CAN 2023: Côte d’Ivoire yasezerewe inyagiwe, Nigeria ibona itike ya 1/8

  • SHEMA IVAN
  • Mutarama 23, 2024
  • Hashize amezi 4
Image

Cote D’Ivoire yakiriye igikombe cy’Afurika CAN 2023 inyagiwe na Guinea Equatoriale ibitego 4-0, isezererwa itarenze amatsinda mu gihe Nigeria yihagazeho itsinda Guinea Bisasau igitego 1-0 ibona itike ya 1/8.

Imikino yose yo mu itsinda A yabereye rimwe kuri uyu wa Mbere 22 Mutarama 2024, ku bibuga byose byo mu mujyi wa Abidjan birimo Stade Olympique Alassane Ouattara d’Ebimpé na Stade Félix Houphouët-Boigny.

Umukino wa Côte d’Ivoire wo watangiye uri hejuru kuko iyi kipe yifuzaga amanota atatu ku buryo bukomeye, yirinda kuviramo mu matsinda kandi yakiniraga imbere y’abakunzi bayo.

Cote D’Ivoire yasatiraga cyane yagerageje uburyo bw’igitego inshuro enye mu minota 15, byasabaga Guinée Equatoriale kwirinda amakosa yatuma itakaza amanota ikisanga ibuze itike ya ⅛.

Ku munota wa 29 Côte d’Ivoire yahushije igitego cyabazwe ubwo Kouame Christian yashakaga gutsinda igitego ariko arekera umupira Nicolas Pepe washatse gucenga Umunyezamu wa Guinée Equatoriale, Jesus Owono ariko birangira awumwambuye.

Mu gihe abafana ba Côte d’Ivoire bari bamaze gufata umurego bacecekeshejwe na Emilio Nsue watsinze igitego ku munota wa 42 ku mupira yaherejwe na Carlos Akapo.

Mu minota itanu y’inyongera byasabye uwa kabiri gusa kugira ngo Ibrahim Sangare we ayishyure ariko umusifuzi Mahmood Ismail avuga ko yahawe umupira yaraririye, ari nako igice cya mbere cyarangiye. Igice cya mbere cyarangiye Guinea Bisasau itsinze Cote D’Ivoire igitego 1-0.

Christian Kouame yongeye guhusha igitego ku munota wa 58 ateye ishoti rikomeye umunyezamu Jesus Owono awukuramo awusubiza mu kibuga yongera kwerekana ubuhanga bwe.

Muri iyi minota Guinée Equatoriale yasubiye inyuma ijya kugarira kuko yasatirwaga cyane binyuze ku ruhande rwa Oumar Diakite wa Côte d’Ivoire wakiniraga iburyo.

Jean-Philippe Krasso winjiye asimbura yahise atsinda igitego ku munota wa 67 aherejwe umupira na Seko Fofana ariko umusifuzi asuzuma VAR asanga yabanje kurarira.

Guinée Equatoriale yari yasatiriwe cyane yagize amahirwe ibona Coup-frank yatewe na Pablo Ganet warebye neza uko umunyezamu Fofana ahagaze mu izamu amutsinda icya kabiri ku munota wa 73.

Nyuma y’indi minota itatu, Côte d’Ivoire yamanutse yose ijya gushaka uko yishyura ariko Machin Jose abiba umugono azamukana umupira asanga mugenzi we Emilio Nsue amuhereza umupira wavuyemo icya gatatu.

Igitego cya kane muri uyu mukino cyagiyemo mu mpera z’umukino ku munota wa 88 gitsinzwe na Jannick Buyla.

Umukino warangiye Guinea Bisasau inyagiye Cote D’Ivoire yakiriye irushanwa ibitego 4-0. Iyisezerera itarenze amatsinda. Mu wundi mukino Nigeria yatsinze Guinea Bisasau igitego 1-0 ku mupira Opa Sangante yageragezaga gukiza izamu wari woherejwe mu rubuga rw’amahina na Simon Moses ariko uyu myugariro awishyirira mu izamu.

Guinée Equatoriale yakomeje iyoboye Itsinda A n’amanota arindwi ndetse inazigamye ibitego bitandatu ari nayo imaze kwinjiza byinshi muri iri rushanwa kugeza ubu. Nigeria yabaye iya kabiri mu itsinda mu gihe Guinée-Bissau yatashye nta nota na rimwe ibonye.

  • SHEMA IVAN
  • Mutarama 23, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE