoteli n’amaresitora, ubukerarugendo no kwakira abantu, ububiko bw’ibicuruzwa, itangazamakuru n’izindi.

Kompanyi za Doğuş Group zikorera mu bihugu 29 hirya no hino ku isi. Ni ikigo gikoresha abakozi basaga 19,000 biganje mu nzego z’ishoramari ndwi cyibandaho ari zo ubucuruzi bw’imodoka, ubwubatsi, itangazamakuru, kwakira abantu, kugurisha no gukodesha inyubako, ingufu n’ikoranabuhanga.

Şahenk yavuze ko uretse mu Mujyi wa Kigali hari n’ahandi hantu babonye bazagurira ibikorwa byabo by’amahoteli no kwakira abantu, ati: “Aha mbere ni muri Kigali, aha kabiri ni ku Kiyaga cya Kivu ndetse no mu Birunga, hafi y’Ingagi nziza. U Rwanda ni ahantu heza ho gushora imari, kandi bizaba ari akarusho mu bihe biri imbere, ni yo mpamvu natwe dushaka kuba bamwe mu bazaba bari muri ubwo bwiza.”

Yakomeje avuga ko biteguye kongerera Abanyarwanda ubumenyi mu bijyanye n’amahoteli no kwakira abantu, aho bamwe bazajya bajyanwa mu mahugurwa muri Turikiya mbere yo gutangira gukorera muri hoteli cyangwa resitora zizashingwa mu Rwanda.

Yavuze kandi ko biramutse bibakundiye bafite n’icyifuzo cyo gushinga ishuri rizajya rihugurira Abanyarwanda mu gihugu, cyane cyane mu bijyanye n’amahoteli, ubukerarugendo no kwakira abantu.

Ati: “Birumvikana mu kwaguka kwacu, ushobora kugira ubutaka cyangwa inyubako, ariko ikizana agaciro k’ibyo ni abantu. Rero twashatse amahirwe haba muri Minisiteri y’Uburezi cyangwa ishinzwe ubukerarugendo, kugira ngo natwe tube twagira uruhare mu kuzana ishuri rifasha aba bana bato b’abahungu n’abakobwa mu kwiga ubukerarugendo n’amahoteli.”

Ferit Şahenk yakiriwe na Minisitiri w’Intebe w’u Rwanda ari kumwe n’Umuyobozi Wungirije wa Doğuş Group Hüsnü Akhan, Gur Cagdas uri mu bagize Inama y’Ubutegetsi akaba n’Umuyobozi wa Doğuş Construction nka kimwe mu bigo bishamikiye kuri Doğuş Group gikora ubwubatsi bw’imihanda, inzu zo guturamo n’ibindi.

Umuyobozi Mukuru w’Urwego rw’Igihugu rw’Iterambere (RDB), Claire Akamanzi, yavuze ko kuba abashoramari bakomeye ku rwego mpuzamahanga bagaragaza ubushake bwo gushora imari mu Rwanda ari ikimenyetso cyiza ku iteramber ry’ishoramari mu gihugu.

Ati: “Nk’u Rwanda biradushimisha kuba umushoramari ufite ubushobozi nk’uyu arimo kureba ibyo akora mu gihugu cyacu. Ibyo bigaragaza ibyo dukomeje gukora nk’Igihugu mu kureshya no korohereza abashoramari.”

Uretse urwego rw’amahoteli n’ubukerarugendo, ubuyobozi bw’iki kigo mu mwaka ushize bwemeje gushora imari no mu bikorwa remezo birimo imihanda, ibiraro, kubaka inganda nshya z’amazi no kuvugurura izisanzwe, kubaka imihanda ya gari ya moshi, ibibuga by’indege, gucunga ibyambu no gutunganya ingufu z’amashanyarazi.

Ubuyobozi b’iki kigo kandi bwatangaje ko bugiye kubaka icyicaro cy’Akarere mu Rwanda, kizahuriza hamwe amatsinda agamije kwigira hamwe no gukurikirana imishinga ishyirwa mu bikorwa mu gihugu no ku mugabane w’Afurika.

  • NTAWITONDA JEAN CLAUDE
  • Nzeri 14, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE