Burera: Hari insoresore ziswe Abakaceri bambura abaturage

  • NGABOYABAHIZI PROTAIS
  • Ukuboza 28, 2023
  • Hashize amezi 5
Image

Bamwe mu baturage bakorera n’abatuye muri santere y’ubucuruzi ya Rugarama bavuga ko babangamiwe n’insoresore zizwi ku izina ry’Abakaceri, aba bakaba bambura abantu ku manywa y’ihangu no mu ruhame.

Mulindabigwi Jean Baptiste ni umwe mu bakorera ubucuruzi mu isoko rya Rugarama avuga ko Abakaceri basa n’abatagitinya ubuyobozi.

Yagize ati: “Hano muri iyi santere ya Rugarama ubona n’iri soko dukoreramo, harimo insoresore z’Abakaceri ni bo bafunga kaci ku manywa na nijoro, twaratakambye ubuyobozi buri munsi bwiyama izi nsoresore ariko zanze kuva ku izima, tekereza kwambura umuntu ku manywa wavuga agakuramo icyuma akakigutera”.  

Yongeyeho ati: “Hari umugore baje kwiba hano mu bicuruzwa bye avuze bamutera icyuma ubu yagiye kwivuza kandi ntawe uzamuha indishyi z’akababaro, twifuza ko ubuyobozi bwaza kudusura hano tukabaha amakuru”.

Mukamanzi Marita nawe avuga ko insoresore zo muri kariya gace rimwe na rimwe ngo ziba zanyoye ibiyobyabwenge ngo kuko nta kuntu umuntu yakwambura mugenzi we mu ruhame ngo uvuge ngo ni muzima

Yagize ati: “Ubundi Abakaceri babanje kujya biba nijoro uwo bahuye nawe bakamuta ku wa kajwiga bakamucuza utwe, ariko noneho no kumanywa barakwambura, njye mbona baba basinze abandi banyoye itabi, abandi rero birirwa bakina urusimbi, tekereza nka twe dutandika hasi baraza bakiterurira ibicuruzwa ureba rwose ukabura icyo uvuga kuko n’izi nzego ubona ngo ni irondo ryo kumanywa ntibajya batinyuka ziriya nsoresore kuko na bo bajya babategera mu mayira bakabahondagura”.

Kuba izi nsoresore zarayogoje abaturage, Ubuyobozi bw’Akarere ka Burera buvuga ko iki kibazo bukizi ndetse bwagifatiye ingamba nk’uko Umuyobozi w’Akarere ka Burera wungirije Ushinzwe imibereho myiza y’Abaturage  Mwanangu Theophile yabitangaje.

Mwanangu Theophile

Yagize ati: “Ni byo koko ikibazo cy’insoresore zihungabanya umutekano muri Santere y’ubucuruzi ya Rugarama ndetse no muri iryo soko turakizi ku buryo hari n’abagenda bafatwa bakoherezwa mu bigo ngororamuco, abandi tukabaganiriza, ubu rero niba hari abandi noneho barimo gukora ubwambuzi mu baturage tugiye kumanuka tubaganirize, ndetse nkaba nsaba n’abaturage kuzadutungira agatoki abo bose babangamiye umutekano”.

Abakaceri ngo mu gihe cya nimugoroba bikinga mu nguni z’inzu ahantu hatabona, ariko nanone ngo ntibakigira isoni no ku manywa barambura, bamwe bagatinya gutabara bagenzi babo, ibintu bifuza ko inzego zibikurikirana, izi nsoresore zigahanwa by’intangarugero.

Mulindabigwi Jean Baptiste
  • NGABOYABAHIZI PROTAIS
  • Ukuboza 28, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE