Buri kwezi hatangwa indangamuntu 50 000 -MINALOC

  • Imvaho Nshya
  • Ugushyingo 10, 2023
  • Hashize amezi 6
Image

Minisitiri w’Ubutegetsi bw’Igihugu Jean Claude Musabyimana ubwo yari mu Nteko Ishinga Amategeko yatangaje ko nibura buri kwezi hatangwa indangamuntu 50 000.

 Yabitangarije Abadepite ku wa Kane tariki 9 Ugushyingo 2023, asobanura uko inzego zikemura ibibazo bifitanye isano n’itangwa ry’Ikarita Ndangamuntu;  itangwa hagendewe ku Itegeko n° 029/2023 rigenga iyandikwa ry’abaturage muri Sisitemu y’Igihugu y’Indangamuntu koranabuhanga.

Ati: “Kugeza ubu hamaze gutangwa indangamuntu miliyoni 8, kandi buri kwezi hatangwa nibura indangamuntu ibihumbi 50″.

Minisitiri Musabyimana yavuze ko Leta yoroheje uburyo bwo gufata indangamuntu, guhera mu kwifotoza  kugeza ku gufata  indangamuntu bikorerwa ku Mirenge.

Yagize ati: “Mu Mirenge harimo imashini zifotora 248 zingana na 59.3%; zigenda zongerwa uko amikoro abonetse”.

Minisitiri w’Ubutegetsi bw’Igihugu Musabyimana Jean Claude

Yongeyeho kandi ko ari ukwifotoza kimwe no gushyikira indangamuntu bikorerwa ku Murenge ndetse abaturage bamenyeshwa umunsi buri Murenge ufotorera.

Ikibazo cyagarutsweho kandi ni abantu usanga  baba bagejeje igihe cyo kwifotoza batitabira, hakaba hazakomeza gukorwa ubukangurambaga.

Ati: “Nyuma y’uko bigaragaye ko hari abaturage bagera ku bihumbi 65 baba batarifotoje kandi bagejeje igihe, hakorwa ubukangurambaga kandi Imirenge ifite imashini yahawe umuhigo wo gufotora nibura inshuro 4 mu kwezi bagafotora abantu nibura 100 mu gihembwe”.

Icyo kibazo hukunze guterwa n’ababyeyi batandikisha abana babo muri serivisi z’irangamimerere.

Yagize ati: “Abenshi bagira ibibazo by’indangamuntu ni ababa batarandikishijwe bakiri bato ngo imyirondoro yabo ibe izwi mbere y’uko bagera igihe cyo kwifotoza, bityo rero tuzakomeza kwigisha no gushishikariza abaturarwanda kwandikisha abana mu gitabo cy’irangamimerere ku gihe”.

Minisitiri w’Ubutegetsi bw’Igihugu yavuze ko Itegeko rishya rijyanye no gutunga Smart ID  rizafasha cyane gukemura ibibazo biri mu gutunga indangamuntu.

NYIRANEZA JUDITH

  • Imvaho Nshya
  • Ugushyingo 10, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE