CAN 2023: Algerie yabujije Burkina Faso kubona itike ya ⅛

Igitego cyo mu minota y’inyongera cya Baghdad Bounedjah cyabujije Ikipe y’Igihugu ya Burikina Faso yakinnye neza iminota 90 y’umukino kubona tike yo gukomeza muri ⅛ cy’Igikombe cy’Afurika.

Hari mu mukino wa kabiri mu Itsinda D wabaye kuri uyu wa Gatandatu, tariki 20 Mutarama 2024.

Wari umukino watangiye bigaragara ko Algeria ari yo yawinjiyemo mbere kuko ku munota wa gatanu gusa, Riyad Mahrez yari yamaze kugera imbere y’izamu ndetse yanaremye uburyo bukomeye ku ishoti yateye ryaciye hejuru.

Muri iyi minota kandi iyi kipe yongeye kubona ubundi buryo ku mupira Sofiane Feghouli yohereje imbere y’izamu ryari ririnzwe na Hervé Kouakou Koffi ariko ba myugariro be bawukuraho hakiri kare.

Iminota 45 y’igice cya mbere, yarangiye nta kipe irabasha kuboneza mu izamu ariko muri ine yongeweho Burkina Faso ibonamo igitego cyinjijwe na Mohamed Konate, cyemezwa n’umusifuzi w’uyu mukino Abongile Tom amaze kureba kuri VAR niba nta kurarira kwabayemo.

Mu gice cya kabiri Algeria yifuzaga kwishyura yatangiye isatira cyane izamu rya Burkina Faso maze ku munota 51 ibona icyo kwishyura cyatsizwe na rutahizamu Baghdad Bounedjah.

Ku munota wa 70, Bertrand Traoré yatsinze igitego cya kabiri cya Burukina Faso kuri penaliti yatewe biturutse ku ikosa yakorewe mu rubuga rw’amahina ariko ikemezwa nyuma yo kwitabaza amashusho ya VAR. Kuva icyo gihe umukino wabonetsemo amakosa menshi byatumye iminota 90 irangira, umusifuzi wa kane yemeza kongeraho indi icyenda.

Iyi minota yihariwe na Algerie yari yamaze kumenya ko amahirwe yo gukomeza muri ⅛ ari kuyoyoka, yiyongerera icyizere hasigaye itanu ishyiramo ikindi gitego itabarwa na Baghdad Bounedjah witwaye neza kuri uyu munsi.

Burkina Faso yakomeje kuyobora Itsinda D n’amanota ane, ikurikirwa na Algerie ifite abiri mu gihe Angola na Mauritanie zitarakina umukino wa kabiri.