Brandon McNulty yegukanye Shampiyona y’Isi y’Amagare ya 2026

Umunyamerika Brandon McNulty yegukanye Umudali wa Zahabu muri Shampiyona y’Isi y’Amagare mu isiganwa ry’abagabo ryo mu muhanda, yandika amateka yo kuba umukinnyi wa mbere ukomoka muri iki gihugu wegukanye iri rushanwa nyuma y’imyaka 33.

McNulty yasize abandi mu isiganwa ryabereye mu Mujyi wa Montréal muri Canada kuri iki Cyumweru, tariki ya 27 Nzeri 2026, aho yasoje intera ireshya n’ibilometero 273,4 akoresheje amasaha atandatu iminota 17 n’amasegonda 4.

Yasize Umunya-Australia Michael Matthews wegukanye umwanya kabiri, amurusha amasegonda 13 n’Umuholandi Mathieu van der Poel yatwaye umudali w’Umuringa nyuma yo gusoreza ku mwanya wa gatatu.

Uyu mukinnyi w’imyaka 28 yabaye Umunyamerika wa mbere wegukanye Umudali wa Zahabu muri Shampiyona y’Isi y’Amagare nyuma y’imyaka 33.

Abandi b’Abanyamerika bayitwaye barimo Greg LeMond wayitwaye inshuro ebyiri harimo iyo mu Mujyi wa Altenrhein mu Busuwisi mu 1983 n’iyo mu mujyi wa Chambéry mu Bufaransa mu 1989 na Lance Armstrong wayitwaye mu 1993 mu mujyi Oslo muri Norvege.

Uyu ni undi mudali wa Zahabu watashye muri Amerika, dore ko Barry Ashlin na we yatwaye Shampiyona y’Isi y’Amagare ya 2026 mu batarengeje imyaka 23.

Mu 2016, McNulty Brandon yatwaye Shampiyona y’Isi mu bakiri bato, bica amarenga ko azarushaho gukora amateka.

Umubiligi Remco Evenepoel uherutse kwandika amateka yo kwegukana umudali wa zahabu inshuro enye yikurikiranya mu gusiganwa n’igihe buri mukinnyi ku giti cye (ITT) ntiyorohewe n’isiganwa dore ko yasoreje ku mwanya wa 12 arushanwa n’uwa mbere amasegonda 25.

Mu bakinnyi 184 batangiye, hasoje 50 gusa ndetse nta Munyarwanda wagaragayemo.

Shampiyona y’Isi y’Amagare ya 2027 izabera i Haute-Savoie Mont-Blanc mu Bufaransa guhera tariki ya 24 Kanama kugeza ku ya 5 Nzeri.