Bugesera: Abakuru b’Imidugudu 566 bahawe amagare azafasha mu kunoza serivisi

  • NYIRANEZA JUDITH
  • Mutarama 6, 2024
  • Hashize amezi 5
Image

Umuyobozi w’Intara y’Iburasirazuba Pudence Rubingisa yashyikirije amagare Abakuru b’Imidugudu 566 akaba azabafasha mu gutanga serivisi inoze.

Guverineri Rubingisa yavuze ko guha abayobozi b’imidugudu 566 amagare, biri muri gahunda yo kunoza serivise.

Ati : “Mu rwego rwo kunoza serivisi aya magare azabafasha kugera ku muturage mu buryo bworoshye kandi bwihuse”.

Yongeyeho ko hakenewe imbaraga kugira ngo abaturage bishimire serivise bahabwa.

Ahereye ku bushakashatsi bw’Urwego rw’Igihugu rw’Imiyoborere RGB umuyobozi w’Intara y’Iburasirazuba Rubingisa yavuze ko hakenewe imbaraga kugira ngo abaturage bishimire serivise bahabwa.

Yasabye ubuyobozi guhera ku Mudugudu kongera imbaraga, umuturage akabona serivise inoze kandi yihuse.

Mu Karere ka Bugesera kandi guhera mu kwezi kwa Kanama 2023 kari mu bukangurambaga bw’isuku n’isukura (Smart Bugesera), aho n’ubundi ku itariki ya 5 Mutarama 2024 abaturage bishimiye ibyakozwe muri ayi mezi ane.

Umuyobozi w’Intara y’Iburasirazuba kandi yanifatanyije n’aba baturage mu gikorwa cyo kwisuzuma, hagamijwe ko Akarere ka Bugesera gacya, kagatekana kandi kagatera imbere.

Guverineri Rubingisa yavuze ko hari ahagikeneye gushyira imbaraga mu isuku.

Yagize ati: ” Isuku iracyakenewe uhereye mu ngo, aho dukorera n’ahandi muri aka Karere kagaragiye Umujyi wa Kigali, gafite ibikorwa by’iterambere biri kwihuta, gafite abakagana benshi”.

Bwana Kalisa Edouard Umunyamabanga Mukuru w’Urwego rw’Igihugu rw’Imiyoborere yamuritse ibyavuye mu bushakashatsi bukorwa n’iki kigo buri mwaka.

Yagaragaje ko Akarere ka Bugesera kari ku mwanya wa 25 ku rwego rw’Igihugu kavuye ku mwanya wa 26, no ku mwanya wa 5 ku rwego rw’Intara kavuye ku mwanya wa 6 mu mwaka wa 2022 (CRC 2023).

Umuyobozi w’Akarere ka Bugesera Mutabazi Richard yagaragarije ishusho y’Akarere ; amahirwe y’ubuhahirane, ubumenyi, siporo n’ubukerarugendo. Yagaragaje imwe mu mishinga minini iri muri aka Karere igamije iterambere ry’abaturage ; abahatuye n’abahagana.

Abakuru b’Imidugudu bavuga ko amagare bahawe ari igisubizo ku ngendo bajyaga bakora, kuko hari igihe byatumaga batubahiriza amasaha, none ubu amagare azajya abafasha gutunganya akazi kabo ka buri munsi.

  • NYIRANEZA JUDITH
  • Mutarama 6, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE