Byinshi kuri Eric W. Kneedler, Ambasaderi wa USA mu Rwanda

  • NTAWITONDA JEAN CLAUDE
  • Kanama 20, 2023
  • Hashize amezi 9
Image

Eric W. Kneedler akomeje kugaragaza ubushake n’imbaraga mu kurushaho gutsura umubano wa Leta Zunze Ubumwe z’Amerika (USA) n’u Rwanda, nyuma y’igihe kirenga umwaka asimbuye Peter H. Vrooman wari umaze kuba inshuti ikomeye y’u Rwanda n’Abanyarwanda. 

Ku munsi w’ejo, Amb. Eric Kneedler yahuye  n’Ambasaderi w’u Rwanda muri Leta Zunze Ubumwe z’Amerika Mathilde Mukantabana, bagirana ibiganiro byibanze ku ngingo zirebana no kurushaho kunoza ubutwererane bw’ibihugu byombi mu nzego bihurijeho inyungu. 

Banarebeye hamwe inzira zo gukomeza kongerera imbaraga umubano uzira amakemwa ukomeje gutera imbere hagati y’ibihugu byombi. 

Amb. Mukantabana yagaragaje ko yishimiye guhura na mugenzi we Amb. Eric Kneedler, bakagirana ibiganiro byibanze ku nyungu ibihugu byombi bihuriyeho no kurushaho kunoza uwo mubano. 

Amb. Eric Kneedler yitezweho kurushaho gushimangira umubano ibihugu byombi bisanzwe bifitanye mu nzego zirimo kubungabunga amahoro, kwita ku buzima na serivisi z’ubuvuzi, umutekano mpuzamahanga w’ibiribwa n’ingufu, ubucuruzi n’ishoramari, kurwanya iterabwoba no guhangana n’imihindagurikire y’ikirere.

Ku wa 3 Kanama 2022 ni bwo Perezida wa USA Joe Biden yatangaje Amb. Kneedler nk’Ambasaderi w’icyo gihugu mu Rwanda, ariko uko gushyirwa mu mwanya ntikwakorwaho na Kongere y’Amerika mu gihe kugeza ku ya 3 Mutarama 2023 ubwo icyo cyemezo cyasubiraga kwa Perezida. 

Ku munsi wakurikiyeho, Perezida Biden yongeye kwemeza Kneedler nk’ugomba guhagararira inyungu z’Igihugu cye mu Rwanda.

Komisiyo ya Sena ishinzwe Ubutwererane Mpuzamahanga yaganiriye kuri icyo cyemezo taliki ya 1 Werurwe 2023, maze na yo itangaza uwanzuro wo kumwemeza ku ya 27 Mata 2023. 

Kuri uwo munsi ni na bwo Amb. Kneedler yaje kwemezwa burundu na Sena ya Leta Zunze Ubumwe z’Amerika mu buryo bw’amajwi.

Amb. Eric Kneedler afite ubunararibonye buhambaye mu birebana n’ububanyi n’amahanga kuko ari umwe mu bakozi bo ku rwego rwo hejuru mu butwererane mpuzamahanga bw’Amerika. 

Yabaye Ambasaderi wungirije muri Ambasade y’Amerika i Nairobi muri Kenya, ndetse muri icyo gihugu yanabayemo uhagarariye inyungu za USA (Chargé d’Affaires) hagati y’umwaka wa 2021 na 2022.  

Mbere y’aho, Amb. Kneedler yabaye Umujyanama mu bya Politiki muri Ambasade y’Amerika i Nairobi ndetse yarabanje gukora izo nshingano muri Ambasade ya USA i Manila muri Philipines. 

Yanabaye Umujyanama wungirije mu bya Politiki muri Ambasade ya USA i Bangkok muri Thailand, aba umukozi ushinzwe ibya Politiki muri Ambasade ya USA i Jakarta muri Indonesia. 

Mu nshingano zose yakoze, yagaragaje ubushobozi buhambaye bwo kuyobora bikaba bijyana n’uko amaze imyaka irenga 20 mu nshingano nk’Umudipolomate. 

Guverinoma ya USA ivuga ko ubwo bushobozi buri mu byatumye atoranywa nk’Ambasaderi mushya wa USA mu Rwanda, kuko yujuje ibisabwa byose mu guhuza ibihugu byombi no guharanira ko birushaho kwagura imikoranire ishingiye ku bwumvikane n’ubwubahane. 

Mu bindi bikorwa yakoze, harimo kuba yarabaye Umuyobozi ushinzwe Abakozi mu Ishami rishinzwe Ubutwererane n’ibihugu by’i Burayi, yakoze mu Ishami rishinzwe gukurikirana abanyabyaha ndetse akora n’izindi nshingano zinyuranye muri z’Ambasade z’Amerika i Port Louis muri Mauritius no muri Hong Kong. 

Afite impamyabumenyi y’icyiciro cya kabiri (Bachelor) yakuye muri Kaminuza ya Pomona n’iy’icyiciro cya gatatu (Master’s Degree) yakuye mu Ishuri ryigisha ubumenyi mpuzamahanga ryitiriwe Johns Hopkins.

Yakiriye ibihembo byinshi bya Guverinoma ya Leta Zunze Ubumwe z’Amerika kubera imikorere ye izira amakemwa, akaba azi kuvuga indimi z’amahanga zirimo Thai rukoreshwa muri Thailand, Indonesian, Igifaransa, Cantonese ndetse n’Igitaliyani, ziyongera ku Cyongereza cya kavukire. 

  • NTAWITONDA JEAN CLAUDE
  • Kanama 20, 2023
  • Hashize amezi 9
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE