CECAFA U 18: U Rwanda rwasoreje ku mwanya wa kane

  • SHEMA IVAN
  • Ukuboza 8, 2023
  • Hashize amezi 6
Image

Ikipe y’igihugu Amavubi y’Abatarengeje imyaka 18 yatsinzwe na Tanzania ibitego 3-1 mu mukino wo guhatanira umwanya wa gatatu isoreza ku mwanya wa kane muri CECAFA U18 yaberaga mu gihugu cya Kenya mu mujyi wa Kisumu.

Uyu mukino wabaye kuri uyu wa Gatanu tariki 8 Ukuboza 2023, kuri sitade yitiriwe Jomo Kenyatta (Jomo Kenyatta Stadium).

Mu mukino wari uryoheye ijisho amakipe yombi yatangiye umukino asatirana ku mpande zombi.

Ku munota wa 19’, Tanzania yafunguye amazamu ku igitego cyatsizwe na Zidane Ally Sereri ku burangare bwa ba myugariro b’amavubi ahita aroba umuzamu Yvan Ruhamyankiko.

Ku munota wa 25’, Tanzania yarushaga cyane Amavubi yabonye igitego cya kabiri cyatsinzwe na Said Said ku mupira wavuye kuri koruneri atera ishoti rikomeye umuzamu w’amavubi ntiyamenya aho umupira unyuze. 

Ku munota wa 38’, Amavubi yabonye igitego cyo kwishyura cyatsinzwe na rutahizamu Ndayishimiye Didier ku mupira muremure watewe na Ndayishimiye Baltazard ashyiraho ikirenge umuzamu wa Kenya yisanga umupira wageze mu rushundura. 

Mbere y’uko igice cya mbere amavubi yabonye amahirwe yo gutsinda igitego cya kabiri cyo kunganya ku mupira wa Ndashimiye Baltazard yahawe mu rubuga rw’amahina awutera hejuru y’izamu.

Igice cya mbere cyarangiye Amavubi atsinzwe na Tanzania ibitego 2-1.

Mu gice cya kabiri amavubi yagarutse ashaka igitego cyo kwishyura ari nako Tanzania ishaka kongera umubare w’ibitego.

Ku munota wa 49’, Tanzania yabonye igitego cya gatatu cyatsizwe na John Misheto ku mupira yahawe  hagati mu kibuga acenga ba myugariro b’amavubi ahita aroba umuzamu.

Ku munota wa 74′ amavubi yabuze amahirwe yo kubona igitego cya kabiri ku ishoti rikomeye ryatewe na Sultan Bobo Sibomana umupira ukubita igiti cy’izamu ujya hanze. 

Mu minota 10 ya nyuma y’umukino, Ikipe y’Igihugu Amavubi yakomeje gushaka uko yakwishyura ibitego bibiri ariko ba myugariro ba Tanzania n’umuzamu bahagarara neza. 

Umukino warangiye Amavubi atsinzwe na Tanzania ibitego 3-1mu mukino w’umwanya wa gatatu. 

Muri aya marushanwa ya CECAFA U 18 amavubi yakinnye imikino itanu atsindamo imikino ibiri itsindwa imikino itatu.

  • SHEMA IVAN
  • Ukuboza 8, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE