CG (Rtd) Gasana wahoze ari Guverineri w’Intara y’Iburasirazuba arahakana ibyaha ashinjwa

  • Imvaho Nshya
  • Ugushyingo 10, 2023
  • Hashize amezi 7
Image

Mu gitondo cyo kuri uyu wa Gatanu tariki 10 Ugushyingo 2023 ni bwo CG (Rtd) yagejejwe ku Rukiko rw’Ibanze rwa Nyagatare. Akurikiranyweho ibyaha bibiri ari byo gukoresha ububasha ahabwa n’amategeko mu nyungu ze bwite no kwakira indonke ngo akore ikiri mu nshingano ze.

Umucamanza yabajije Gasana icyo abivugaho, avuga ko byose abihakana.

Ubushinjacyaha bwavuze ko busabira Gasana gufungwa by’agateganyo kubera impamvu zikomeye zituma akekwaho ibyaha.

Ni ibyaha Umushinjacyaha Habarurema Jean Pierre yavuze ko bikomoka ku mikoranire na rwiyemezamirimo Karinganire Eric wari ufite isoko ryo kugeza amazi mu mirima yo mu duce dutandukanye mu Burasirazuba.

Muri Gicurasi 2022, rwiyemezamirimo yari amaze kuyageza mu Mirenge ya Gahengeri na Karenge mu Karere ka Rwamagana. Ngo ageze muri Karenge, yahuye n’ikibazo, abura umuriro uhagije yagombaga gukoresha ku mashini, ku buryo hamwe wari muke ahandi nta wuhari.

Icyo gihe yaganirije uwo mushinga n’imbogamizi afite, Gasana amubwira ko azamufasha.

Ku wa 25 Gicurasi 2022, Gasana ngo ari kumwe n’abayobozi b’Uturere n’ab’inzego z’umutekano, basuye uwo mushinga barawushima. Nyuma y’iminsi itatu, Karinganire yandikiye Gasana, amusaba rendez-vous kugira ngo amugaragarize imbogamizi ziri mu mushinga, bityo amukorere n’ubuvugizi.

Icyo gihe bahuriye kuri hotel i Nyagatare, baraganira, Gasana amubwira ko afite umurima uri mu Murenge wa Katabagemu mu Mudugudu wa Rebero, amusaba ko yamupimira niba munsi y’ubutaka harimo amazi.

Ku wa Kane Kamena 2022, Karinganire yagiye gupima ya sambu ya Gasana, asanga harimo amazi. Gasana ngo yamusabye ko yamufasha ayo mazi akazamurwa, akajya akoreshwa mu kuhira bityo akazabiheraho amukorera ubuvugizi ashaka.

Icyo gihe Karinganire yakoresheje amafaranga yari yarahawe mu misanzu y’abaturage b’i Rwamagana bashakaga ko abagereza amazi mu mirima.

Tariki 4 Nyakanga 2022, amazi yari yamaze kugera mu isambu ya Gasana, mu bikorwa ubushinjacyaha bwavuze ko byari bifite agaciro ka miliyoni 48 Frw.

Nyuma Gasana yatangiye gukorera Karinganire ubuvugizi, abwira ba Meya barimo uwa Rwamagana na Gatsibo, kuzashaka uyu mugabo ngo baganire, kugira ngo abasobanurire umushinga we.

Yanahuje Karinganire n’abayobozi ba Koperative ya Ntende ihinga umuceri , kugira ngo abafashe kubona amazi kuko ubuhinzi bw’umuceri bukenera amazi menshi.

Nyuma ngo Gasana yaje gusa n’uwikanga ko ibyo yakoze bishobora kuzamo ikibazo, ahagarika rwiyemezamirimo na bimwe mu bikoresho byari byashyizwe mu murima we arabihagarika.

Mu mpamvu zikomeye ubushinjacyaha bushingiraho bumusabira gufungwa by’agateganyo, ni uko ngo RIB ubwayo yageze mu isambu ya Gasana tariki 27 Ukwakira 2023, isanga hari pompe zicomekwaho imipira ijyana amazi mu murima n’umuriro w’amashanyarazi wifashishwa kugira ngo izo mashini zikore.

Indi mpamvu ngo ni amashusho n’amafoto agaragaza ko hari imirimo yakorewe muri iyo sambu, aho Karinganire yagiye ayasangiza Gasana amwereka aho ibikorwa bigeze.

Mu ibazwa, ngo Gasana yemeye ko yahuye na Karinganire kuri hotel i Nyagatare, ko rwiyemezamirimo yapimye amazi akayazamura no mu murima, ndetse yemera ko ibyo byose yakorewe nta mafaranga yigeze yishyura.

Ni byo ubushinjacyaha buheraho buvuga ko ari indonke yasabye, akanayakira kugira ngo akore ikiri mu nshingano ze, ari cyo ubuvugizi.

Urubanza rurakomeje…

KAYITARE JEAN PAUL

  • Imvaho Nshya
  • Ugushyingo 10, 2023
  • Hashize amezi 7
TANGA IGITEKEREZO
Betty says:
Ugushyingo 10, 2023 at 3:48 pm

Ariko yeee, none se kuba ntacyo yamuhaye bivuze ko nawe ibikoresho yakoresheje yabiboneye ubuntu? Byaba byose! Time, know how n’abantu yakoresheje ko atabikora wenyine byo ntibibarwa? Yewega. Ntibizoroha ndakurahiye.

Andika igitekerezo

AMATEGEKO AGENGA IYANDIKA RY'IGITEKEREZO CYAWE