Burera: Abasoje itorero Isonga boroje inka imiryango itanu

  • NGABOYABAHIZI PROTAIS
  • Ukuboza 2, 2023
  • Hashize amezi 3
Image

Abanyamabanga Nshingwabikorwa b’Uturere n’Imirenge yose yo mu Ntara n’Umujyi wa Kigali, basoje itorero rifite izina ry’ubutore Isonga, boroje imiryango itanu, bagamije kuyikura mu bukene maze na yo yiyemeza kuzabyaza umusaruro inka bahawe.

Nshimiyimana Dieudonne wo mu Murenge wa Kinoni mu Karere ka Burera ni umwe mu borojwe yavuze ko inka ahawe kuri we ari uruganda rukomeye, akaba anashimira Perezida wa Repubulika.

Yagize ati: “Iyi nka mpawe ndayishimiye cyane, ije kumbera umutabazi ukomeye nabonaga ifumbire ari uko mbanje kujya kwahira ubwatsi ngo mbushyire mu kiraro cy’umuturanyi ngo inka ikandagiremo mbone uko njya guteza imyaka cyangwa se ubundi nkajya kugura ifumbire mu baturanyi na bwo bakampenda.

Habaga n’ubwo najyaga kuyora amase mu nzira aho nabonaga abashumba baragiye ku muhanda nimugoroba nkajya mvangamo ivu ryo mu ziko, ubu rwose ndumva nsubijwe iyi nka izampa ifumbire, amafaranga n’amata, uru ni uruganda Kagame ampaye, iwanjye nzayikuraho byinshi”.

Nshimiyimana akomeza avuga ko ashimira Perezida Kagame kuba yaratoje Abanyarwanda kwishakamo ibisubizo kugeza ubwo abayobozi boroza abaturage

Yagize ati: “Hari urugero rwiza Kagame yahaye Abanyarwanda aho buri wese agomba gusindagiza mugenzi we  amuzamura mu iterambere, ni byo rero aba Banyamabanga Nshingwabikorwa bakoze, izi nka baziguriye Abanyarwanda batuye muri Burera, kandi nta mutima mubi bafite ngo ngaha izi nka ziba zagiye mu Turere twabo, gahunda ya Ndi Umunyarwanda gusa ni yo bagendeyeho batugurira izi nka , ikindi ni uko bari kubakira mugenzi wacu udafite aho aba ni igikorwa cyiza batojwe n’Intore izirusha intambwe”.

Nizeyimana Esperence we avuga ko aruhutse kujya abungana akajerekani ka litiro agiye gukamisha

Yagize ati: “Igihugu ni umubyeyi koko ntabwo nari nzi ko nabona inka iwanjye, iwacu nta muntu woroye inka ariko njyewe ndayibonye nta n’igiceri na kimwe ntanze kandi noneho inka y’inzungu, ubu nduhutse kujya mbungana akajerekani njya gukamisha rimwe na rimwe nkababura, iyi nka ngiye kuyifata neza maze noze imirire mu rugo, uwabonye inka aba yasezereye ubukene, ngiye kuyifata neza rero ibyare nanjye nzoroze abandi”.

Muri uyu muhango wo gusoza Itorero Isonga, Minisitiri w’Ubutegetsi bw’Igihugu Musabyimana Jean Claude yashimiye ziriya ntore zitanze zikoroza abaturage maze asaba n’aborojwe kuzafata neza I nkaborojwe.

Yagize ati: “Muhawe inka nziza kandi za kijyambere, muzazifate neza muzibyaze umusaruro, zizabafashe kubona ifumbire, munywe amata muyahe abana banyu, kirazira ko amata muyajyana ku isoko abana ngo basigare biranga ibyansi, mujye mubanza guha abana amata kugira ngo mubarinde igwingira, ndetse n’ifumbire nayo urumva ko muyibonye hafi, murasabwa nayo kujya muyifumbiza mu mirima yanyu ndetse n’akarima k’igikoni gahore gatoshye”.

Izi ntore zatanze inka 5 ni umusanzu zakusanyije mu mafaranga asaga miliyoni 4, ariho havuyemo ayaguze izi nka n’andi azifashishwa mu kurangiza kubaka inzu y’umuturage utishoboye wo mu Murenge wa Kinoni, izi ntore zose hamwe ni 436 zasoje itorero zari zimazemo ibyumweru bibiri.

  • NGABOYABAHIZI PROTAIS
  • Ukuboza 2, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE