Denmark yemeye kwakira impunzi 200 ziganjemo abazava mu Rwanda

  • NTAWITONDA JEAN CLAUDE
  • Ukuboza 28, 2023
  • Hashize amezi 2
Image

Impunzi n’abasaba ubuhungiro bacumbikiwe mu nkambi zitandukanye mu Rwanda bari muri 200 bemerewe kwakirwa n’Igihugu cya Denmark mu rwego rwo gushyira mu bikorwa intego yo kwakira impunzi cyiyemeje buri mwaka.

Minisiteri ishinzwe Abimukira no gusubiza impunzi mu buzima busanzwe muri Denmark yatangaje ko abemerewe kwakirwa biganjemo ahanini abatoranyijwe mu nkambi zinyuranye zo mu Rwanda.

Abo baziyongeraho n’abaturage ba Eritrea n’aba Afghanistan bahungiye mu bihugu by’abaturanyi.

Mu itangazo ryashyizwe hanze n’iyo Minisiteri, byemejwe ko impunzi zizahabwa agaciro kurusha izindi by’umwihariko ari abagore n’abakobwa.

Minisitiri ushinzwe Abimukira no kubasubiza mu buzima busanzwe Kaare Dybvad Bek, yagize ati: “Tugomba kugabanya umubare w’abaduhungirraho mu buryo bunyuranyije n’amategeko bakagera ahangaha baciye mu maboko y’ababacuruza.  Birababaje kubona ababazana hano buzuza imifuka yabo mu gihe abimukira bo barohama mu Nyanja ya Mediterranee.”

Minisitiri Bek yashimangiye kandi ko Guverinoma ya Denmark ishyigikiye byimazeyo uburyo bwose bworohereza abimukira n’abasaba ubuhungiro kugera muri Denmark binyuze mu nzira zateguwe neza kandi zemewe n’amategeko.

Nanone kandi, yashimangiye akamaro ko kuba icyo gihugu cyarahisemo kujya cyakira nibura abantu batarenze 200 buri mwaka, cyane ko kugira ngo abakirwa basubizwe mu buzima busanzwe mu buryo bwuzuye kandi butanga umusaruro, bishingira ku mubare cyakira ujyanye n’ubushobozi bwacyo bwo kubakurikirana.

Minisitiri Bek kandi yavuze ko mu gushyira mu bikorwa iyo gahunda Denmark yiyemeje gukora buri mwaka hakenewe ubushishozi buhambaye kandi hagafatwa ibyemezo bikwiriye kandi byihuse mu rugendo rwokwakira abimukira.

Yashimangiye ko ari ingenzi cyane kuzirikana ko umubare wemejwe w’abagomba kwakirwa ufasha igihugu gushyira mu bikorwa mu buryo bwuzuye ibyo kigomba abo cyakira bose.

Kugira ngo ibyo byose bigerweho kandi, Guverinoma ya Denmark ikora ibishoboka byose mu kwirinda ibyemezo bihubukiweho ndetse n’imyanzuro ishobora gusiga ingaruka z’igihe kirekire.

Intumwa y’Ishyaka The Moderates muri Guverinoma ishinzwe Abimukira no kubasubiza mu buzima busanzwe, Mohammad Rona, na we yagize icyo avuga ku byiyumvo by’iryo shyaka mu birebana n’abimukira.

Yagize ati: “Nishimiye ko twebwe muri Guverinonoma twiyemeje kwakira impunzi 200 mu mwaka wa 2023, ariko kuri njye bwite ni ingenzi cyane ko twabishyiramo imbaraga maze abo twemeye bakakirwa vuba na bwangu.”

Guhera mu mwaka wa 2020, Denmark yagiye yubahiriza ibyo yiyemeje nk’uruhare rwayo rwo kwakira impunzi n’abimukira nibura 200 buri mwaka.

Muri uwo mwaka wa 2020 abantu 200 bose barakiriwe, mu wa 2021 hakirwa abantu 159, abasigaye bakaba bashobora kuzazira rimwe n’abo Igihugu cyemeye kwakira uyu mwaka n’uwashize bitarenze mu gice cya mbere cy’umwaka wa 2024.  

  • NTAWITONDA JEAN CLAUDE
  • Ukuboza 28, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE