CAN 2023: Bigoranye Cameroun yabonye itike ya 1/8

  • SHEMA IVAN
  • Mutarama 24, 2024
  • Hashize amezi 4
Image

Cameroun yihagazeho ku mukino wa gatatu mu Itsinda C ibona itike yo gukomeza muri kimwe cya munani (⅛) itsinze Gambia ibitego 3-2  ku mahirwe Sénégal itsinda Guinea Equatorial ibitego 2-0.

Imikino yombi yabaye ku mugoroba wo kuri uyu wa Kabiri, tariki ya 23 Mutarama 2024, ku bibuga bibiri bya Sitade yitiriwe Charles Konan Banny na Stade de la Paix de Bouake.

Cameroun yatangiranye imbaraga umukino wayo kuko yifuzaga amanota yayifasha nibura kuzamuka mu makipe ya gatatu ariko yaratsinzwe neza bitewe n’ibyavuye mu mukino wa Sénégal na Guinea.

Ku munota wa gatanu gusa, Cameroun yari igeze imbere y’izamu bwa mbere ariko Frank Magri apfusha ubusa umupira yari ahawe ari mu rubuga rw’amahina atera agashoti koroheje kahise gafatwa n’umunyezamu wa Gambia, Baboucarr Gaye.

Gambia yabonye uburyo ku munota wa 23 ubwo Yankuba Minteh yageragezaga gushyira mu izamu umupira wari uvuye muri koruneri ariko umunyezamu arawumutanga arawukomeza.

Igice cya mbere cy’umukino cyarangiye nta n’imwe ibashije kureba mu izamu.

Icya kabiri cyatangiranye imbaraga ku ruhande rwa Cameroun yakambitse mu kibuga cya Gambia ariko kumena urukuta rw’ubwugarizi ngo ijye mu rubuga rw’amahina bikagorana.

Karl Toko Ekambi yabonaga amahirwe make ntayabyaze umusaruro ariko yikosora ku munota wa 56 atsinda igitego ku mupira yaherejwe na Georges-Kévin N’Koudou.

Iki gitego cyabaye nk’igikora mu jisho Gambia, ihita iva inyuma ijya gushaka uko yishyura, ibigeraho nyuma y’iminota 17 mu gitego cyatsinzwe na Ablie Jallow.

Gambia ntiyavuye imbere y’izamu kuko yari yamaze kubona icyuho mu bwugarizi bwa Cameroun ibubonamo ikindi gitego ku munota wa 85 gishyizwemo na Assan Ceesay.

Mu gihe bari bacyishimira iki gitego hashize iminota ibiri gusa James Gomes yatsinze igitego cyo kwishyura gisubiza Cameroun yari imaze kwiheba mu mukino.

Si ukuwusubiramo gusa kuko yabonye icy’intsinzi ku munota wa mbere w’inyongera muri icyenda yashyizweho cyinjijwe na Christopher Wooh aherejwe umupira na N’Koudou.

Muhamed Sanneh yishyuriye Gambia ariko akoresheje ukuboko, umusifuzi areba kuri VAR aracyanga ndetse anamuha ikarita y’umuhondo.

Umukino warangiye Cameroun itsinze ibitego 3-2, igira amanota ane yatumye irusha Guinea binganya ariko ikayirusha igitego kimwe izigamye.

Guinea yatsinzwe na Les Lion de la Teranga ibitego 2-0 byinjijwe na Abdoulaye Seck na Iliman Ndiaye.

Sénégal yatsinze imikino yose irenga amatsida ya CAN 2023
  • SHEMA IVAN
  • Mutarama 24, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE