CAN 2023: Afurika y’Epfo yasezereye Cap-Vert ibona itike ya  ½

  • SHEMA IVAN
  • Gashyantare 4, 2024
  • Hashize amezi 4
Image

Ikipe y’igihugu y’Afurika y’Epfo “Bafana Bafana” yatsinze Cap-Vert penaliti 2-1 nyuma yo kunganya ubusa ku busa mu minota 120, ibona itike ya ½ mu gikombe cy’Afurika.

Uyu mukino usoza iya ¼ wabaye mu ijoro ryo ku wa Gatandatu, tariki 3 Gashyantare 2023.

Ni umukino utari ushamaje cyane mu minota 90, cyane ko amakipe yombi wabonaga ajya kunganya imbaraga.

Iminota isanzwe y’umukino yarangiye amakipe yombi anganya ubusa ku busa, hashyirwaho 30 yinyongera.

Muri iyi minota, umukino wahinduye isura by’umwihariko ku ruhande rwa Cap-Vert yahushaga ibitego byinshi.

Ku munota wa 98, iyi kipe yazamutse neza, Gilson Tavares acomekerwa umupira mwiza ateye ishoti Umunyezamu Ronwen Williams akora ku mupira ukubita umutambiko w’izamu.

Tavares yakomeje guhusha uburyo bw’ibitego bukomeye, mu gihe Afurika y’Epfo yari yasubiye inyuma kurinda izamu.

Umukino warangiye amakipe yombi akomeje kunganya ubusa ku busa, hitabazwa penaliti.

Muri iki gice ni ho Umunyezamu w’Afurika y’Epfo, Ronwen Williams, yigaragarije ari na ko yandika amateka.

Ikipe y’Igihugu ya Cap-Vert ni yo yateye penaliti ya mbere yahushijwe na Bebé, ku mupira yateye Umunyezamu awukuramo.

Aaron Mokoena yahise atsinda penaliti ya Afurika y’Epfo. Ni mu gihe Willy Semedo na Laros Duarte bahushije izakurikiye za Cap-Vert na bo baziteye mu biganza by’Umunyezamu Williams.

Icyizere cya Cap-Vert cyari gisigaye ku Munyezamu Vozinha wasabwaga gukuramo penaliti kugira ngo agarure ikipe mu mukino.

Vozihna yabigezeho, akuyemo penaliti imwe indi ijya hejuru. Icyo gihe amakipe yombi yanganyaga penaliti imwe ku yindi.

Bryan Silva yakurikiyeho atsinda penaliti ya mbere muri enye Cap-Vert yari imaze gutera. Yakurikiwe na Mothobi Mvala na we wayitsinze ku rundi ruhande.

Cap-Vert yasabwaga gutera penaliti yanyuma kugira ngo ikomeze igire icyizere ariko ntibyayikundiye kuko Patrick Andrade yahushije iya gatanu.

Afurika y’Epfo yahise itsinda umukino itiriwe itera penaliti ya nyuma, isezerera Cap-Vert kuri penaliti 2-1.

Iyi kipe yahise ibona itike ya ½ yaherukaga mu 2000. Muri iki cyiciro, Afurika y’Epfo izakina na Nigeria tariki 7 Gashyantare 2024 saa Moya z’umugoroba.

Undi mukino wa ½ uzahuza Repubulika Iharanira Demokarasi ya Congo na Côte d’Ivoire tariki 7 Gashyantare 2024 saa nyine zijoro.

  • SHEMA IVAN
  • Gashyantare 4, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE