Djihad na Ntwari mu Banyarwanda bakina hanze bitwaye neza

  • SHEMA IVAN
  • Ukuboza 4, 2023
  • Hashize amezi 3
Image

Kapiteni w’ikipe y’igihugu w’Amavubi, Bizimana Djihad ukina muri Shampiyona ya Ukraine, yakoze akazi gakomeye atsinda igitego cyahesheje ikipe ye intsinzi mu minota ya nyuma y’umukino, aba umwe mu Banyarwanda bakina hanze bitwaye neza mu mpera z’icyumweru.

Mu mpeza z’icyumweru gishize mu bihugu bitandukanye, imikino ya shampiyona yarakinwe ndetse n’andi marushanwa arakomeza nubwo hari abari mu karuhuko.

Uko ni na ko bimeze kuri bamwe mu bakinnyi b’Abanyarwanda bagiye gukina hanze yigihugu bamwe muri bo bafashije amakipe yabo kwitwara neza nubwo hari abakiri mu karuhuko kuko shampiyona zabo zitarasubukurwa.

Kapiteni w’Amavubi, Bizimana Djihad, yabaye umucunguzi w’ikipe ye yo mu Cyiciro cya mbere muri Ukraine, FC Kryvbas, ayifasha gusoza umukino itsinze Oleksandriya ibitego 2-1 kuko ari we winjije igitego  icy’intsinzi cyagiyemo ku munota wa 83.

Ku wa Gatandatu, mu Bubiligi hakinwe imikino y’Abatarengeje imyaka 23, St. Liège ikinamo umusore Hakim Sahabo yari iherutse kwitwara mu mikino iheruka ntabwo yahiriwe kuko yatsinzwe na Waregem ibitego 3-1.

Uyu ni umukino Sahabo Hakim atitwayemo neza nk’ubushize kuko atawurangije ahubwo yasimbuwe na Mouad El Fanis ku munota wa 77.

Bukeye bwaho, ku Cyumweru, Sahabo yari ku ntebe y’abasimbura ubwo Ikipe nkuru ya Standard de Liège yatsindwaga na Club Brugge ibitego 2-0 muri Jupiler Pro League shampiyona y’icyiciro cya mbere mu Bubiligi.

Mu gihugu cya Kenya, Sibomana Patrick ‘Papy’ ukinira Gor Mahia yo muri Kenya, yabanje mu kibuga mu mukino ikipe ye yatsinzemo Kariobangi Sharks ibitego 2-1 ndetse ihita ifata umwanya wa mbere mu gihe Bayisenge Emery bakinana yari ku ntebe y’abasimbura.

Umunyezamu wa mbere w’Amavubi, Ntwari Fiacre, yongeye gufasha ikipe ye ya TS Galaxy yo muri Afurika y’Epfo mu mikino ya Carling Cup yari igeze muri ½, ayifasha kujya ku mukino wa nyuma itsinze AmaZulu ibitego 3-2.

Manzi Thierry ukinira Al Ahli Tripoli muri Libya, yabanje mu kibuga mu mukino ikipe ye yatsinzemo Al Bashayer ariko aza gusimburwa ku munota wa 46 na Abullah Al Sharif.

Muri izi mpera z’icyumweru ntabwo myugariro Imanishimwe Emmanuel ‘Mangwende’ ukinira AS FAR Rabat yo muri Maroc yakinnye nubwo hagati muri cyo yayifashije gutsinda Wydad AC ibitego 3-1.

Byiringiro Lague wafashije ikipe ye ya Sandvikens IF kuzamuka mu cyiciro cya kabiri, we na Mukunzi Yannick bakinana bari mu karuhuko, Lague we yakurikiye umukino Muhazi united yatsinzemo Etincelles ibitego 3-1 wabaye kuri iki cyumweru kuri Stade ya Ngoma.

  • SHEMA IVAN
  • Ukuboza 4, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE