Burera: Gukoresha ifumbire ikomoka ku bwiherero basanze bibaganisha ku rupfu

  • NGABOYABAHIZI PROTAIS
  • Mutarama 25, 2024
  • Hashize ibyumweru 4
Image

Bamwe mu baturage bo mu Karere ka Burera bavuga ko nyuma yo kumva ko ifumbire yo mu bwiherero igira ingaruka ku buzima bwa muntu bitewe na mikorobe zinyuranye zibamo bahisemo kuzibukira gukoresha iyi fumbire.

Abo baturage bavuga ko ngo bataramenya ko gukoresha ifumbire yo mu bwiherero itera ibibazo ku buzima bahoraga barwaye inzoka batazi aho zikomoka nk’uko Ayabavandimwe Felicien yabibwiye Imvaho Nshya.

Yagize ati: “Ifumbire yo mu bwiherero mu minsi yashize twarayikoresheje rwose umusaruro uraboneka ariko nyuma yo kumva ko ari ikibazo gikomeye ku buzima twahisemo kuyizibukira kuko batubwiye ko ubushakashatsi bwasanze inzoka zirimo zimara imyaka 5, urumva rero iyo tuyikoresheje abana bacu bakambakamba mu mirima bagatahana izo nzoka, natwe abagabo twahoraga dufite inda zibyimbye ukibwira ko ari ukubaho neza kandi ari inzoka.”

Ayabavandimwe akomeza avuga ko bafashe ingamba zo gukoresha ifumbire yo mu biraro ndetse no mu ngarani, ariko kandi ngo iyi fumbire kubera kuyikoresha batazi ingaruka zayo byakururaga amakimbirane mu miryango.

Yagize ati: “Twahoraga turwaye inzoka abagabo barambyimbye inda imisatsi yaracuramye kubera ko nyine birirwaga bayora iyo misarane bavidura, bavamo bakajya gushaka waragi ngo irafasha ibifu byabo gukora bagakomeza gutyo bakangiza imyijima yabo batazi ibyo barwaye abandi bakitwaza ko bashobora kuba bararozwe nyamara ari inzoka zatumye inda zabo zibyimba kubera inzoka bakitwaza ko barozwe urushwima, nyamara aho tuviriye muri iriya myanda twagize ubuzima bwiza”.

Uzamukunda Beatrice wo mu Murenge wa Cyanika, Akagari ka Kamanyana we avuga ko nta kongera kwishora muri iriya fumbire nanone nyuma yo kumenya ko byabatezaga inzoka  bakaba barazisakazaga mu mirima yabo.

Yagize ati: “Tekereza kuba wowe ubwawe ukora ubuhumbikiro bw’inzoka, ugateza umusarane imyaka […..] izo nzoka barazitahana, mu gihe babihata zijya kubikoresho byabo kuko amagi yazo batubwiye ko amara imyaka isaga 5, twarazibukiriye ni ukuri iyo fumbire nigende aho gukomeza gukinisha urupfu.”

Umukozi w’Ikigo cy’Igihugu gishinzwe Ubuzima mu Rwanda (RBC), ishami rishinzwe guhuza ibikorwa bya NTD-WASH, Nathan Hitiyaremye nawe ashimangira ko gukoresha umusarane ufumbira imirima ari ikibazo gikwiye kurebanwa ubushishozi mu rwego rwo kwirinda uburwayi bukomoka ku isuku nkeya iganisha ku burwayi bunyuranye harimo n’inzoka abahinzi bakomeza gukwirakwiza mu mirima yabo.

Yagize ati: “Twishimira ko uyu Murenge wa Cyanika wagabanyije umuvuduko wo gukoresha ifumbire yo mu musarane, kubera byagaragaye ko gukoresha ifumbire yo mu musarane bikururira akaga umuntu uyikoresha, kandi byagaragaye ko Uturere dukoresha ifumbire yo mu musarane ari two dufite abaturage benshi barwaye inzoka zo mu nda, no muri aka Karere rero byaragaragaye ko abaturage barwara inzoka kubera kuzikwirakwiza mu mirima yabo binyuze muri buriya buryo bw’ifumbire yo mu musarane”.

Hitiyaremye akomeza asaba abaturage gukomeza kwirinda inzoka bita asikarisi kimwe n’izindi nka ankirositome, birariziyoze n’izindi birinda bakoresha ifumbire y’amatungo iyo mu ngarani, ndetse aboneraho no gusaba za gereza zikoresha iyi fumbire kwitwararika kuko inzoka zo mu musarani ntabwo zishobora gupfa mbere y’imyaka 5, kandi inzoka ngo ni kimwe mu bizahaza bamwe mu banyarwanda.

Raporo y’Ikigo cy’Igihugu gishinzwe Ubuzima yakozwe mu mwaka wa 2023 igaragaza ko muri aka karere umurenge wa Rugengabari ni wo uza ku mwanya wa mbere mu baturage bagendana inzoka zo mu nda kandi bazirwaye ku kigereranyo cya 27% kubera gukoresha amazi yo mu kiyaga cya Burera.

  • NGABOYABAHIZI PROTAIS
  • Mutarama 25, 2024
  • Hashize ibyumweru 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE