Coproriz-Ntende mu mishinga yo kubaka inzu igeretse

  • KAYITARE JEAN PAUL
  • Ukuboza 7, 2023
  • Hashize amezi 3
Image

Ubuyobozi bwa Koperative y’Abahinzi b’umuceri mu gishanga cya Ntende mu Murenge wa Rugarama mu Karere ka Gatsibo mu Ntara y’Iburasirazuba, bwatangaje ko bufite umushinga wo kubaka inzu igeretse izaba igizwe n’ibyumba 24, ikazuzura itwaye 300,000,000 Frw.

Byagarutsweho kuri uyu wa Kane tariki 07 Ukuboza 2023, mu muhango wo kwakira indahiro n’ihererekanyabubasha hagati ya komite nshya ya Coproriz Ntende na komite icyuye igihe.

Ni umuhango witabiriwe n’ubuyobozi bw’Ikigo cy’Igihugu Gishinzwe Amakoperative (RCA) ndetse n’abayobozi b’amakoperative agize ihuriro ry’abahinzi b’umuceri mu Karere ka Gatsibo.

Waranzwe kandi no gushimira abahinzi batandukanye by’umwihariko abakozi ba koperative barimo n’abakorera muri hoteli yayo.

Rugwizangoga Elysé, Perezida wa Coproriz Ntende wari umaze imyaka Itandatu ayobora Koperative, avuga ko koperative ihora mu rugendo rwo kwiyubaka.

Avuga ko hari imwe mu mishinga basigiye komite nshya irimo na hoteli y’ibyumba 24 izuzura itwaye 300,000,000 Frw.

Ni amafaranga bateganya kuguza banki cyane ko komite icyuye igihe hari 400,000,000 Frw isize imaze kwishyura.

Coproriz Ntende yatangiye iri mu buhinzi ariko imaze kubona serivisi iha abanyamuryango bituma yinjira mu ishoramari.

Rugwizangoga agira ati “Ishoramari ni urugendo rudashira ariko bisaba ko buri munsi duhora twongera ibikorwa”.

Akomeza agira ati “Twahereye kuri hoteli, tugiye mu iduka ricuruza imiti y’abantu (Pharmacy), tujya mu bworozi bw’inkoko dufite byinshi”.

Coproriz Ntende yasanze farumasi ishoboka kandi ifitiye abaturage akamaro. Ubu igiye kubaka ivuriro (Clinic) umwaka utaha cyangwa umwaka ukurikira utaha.

Bifuza ko koperative yakomeza ikazamuka, ari yo mpamvu basaba abayobozi bashya kubungabunga koperative kugira ngo ejo itazasubira inyuma.

Munyaburanga Emmanuel, Perezida mushya wa koperative Coproriz Ntende, agaragaza ko ingamba nshya bazanye ari uguhera ku byo basanze.

Ati “Hari intego bari bafite zigomba kugerwaho, tuzafatanya n’abo dusanze; abakozi, abanyamuryango tuzigereho uko byagenda kose”.

Bazakora ibishoboka byose kugira ngo koperative igere ku rwego rushimishije.

Icyihutirwa bagomba gukora ngo ni ukwagura hoteli cyane ko basanze hari igishushanyo cyamaze gukorwa, no kubaka amarerero y’abana bafite ababyeyi bahinga umuceri mu gishanga cya Ntende.

Ntaganda Abdul Wahab, umuyobozi w’ishami rya RCA mu Ntara y’Iburasirazuba, asaba ubuyobozi bushya kudasubiza inyuma koperative ahubwo igakomeza gutera imbere.

Agira ati “Iyi koperative tuyizi nka koperative y’intangarugero; haba muri iyi ntara no k’Urwego rw’igihugu, bivuze ngo tubatezeho byinshi cyane cyane mu kurushaho kuzamura iyi koperative”.

Ibikorwa byakozwe n’abarangije manda bagezeho, ngo bigaragaza ko abagiyeho bizaborohera kugera ku bindi byinshi kuko bafite umusingi mwiza kandi ukomeye.

RCA ibitezeho kurushaho gushimangira ubumwe bw’abanyamuryango no gufashanya, bakarushaho gukurikirana ibikorwa byabo by’iterambere no guha inyungu abanyamuryango buri mwaka biturutse ku bikorwa by’ishoramari bakoze.

Ati “Ibyo babikoraga ndetse n’imigabane yabo iragenda izamuka”.

Ikigo cy’Igihugu Gishinzwe Amakoperative mu Rwanda gisaba izindi koperative gukorera ingendo shuri muri Coproriz Ntende.

Ntaganda avuga ko biri muri politiki y’igihugu ko RCA ikangurira abanyarwanda bose kwibumbira mu makoperative mu rwego rwo gushora imari kugira ngo ibikorwa bakora birusheho kubinjiriza.

Bimwe mu byo komite icyuye igihe isize idakoze, ni urubanza Koperative ifitanye na Biziyaremye Potien rujyanye n’imashini yatonoraga umuceri kandi yari yaragenwe gukobora ibigori (Kawunga).

Yatonoraga umuceri w’abahinzi kandi atabyemerewe, imashini ye yafashwe na koperative ishyikirizwa ubuyobozi bwite bwa Leta.

Hari kandi kwihutisha igihembwe cy’ihinga 2024B.

Komite nshya igizwe na Munyaburanga Emmanuel Perezida wa Koperative, Nzavugankize Etienne Visi Perezida, Namahirwe Venancie Umunyamabanga n’abajyanama babiri.

Imisusire y’inzu igeretse (Etage) izubakwa na Coproriz-Ntende ikazuzura itwaye 300,000,000 Frw
Munyaburanga Emmanuel (ibumoso) perezida mushya wa Coproriz-Ntende ahabwa ibyangombwa bya Koperative n’uwo asimbuye Rugwizangoga Elysé
Abagize Komite nshya ya Koperative COPRORIZ-NTENDE barahiriye inshingano
  • KAYITARE JEAN PAUL
  • Ukuboza 7, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE