Bugesera: Bakanguriwe kwisuzumisha indwara zo mu mutwe

  • NTAWITONDA JEAN CLAUDE
  • Mata 27, 2022
  • Hashize imyaka 2
Image

Mu Nteko y’abaturage yateranye kuri uyu wa Kabiri taliki ya 26 Mata 2022, mu Karere ka Bugesera, mu Murenge wa Rweru bibukijwe ko ari mu cyumweru cyahariwe ibikorwa by’ubuzima birimo gukingira, isuku n’isukura, ubwisungane mu kwivuza-MUSA, Ejo Heza, gutanga Serivise nziza mu bigo by’ubuvuzi, bakangurirwa kubyitabira.

Umuyobozi w’ikigo Nderabuzima cya Nzangwa mu Murenge wa Rweru mu Karere ka Bugesera, Drocella Masengesho yavuze ko iyo umuntu adafite ubuzima aba atariho, abakangurira kwisuzumisha no kwirinda ibitera uburwayi bwo mu mutwe.

Yagize ati: “Iyo udafite ubuzima ntabwo uba iriho”.

Yakomeje asobanura ko ari gahunda y’ubukangurambaga bw’ibikorwa by’ubuzima; ashishikariza abantu kwisuzumisha indwara zitandura, gukurikirana ubuzima bwo mu mutwe no kwishyura ubwisungane mu kwivuza (Mituweli).

Drocella Masengesho ahugura abantu baje gusaba serivisi zitandukanye ku kigo Nderabuzima cya Nzangwa avuga ko mu byangiza ubuzima bwo mu mutwe hari amakimbirane mu ngo. Akomeza avuga ko amakimbirane atangiza umuntu gusa agera no mu muryango, ku bana n’abaturanyi n’igihugu.

Basobanurirwaga uko hasuzumwa uburwayi bwo mutwe (Foto Akarere ka Bugesera)

Ati: “Bimwe mu byangiza ubuzima bwo mu mutwe harimo amakimbirane yo mu ngo kandi ntagarukira mu rugo, kuko agira ingaruka ku bagize umuryango, abaturanyi n’Igihugu. Muyirinde.”

Yanasobanuye kandi ko uburwayi bwo mu mutwe buvurwa bugakira.

Mukandanga Esperance umuforomo ukurikirana ubuzima bwo mu mutwe mu kigo Nderabuzima cya Nzangwa we yavuze uburyo yifashisha asuzuma uburwayi bwo mu mutwe; areba umuntu uko agaragara, uko abana n’abandi, uko asohora amarangamitima iyo ashatse igisubizo mu buryo butari bwo n’ibindi.

Mukandanga Esperance umuforomo ukurikirana ubuzima bwo mu mutwe mu kigo Nderabuzima cya Nzangwa

Abari bitabiriye itangizwa ry’icyo cyumweru cyahariwe ibikorwa by’ubuzima , bashimye ko basobanuriwe ibyiza byo kwipimisha indwara zitandura n’ibindi byagarutsweho hagamijwe kwita ku buzima, bizeza ko bagiye kurushaho kubyitaho.

Ubuyobozi bw’ikigo Nderabuzima cya Nzangwa bugira abantu inama yo kwisuzumisha indwara zitandura kimwe no gukurikirana ubuzima bwo mu mutwe (Foto Akarere ka Bugesera)
  • NTAWITONDA JEAN CLAUDE
  • Mata 27, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE