CECAFA U-15: U Rwanda rwatsinzwe umukino wa kabiri wikurikiranye

  • Imvaho Nshya
  • Ugushyingo 8, 2023
  • Hashize amezi 4
Image

Ikipe y’igihugu Amavubi y’abatarengeje imyaka 15 yatsizwe na Tanzania ibitego 2-1, uba umukino wa kabiri u Rwanda rutakaje muri CECAFA U-15 iri kubera muri Uganda.

Ni umukino wabaye ku gicamunsi cyo kuri uyu wa Gatatu tariki 8 Ugushyingo 2023, ku kibuga cya FUFA Technical Center mu Mujyi wa Njeru.

Wari umukino wa kabiri wo mu Itsinda B, aho uwa mbere u Rwanda rwawutsinzwe na Zanzibar ibitego 3-0.

Mbere yo gutangira uyu mukino, habanje gufatwa umunota wo kwibuka uwahoze ari Visi Perezida w’Ishyirahamwe rya Ruhago muri Uganda (FUFA), Darius Ngoye, witabye Imana ku wa Kabiri, tariki 7 Ugushyingo 2023.

Umukino watangiye utuje, amakipe yombi yigana, byatumaga afungana cyane. Uko iminota yazamukaga, Tanzania yagiye yinjira mu mukino itangira kwiharira umupira cyane.

Ku munota wa 35, Tanzania yazamukanye umupira neza ku ruhande rw’ibumoso, uhindurwa imbere y’izamu habura uwukuraho, usanga Peter Arbogasti ahagaze wenyine atsinda igitego cya mbere.

Nyuma yo gutsindwa igitego u Rwanda rwatangiye gusatira rushaka kwishyura ariko abakinnyi b’inyuma ba Tanzania bakabyitwaramo neza. Ku munota wa 40, Ishimwe Claude yacomekewe umupira neza, agiye gutsinda igitego umusifuzi avuga ko yaraririye.

Igice cya Mbere cyarangiye Tanzania yatsinze u Rwanda igitego 1-0.

Mu gice cya kabiri Iyi kipe ya Tanzania yakomeje gusatira maze  ku munota wa 48, Peter Arbogasti yongera gutera ishoti rikomeye cyane atsinda igitego cya kabiri.

Muri iyi minota Ikipe y’Igihugu y’u Rwanda yarushijwe cyane n’iya Tanzania ihusha ibitego byinshi.

U Rwanda rwakomeje gusatira, ku munota wa 89 rubona igitego cy’impozamarira cyatsinzwe na Niyongabo Patrick ku mupira wavuye muri koruneri abakinnyi ba Tanzania bananirwa gukiza izamu.

Mu minota itanu y’inyongera, Feisal Juma yahawe ikarita y’umutuku, umukino urangira Tanzania itsinze u Rwanda ibitego 2-1.

Undi mukino wabaye muri iri tsinda rya Mbere , Zanzibar yanyagiye Somalia ibitego 4-0.

Biteganyijwe ko u Rwanda ruzagaruka mu kibuga Tariki 11 ugushyingo 2023 rukina na Somalia.

SHEMA IVAN 

  • Imvaho Nshya
  • Ugushyingo 8, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE