BNR yazamuye inyungu fatizo kugera kuri 7.5%

  • NTAWITONDA JEAN CLAUDE
  • Kanama 17, 2023
  • Hashize amezi 10
Image

Banki nkuru y’u Rwanda (BNR), yafashe icyemezo cyo kuzamura inyungu fatizo igurizaho za banki z’ubucuruzi iyivana kuri 7% iyigeza kuri 7.5%, ikaba izubahirizwa mu gihe cy’amezi atatu ari imbere.

Komite ya Politiki y’Ifaranga yafashe iki cyemezo cyo kuzamura igipimo cy’inyungu fatizo ya BNR ho iby’ijana 50 kikagera kuri 7.5%, hagamijwe ko umuvuduko w’izamuka ry’ibiciro ugabanuka ukagera ku gipimo fatizo cya 5% mu mwaka wa 2024.

Guverineri wa BNR John Rwangombwa, yavuze ko inyungu fatizo ya BNR yagiye izamuka mu myaka yashize, ikava kuri 4% ikagera kuri 7.5% ariko hakaba hari icyizere ko uko umuvuduko w’ibiciro ku masoko bigenda bigabanyuka ari na ko nayo izagenda isubira hasi.

Ati: “Isesengura ryakozwe rigaragaza ko umuvuduko w’izamuka ry’ibiciro ku masoko urimo kugabanyuka n’ubwo ukiri hejuru. Twiteze ko hazabaho igabanyuka ry’uyu muvuduko ku masoko mu mpera z’uyu mwaka ku buryo twasubira ku kigereranyo cyacu kiri hagati ya 2 na 8 %. Mu mwaka wa 2024, byitezwe ko uyu muvuduko w’izamuka ry’ibiciro uzagera kuri 5%, niba nta kintu na kimwe gihindutse, mu buryo butunguranye”.

Iyo mibare y’agateganyo igaragaza igabanyuka ry’ibiciro ku masoko rijyanye n’ingamba zafashwe na BNR, harimo kuzamura inyungu fatizo igurizaho amabanki, imbaraga za Guverinoma mu guhangana n’ibiciro byiyongera ndetse n’igabanyuka ry’ibiciro by’ibicuruzwa by’ingenzi bihererekanywa ku rwego mpuzamahanga.

Rwangombwa yavuze ko kugeza ubu hakiri urujijo ku birebana n’icyerekezo cy’ubukungu kubera ibyago birimo imihindagurikire y’ibihe ishobora kwibasira ubuhinzi buzakorwa mu gihe kizaza ndetse n’intambara zishobora gukomeza kugira ingaruka ku biciro by’ibicuruzwa byo ku rwego mpuzamahanga.

Ni muri urwo rwego Komite ishinzwe Politiki y’Ifaranga ishingiye kuri izo ngingo zose yafashe umwanzuro wo kuzamura 0.5% ku nyungu fatizo kugira ngo ikomeze gushyigikira igabanyuka ry’ibiciro ku masoko rizagere kuri 5% mu 2024.

Izamuka ry’umuvuduko w’ibiciro ku masoko ryakomeje kugabanuka guhera mu ntangiriro z’uyu mwaka, aho ryageze ku kigero cya 15.2% mu gihembwe cya kabiri cya 2023 rivuye kuri 20.2% yo mu gihembwe cya 2 cy’umwaka ushize.

Iryo gabanyuka ry’umuvuduko w’izamukary’ibiciro ushingiye ku igabanyuka ryagaragaye ku bicuruzwa bitarimo ibiribwa, imboga n’imbuto, ndetse n’ingufu. Izamuka ry’ibiciro by’ibicuruzwa bitarimo imboga, imbuto byagabanyutse kubera ko n’ibitunganyirizwa mu nganda byagabanyutse, hamwe n’iby’imiturire ndetse n’iby’ingendo.

  • NTAWITONDA JEAN CLAUDE
  • Kanama 17, 2023
  • Hashize amezi 10
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE