Bugesera: Hatangijwe igihembwe cy’ ibiti haterwa 22 000

Kuri uyu wa Gatandatu tariki ya 28 Ukwakira hatangijwe igihembwe cyo gutera ibiti byahujwe n’umunsi w’umuganda usoza uku kwezi, haterwa ibiti 22 000 kuri Hegitari 35 mu Karere ka Bugesera, mu Murenge wa Gashora, mu Kagari ka Kagomasi, mu rwego rwo kubungabunga ibidukikije.

Ni igikorwa kitabiriwe na Minisitiri w’Ubutegetsi bw’Igihugu Jean Claude Musabyimana ari hamwe n’abandi bayobozi bifatanyije n’abaturage bo muri ako Karere ka Bugesera.

Abaturage bo mu Murenge wa Gashora batangaje ko ibyo biti babyitezeho byinshi birimo kubungabunga ibidukikije kandi bikazakurura imvura, cyane ko ari agace gakunze kurangwamo izuba rigateza amapfa.

U Rwanda rwizihiza igihembwe cyo gutera ibiti buri mwaka kugira ngo rwongere amashyamba, ubutaka burindwa gutwarwa n’isuri kimwe n’inkangu, kandi hubakwa ubudahangarwa ku mihindagurikire y’ibihe.

Kalisa yagize ati: “Ubundi ahangaha dukunze kugira ikibazo cy’izuba, ubwo dukomeza kujya dutera ibiti turizera ko tuzajya tubona imvura. Tuzabyitaho kugira ngo nibikurura imvura, tweze twe kuzahura n’ikibazo cy’amapfa”.

Mukamanzi we yavuze ko kuba bahawe ibiti bivangwa n’imyaka, uretse gufata ubutaka bazajya banabigaburira amatungo, bakabona ifumbire izatuma umusaruro w’ubuhinzi wiyongera.

Ati: Kuba hatewe ibiti bivangwa n’imyaka birimo ibigaburirwa amatungo bizadufasha kubona ifumbire, bityo umusaruro w’ubuhinzi uziyongera bidufashe kwikenura”.

Minisitiri w’Ubutegetsi bw’Igihugu, Jean Claude Musabyimana, yavuze ko ako gace kakunze kurangwamo izuba, ariko ubu Leta yashyizemo imbaraga mu kuhatera ibiti bikurura imvura, ku buryo ubu imvura ihaboneka bitakiri nka mbere yuko hitabwaho by’umwihariko hongerwa ibiti bihaterwa.

Yagize ati: “Aka ni Akarere kagize ibibazo bikomeye by’amapfa ku buryo hari igihe cyigeze kugera abaturage aha ngaha barimuka [….] Nyuma haje kuba imbaraga nyinshi za Leta zo gutera ibiti hirya no hino, ikibazo kiragabanyuka kubera ko ubu ngubu wabonaga ari agace kagwamo imvura kimwe n’ahandi mu gihugu”.

Basabwe kubifata neza no kubibungabunga kuko bifite akamaro kenshi harimo gukurura imvura, kuyungurura umwuka, gufata ubutaka, kugaburirwa amatungo, n’ibindi,

Muri iki gihembwe cy’ibiti, biteganyijwe ko hazaterwa ibiti miliyoni 63 nk’uko byatangajwe n’Ikigo cy’Igihugu gishinzwe amashyamba RFA.

NYIRANEZA JUDITH