Burera:  Abacururiza ahadasakaye mu isoko mpuzamahanga barataka igihombo

  • NGABOYABAHIZI PROTAIS
  • Mutarama 2, 2024
  • Hashize amezi 5
Image

Abacururiza mu isoko rya Rugarama riherereye mu Karere ka Burera mu bilometero bike uvuye ku mupaka wa Uganda, bavuga ko babangamirwa no kuba isoko bubakiwe ari rito mu gihe abacuruzi bo bagenda biyongera, bigatuma bamwe bajya gucururiza hanze bagatandika hasi.

Abaricururizamo bavuga ko gucururiza hanze hadasakaye bituma ibicuruzwa byabo bikangirika, haba mu bihe by’izuba ndetse no ku mvura.

Bavuga ko ubuke bw’inyubako z’iryo soko rituma umubare munini usanga ucururiza hasi mu kibuga kubera umubare w’abarikoreramo ugenda wiyongera buri munsi, ku buryo nk’igihe imvura iguye babura aho babyugamisha bikahanyagirirwa bakabihomberamo.

Nsanzubuhoro Jean Baptiste, umwe muri abo bacuruzi, yabwiye Imvaho Nshya ko uretse mu gihe cy’imvura no mu bihe by’izuba usanga ivumbi ritumukira mu bicuruzwa byabo rikabyangiza.

Yagize ati: “Ikibazo cy’iri soko ryacu kimaze igihe, buri Muyobozi w’Akarere uje hano atwizeza ko azakemura ikibazo cyaryo akatwongerera inyubako tukareka gucururiza hanze n’aho mu byondo n’ivumbi. Ibi bidutera igihombo gikomeye kuko hari ubwo umuguzi aza agasanga icyo akeneye cyuzuye ivumbi cyangwa se icyondo ubwo agahita yigendera. Turasaba ko batwubakira isoko rya kijyambere tukava hano hasi kuko turasora natwe nka bariya bacururiza mu isoko risakaye.”

Narongo Charles we avuga ko kuba igice bakoreramo  kidasakaye ari kimwe mu bituma n’abaguzi batabageraho hakaba ubwo umuntu ataha adakoreye n’ibihumbi bitatu kandi yasoze.

Yagize ati: “Mu bihe by’imvura ari twe ari n’abaguzi dutinya imvura tukajya kwiyugamira. Urumva rero nkanjye ukorera hanze hari ubwo nshobora gutaha ntakoreye na bitatu. Mu bihe by’izuba bidusaba kwitwaza umutaka, izuba uzi ko hari ibiribwa ryangiza nk’imbuto, amavuta agashonga mbese ubu ni ikibazo kuko abacururiza hanze ntituri munsi ya magana ane”.

Umuyobozi w’Akarere ka Burera Mukamana Solina, yavuze ko ikibazo cy’iri soko rinyagiza abaguzi n’abagurisha bakizi ndetse barimo kugishakira umuti.

Yagize ati: “Isoko rya Rugarama riri mu byo tugomba kwitaho dushingiye ku buzima bw’abarikoreramo, abacuruzi ni benshi, inyubako yagenewe gucururizamo ntibahagije.

Ubu rero twabanje guhera kuri bimwe by’ibanze bigendeye ku bushobozi bw’Akarere, ubu biteganyijwe ko mu ngengo y’imari y’umwaka utaha ari bwo tuzabireba. Nkaba nasaba abaturage gukomeza kwihangana turimo gushaka ibisubizo.”

Iri soko rirema inshuro ebyiri mu cyumweru rihuza abo mu Karere ka Burera, aka Musanze ndetse n’abaturage bo muri Uganda kuko riri ku bilometero bike uvuye ku mupaka w’u Rwanda na Uganda.

  • NGABOYABAHIZI PROTAIS
  • Mutarama 2, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE