BRD yiyemeje gutera inkunga igurwa rya Bisi 300 zikenewe muri Kigali

  • NTAWITONDA JEAN CLAUDE
  • Mutarama 22, 2024
  • Hashize amezi 4
Image

Mu gihe mu Mujyi wa Kigali hagikenewe nibura bisi 300 kugira ngo icyuho kiri muri serivisi zo gutwara abantu mu buryo bwa rusange gikemuke burundu, Banki y’u Rwanda y’Amajyambere yiyemeje gutanga gutera inkunga nibura 70% by’izisigaye.

Byagarutsweho mu mpera z’icyimweru gishize ubwo ubuyobozi bwa BRD bwasinyanaga amasezerano ya miliyari 15 z’amafaranga y’u Rwanda n’ibigo bitanu bitanga serivisi zo gutwara abantu mu Mujyi wa Kigali.

Ayo masezerano y’imyaka itanu agamije gutanga inguzanyo ku nyungu ya 12%, akaba yitezweho ko azarangira mu myaka itanu ibyo bigo biguze nibura bisi 120.

Ibigo bitwara abagenzi bizungukira kuri ayo masezerano abihesha bisi zifite imyanya 70, birimo RITCO, Remera Transport Cooperative, City Center Transport Cooperative, Nyabugogo Transport Cooperative n’ibindi.

Iyo nguzanyo iri muri miliyari 30 z’amafaranga y’u Rwanda zagenewe gahunda yo kubaka ibiramba, yagshimwe n’amahanga (Sustainability Linked Bond) kubera uburyo igamije kwimakaza iterambere rirambye ry’u Rwanda no kugera ku Ntego z’Iterambere riryambye zashyizweho na Loni (SDGs)

Inguzanyo yashyizwe mu kuvugurura gahunda yo gutwara abantu mu buryo bwa rusange mu Mujyi wa Kigali, igamije kubaka imijyi irambye kandi yoroshye guturwamo, binyuze mu kongerera imbaraga urwego rw’abikorera bagashora imari ihagije muri taransiporo.

Ubuyobozi bwa BRD bushimangira ko gushyigikira iterambere ry’ubwikorezi bw’abantu n’ibintu biri mu by’ibanze bishyigikira gahunda yayo yo kugera ku ntego zo gushyigikira iterambere ry’Igihugu mu buryo burambye.

Muri iyo gahunda, BRD ikomeje gutanga umusanzu mu kugera ku ntego Guverinoma y’u Rwanda yiyemeje yo kugura bisi 200 hagamijwe kurushaho kunoza serivisi zo gutwara abantu no gushyira mu bikorwa umwe mu myanzuro y’Umushyikirano 2023.

Itangazo rya BRD riragira riti: “Binyuze muri iyo gahunda BRD ikomeje gushyigikira urwego r’’ubwikorezi itanga uburyo bworoshye bw’inguzanyo y’igihe kirekire kandi ihendutse ku bigo byigenga bitanga serivisi zo gutwara abagenzi.”

[…] Imibare igaragaza mko Umujyi wa Kigali ukeneye bisi 300 kugira ngo ugere ku rugero rukenewe mu rwego rwa taransiporo rusange bityo BRD yiteguye gutera inkunga 70 by’urwego rwo gutwara abantu.”

Iyi Banki yizera ko ibyo bizafasha ibigo bitanga serivisi zo gutwara abantu muri bisi bizarushaho kwagura ibikorwa bikajyana no gukemura ibibazo biri mu iterambere rya taransiporo mu Rwanda.

Ni ku nshuro ya mbere ibigo bitanga serivisi zo gutwara abantu bibonye amahirwe atanzwe na BRD binyuze muri iyo gahunda igamije gusigasira ibiramba.

Ubuyobozu bw’iyo banki bwemeza ko ikomeje kuza imbere mu gutera inkunga imishinga y’iterambere rirambye hagamijwe guhindura imibereho n’ubukungu by’Abanyarwanda.

Iyo gahunda ije ikurikira, itangazo ry’Umujyi wa Kigali ryo mu cyumweru gishize rivuga ko bisi 100 mu zo Guverinoma y’u Rwanda yiyemeje kugura zageze mu isoko, n’izindi 100 zikaba ziri mu nzira ziza.

  • NTAWITONDA JEAN CLAUDE
  • Mutarama 22, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE