Bruce Melodie na Bwiza bagiye gutaramira muri Uganda

Bruce Melodie na Bwiza berekeje mu gihugu cya Uganda, aho bitarabiriye igitaramo kizaba tariki 15 Gashyantare 2026, mu rwego rwo gufasha abakundana kurushaho kuryoherwa n’umunsi wabahariwe uzwi nka St Valantin.

Binyujijwe ku mbuga nkoranyambaga zitandukanye byagaragaye ko mu gitondo cyo kuri uyu wa 13 Gashyantare 2026 ari bwo Bruce Melodie yahagurutse i Kigali ari kumwe n’itsinda rigari ry’abo bakorana ndetse n’umuhanzi Bwiza.

Iby’ubufatanye bwa Bwiza na Bruce Melodie bukomeje gushinga imizi bitewe n’uko Uhujimfura Jean Claude umuyobozi wa KIKAC Music isanzwe ireberera inyungu za Bwiza afitanye imikoranire myiza na 1:55 AM isanzwe ireberera inyungu za Bruce Melodie.

Uretse icyo gitaramo abo bombi bazaririrmbamo kizabera mu nyubako ya ‘Guvnor Club’., Bruce Melodie we anafite gahunda yo kumenyekanisha indirimbo ye ‘Pom Pom’ muri icyo gihugu.

Mu minsi ishize Bruce Melodie yagaragaje ko asanzwe akunda Julianna Kanyomozi ndetse ku bwe yumva bakorana indirimbo mu gihe Bwiza we yerekeje muri Uganda nyuma y’iminsi mike akoranye n’umuhanzikazi wo muri Uganda Lydia Jazmine indirimbo yise Boda Boda.

Bruce Melodie yerekeje muri Uganda nyuma y’uko yari amaze iminsi akubutse muri Kenya na Tanzania kumenyekanisha ‘Pom Pom’ mu gihe kandi we na The Ben bombi bari muri icyo gihugu bafitanye gahunda yo gutaramira mu ntara zose z’u Rwanda mu bitaramo bya Bruce Melodie.