Canada yashimiye u Rwanda kurwanya ishyirwa ry’abana mu gisirikare

  • Imvaho Nshya
  • Gicurasi 24, 2022
  • Hashize imyaka 2
Image

Minisitiri w’Ububanyi n’Amahanga n’Iterambere Mpuzamahanga wa Canada, Harjit S. Sajjan yashimiye uruhare rw’u Rwanda mu kurwanya ishyirwa ry’abana mu gisirikare, anashimangira ko kuri ubu ruri ku rwego ruhanitse mu rugamba rwo guhagarika ibyo bikorwa

Minisitiri S. Sajjan yabitangarije i Kigali mu biganiro yagiranye n’inzego zishinzwe umutekano mu Rwanda ku wa Mbere taliki ya 23 Gicurasi

U Rwanda ni cyo gihugu cya mbere muri Afurika cyashyize umukono ku masezerano mpuzamahanga yiswe Vancouver Principles atanga umurongo ngenderwaho ku gusubiza uburenganzira abana baba barabuvukijwe mu gihe cy’intambara bakoreshwa imirimo y’igisirikare.

Mu gushyira mu bikorwa aya masezerano, Ikigo cyitiriwe Dallaire cyita ku Bana, Amahoro n’Umutekano (Dallaire Instutute) gifatanya n’inzego z’umutekano z’u Rwanda mu guhugura abasirikare n’abapolisi bagiye mu butumwa bw’amahoro hirya no hino ku Isi.

Umuvugizi w’ingabo z’u Rwanda, Col. Ronald Rwivanga avuga ko gukorana n’iki kigo byafashije inzego z’umutekano mu Rwanda kuzuza imwe mu nshingano z’ingenzi zirimo kurinda abasivile hirya no hino ku Isi.

Ati: “Amasezerano ya Daillaire Instutute na Minisiteri y’Ingabo mu Rwanda ajyanye no kurinda abana mu bihe by’intambara no gukuraho ikoreshwa ry’abana mu ntambara ni intwaro ikomeye yo gufasha mu ishyirwa mu bikorwa ry’amasezerano yiswe Vancouver Principles, kandi aya masezerano yuzuzanya n’amasezerano ya Kigali ajyanye no kurinda abasivili. Nka RDF intego ya mbere aho dukorera hose ni ukurinda abasivili, rero Dallaire Instutute idufasha mu kutwongerera ubunararibonye muri uru rugamba rwo kurwanya ishyirwa mu gisirikare ry’abana ahari ibibazo by’intambara haba kuri uyu mugabane no ku Isi yose muri rusange.”

Minisitiri w’Ububanyi n’Amahanga n’Iterambere wa Canada Harjit S.Sajjan, uri mu ruzinduko mu Rwanda, agaragaza ko kurinda abana kujyanwa ku mirongo y’urugamba no kugabanya ibyago bibageraho mu bihe by’intambara byakagombye kuba inshingano ya buri gihugu kandi u Rwanda rwerekanye urugero rwiza.

“Ni inshingano za buri gihugu, nkamwe mwarabikoze kandi byarakunze, rero ni ah’izindi leta kubikora no kubishyiramo ubushobozi bw’amafaranga kuko mwashoboje imiryango kwakira no kurera abana bari bisanze mu bikorwa bya gisirikare, ndabivugira ko biba ari agahinda gakabije kubona ahandi haboneka abana bakurwa mu bikorwa nk’ibyo bakongera bakabishyirwamo cyangwa bakabyisangamo, rero aha naho ni ho hazamo n’inshingano z’ibigo nka Dallaire Instutute gushyiraho gahunda zifatika no kuzikurikirana kugira ngo bamenye ko nubwo bushobozi batanga bujya koko aho bukenewe.”

Umuyobozi mukuru w’ikigo mpuzamahanga cya Dallaire instutute, Dr. Shelly Whitman avuga ko kuba u Rwanda rwarashyize imbere ihame ry’uburinganire mu nzego z’umutekano ari imwe mu ntwaro nziza iganisha ku gukumira ibibi abana bahura nabyo mu bihe by’intambara.

Dallaire Instutute imaze imyaka 10 ikorana n’u Rwanda kuri icyicaro cyayo gikuru muri Afurika kikaba kiri i Kigali.

Ni ikigo cyitiriwe Gen.Romeo Dallaire uyu akaba yari Umuyozi w’Ingabo z’Umuryango w’Abibumbye zari mu butumwa bw’amahoro mu Rwanda (MINUAR) mbere no mu gihe cya Jenoside yakorewe Abatutsi.

RBA

  • Imvaho Nshya
  • Gicurasi 24, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE