CECAFA U18: Amavubi yatsinze Somalia 1-0

  • SHEMA IVAN
  • Ugushyingo 25, 2023
  • Hashize amezi 6
Image

Ikipe y’igihugu Amavubi y’Abatarengeje imyaka 18 yatsinze Somalia igitego 1-0 mu mukino wa mbere muri CECAFA U18 uri kubera mu gihugu cya Kenya mu mujyi wa Kisumu.

Ni umukino wabaye kuri uyu wa Gatandatu tariki 25 Ugushyingo 2023, kuri Jomo Kenyatta Stadium.

Mu mukino wari uryoheye ijisho amakipe yombi yatangiye umukino yasatirana ku mpande zombi

Mu minota 30, Somalia yari yatangiye umukino icungira ku mipira u Rwanda rutakaje, yatangiye kuwiharira ari nako ihererekanya neza.

Ku munota wa 38 Amavubi yabonye ikarita itukura yahawe umuzamu Byiringiro Eric wafatiye umupira hanze y’urubuga rw’amahina maze umusifuzi amuhereza ikarita itukura.

Igice cya mbere cyarangiye Amavubi anganya na Somalia ubusa ku busa.

Mu gice cya kabiri nubwo Amavubi bari abakinnyi 10 yatangiye  asatira cyane izamu rya Somalia.

Ku munota wa 47 umupira wahinduwe na Ndayishimiye Barthazard wasanze Sultan Bobo Sibomana mu rubuga rw’amahina acenga myugariro wa Somalia ahita atsinda igitego cya mbere cy’Amavubi.

Iyi kipe yakomeje gukina neza igerageza uburyo bwinshi ariko imipira myinshi ikajya hanze y’izamu.

Mu minota 70, Somalia yongeye kwiharira umupira cyane ari nako icyuho cy’ikarita y’umutuku cyari gitangiye kuboneka kuko abakinnyi bagendaga baruha.

Ku munota wa 90, iyi kipe yateye ‘coup franc’ nziza cyane ariko umupira umunyezamu awushyira muri koruneri. Mu minota ya nyuma Somalia yasatiriye cyane ishaka igitego cyo kwishyura ariko umunyezamu Ruhamyankiko Yvan akabyitwaramo neza.

Umukino warangiye Amavubi atsinze Somalia igitego kimwe ku busa cya Sibomana Sultan Bobo.

Ikipe y’igihugu Amavubi izagaruka mu kibuga ku wa Kabiri tariki 28 Ugushyingo 2023 ikina na Kenya saa tanu za mugitondo ku isaha yo mu Rwanda.

  • SHEMA IVAN
  • Ugushyingo 25, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE