Bugesera: Ifu ya Shisha Kibondo yabafashije kurwanya igwingira

  • NTAWITONDA JEAN CLAUDE
  • Gicurasi 10, 2022
  • Hashize imyaka 2
Image

Shisha Kibondo ni ifu y’igikoma ikungahaye ku ntungamubiri zitandukanye, ituma umwana akura neza ikamurinda kugwingira ndetse n’indwara ziterwa n’imirire mibi.

Ni ifu ihabwa ababyeyi batwite n’abafite abana bakiri munsi y’imyaka ibiri bakomoka mu miryango ibarizwa mu cyiciro cya mbere n’icya kabiri cy’ubudehe hagamijwe kubafasha mu kubarinda igwingira ry’abana babo bagakura neza.

Iyi fu itangwa ku bufatanye bwa Leta y’u Rwanda ku nkunga ya Banki y’Isi. Akarere ka Bugesera ni kamwe mu Turere 13 twatangijwemo gahunda zikomatanyije harimo n’iziterwa inkunga n’umushinga SPRP kuko ari two twari dufite imibare y’abana bagwingiye iri hejuru cyane.

Ubuyobozi bw’Akarere ka Bugesera mu Ntara y’Iburasirazuba butangaza ko bwagabanyije igwingira ry’abana aho abana 179 bari barwaye indwara ziterwa n’imirire mibi bamaze gukira hakaba hasigaye abana 49 bakirwaye.

Bamwe mu babyeyi baganiriye n’Imvaho Nshya bahamya ko ifu ya Shisha Kibondo yabafashije mu guhangana n’igwingira ry’abana, ibi bikanashimangirwa n’ubuyobozi bw’Akarere ka Bugesera.

Mukansanga Jacqueline utuye mu Kagari ka Gihemba mu Murenge wa Ngeruka avuga ko afata ifu ya Shisha Kibondo ikaba imaze kumugirira akamaro kuko ngo yatangiye kuyifata atwite.

Ati: “Natangiye kuyifata nkitwite none mpetse umwana ushimishije kubera Shisha Kibondo. Ndayinywa umwana akayisanga mu mashereka kuko ntarageza igihe cyo gufata imfashabere”.

Muhawenayo Angelique, Umubyeyi utwite utuye mu Kagari ka Gihembe mu Murenge wa Ngeruka, yahamirije Imvaho Nshya ko ifu ya Shisha Kibondo yamugiriye akamaro.

Yagize ati: “Ntangira gufata ifu ya Shisha Kibondo nari mfite ibilo 60 ubu ngeze ku biro 67 kubera iyi fu”.

Nyirandagijimana Annonciata wo mu Kagari ka Murama mu Murenge wa Ngeruka, ni umubyeyi utwite Imvaho Nshya yasanze ku Kigo Nderabuzima cya Ngeruka yagiye gufata ifu ya Shisha Kibondo.

Avuga ko ifu ya Shisha Kibondo yagiye imufasha mu buryo bw’imirire kandi akabona umwana we agenda yiyongera cyane ko ngo hari igihe aba adafite ubushobozi bwo kubona ibyo asabwa byose ariko yabona iyo fu umwana akiyongera mu mikurire.

Mu buhamya bwe yagize ati: “Kubera ko nk’iyi nda nayirwaranye cyane, nakomeje kugira ikibazo ko umwana yagira ikibazo bitewe n’ubuzima nari ndimo ntunzwe n’icyo gikoma, gusa nabonye harimo impinduka”.

Mukamurigo Solantine, umukozi ushinzwe imibereho myiza y’abaturage mu Kigo Nderabuzima cya Ngeruka by’umwihariko mu kurwanya igwingira ry’abana bari munsi y’imyaka 5, asobanura ko Shisha Kibondo ari umuti w’umwana n’umubyeyi.

Abagore batwite baje gufata ifu ya Shisha Kibondo ku kigo nderabuzima cya Ngeruka bavuga ko iyi fu ibafasha mu kurwanya igwingira (Foto Kayitare J.P)

Avuga ko iyo bahuye n’ababyeyi bafite abana bafite ikibazo cy’imirire mibi, babigisha bakabereka ko ifu ya Shisha Kibondo ari umuti ku mwana ukiri mu nda.

Agaragaza ko mu gihe gishize igwingira ryari ikibazo akurikije imibare bakiraga ku Kigo Nderabuzima cya Ngeruka, akavuga ko nta bana bafite imirire mibi ikabije bacyakira.

Mu 2018 mu kwezi kwa Kanama, mu Murenge wa Ngeruka wonyine bari bafite abana 350 barwaye indwara ziterwa n’imirire mibi.

Ubuyobozi bw’Umurenge wa Ngeruka bwahamirije Imvaho Nshya ko bubarura abana 6 bagifite ikibazo cy’imirire mibi abandi bose bakaba barakize.

Icyatumye imibare y’abana bagwingiye mu Murenge wa Ngeruka igabanyuka, gukora ubukangurambaga, gushyiraho uturima tw’igikoni, ingo mbonezamikurire no gutanga ifu ya Shisha Kibondo ngo byabigizemo uruhare.

Ndayisabye Viateur, Umuyobozi w’Ishami rishinzwe ubuzima mu Karere ka Bugesera, asobanura ko hari ibikorwa bikomatanyije Akarere gakora mu kurwanya igwingira ry’abana bari munsi y’imyaka itandatu.

Bimwe mu bikorwa byifashishwa ni ugutanga ifu ya Shisha Kibondo.

Ababyeyi batwite babarirwa hagati ya 3,000 na 4,000 bahabwa ifu ya Shisha Kibondo, mu gihe abana basaga 8,000 ari bo bahabwa ifu y’igikoma ya Shisha Kibondo mu Karere ka Bugesera.

Ndayisabye yagize ati: “Iki ni igikorwa na cyo kidufasha cyane cyane mu kugabanya igwingira kuko tuba twahereye umubyeyi agisama”.

Avuga ko ifu ya Shisha Kibondo igira uruhare rukomeye mu guhangana n’igwingira ry’umwana.

Ati: “Urwanya igwingira ahera ku mwana agisamwa, iyo umubyeyi afashwe neza agahera kuri ya fu tugenda duha  ba bana bidufasha kurwanya igwingira”.

Agaragaza ko igwingira ari urugamba rurwanwa hashingiwe ku gutanga ifu ya Shisha Kibondo, gushyiraho uturima tw’igikoni, gahunda ya Girinka, kwita ku minsi 1000 ya mbere y’ubuzima bw’umubyeyi n’umwana n’ibindi.

Ubushakashatsi ku buzima n’imibereho by’abaturage (RDHS) bwakozwe n’Ikigo cy’Igihugu cy’Ibarurishamibare (NISR) mu 2015, bwagaragaje ko igwingira mu Karere ka Bugesera ryari ku kigereranyo cya 39.6%.

Ni mu gihe kandi ngo ubushakashatsi bwakozwe mu 2019-2020 bwagaragaje ko igwingira muri aka Karere riri ku kigereranyo cya 26.1%.

NISR igaragaza ko Intara y’Iburasirazuba abana bagwingiye ari 29%.

Muri rusange kugeza mu mpera za 2020, ubwo hakorwaga ubushakashatsi, abana bagwingiye mu Rwanda bari bageze kuri 33%.

Ni mu gihe Gahunda ya Guverinoma y’imyaka 7 yo kwihutisha iterambere iteganya ko mu 2024 abana bazaba bafite ikibazo cy’igwingira bazaba bageze kuri 19%.

Muhawenayo Angelique utwite, avuga ko amaze kugira ibilo 67 kubera kunywa igikoma cya Shisha Kibondo (Foto Kayitare J.P)
Umubyeyi wo mu cyiciro cya mbere n’icya kabiri ufite umwana utarengeje imyaka 2 ahabwa ifu ya Shisha Kibondo (Foto Kayitare J.P)
  • NTAWITONDA JEAN CLAUDE
  • Gicurasi 10, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE