BNR yaburiye abishyuza mu mafaranga y’amahanga batabyemerewe

  • NTAWITONDA JEAN CLAUDE
  • Mutarama 2, 2024
  • Hashize amezi 5
Image

Banki Nkuru y’u Rwanda (BNR) yaburiye abahatira abagura ibicuruzwa na serivisi ku isoko ry’u Rwanda kandi batabifitiye uburenganzira, ko kwishyuza mu mafaranga y’amahanga utabifitiye uburenganzira bihanwa n’amategeko.

Ubuyobozi bwa BNR bwatangaje ubwo butumwa bubinyujije ku mbuga nkoranyambaga mu rwego rwo gukumira ihererekanywa ry’amafaranga y’amahanga rikorwa mu buryo bunyuranyije n’amategeko.

Itangazo ryashyizweho umukono na Guverineri wa BNR John Rwangombwa mu cyumweru gishize, rigaragaza ko guhererekanya amafaranga y’amahanga mu buryo butemewe bihanwa n’amategeko.

Ubuyobozi bwa BNR bwashimangiye itegeko ryo ku wa 23/2017 rigenga Banki Nkuru y’u Rwanda nk’uko ryavuguruwe kugeza ubu, riteganya ko ibikowa byose by’ihererekanywa ry’amafaranga bikorewe mu Rwanda bigomba gukorwa mu mafaranga y’u Rwanda, keretse igihe gusa bikozwe mu buryo bwemewe n’amategeko.

Bukomeza buvuga ko abantu bafite imirimo itarabihererwa uruhushya  nk’amahoteli, amaguriro, utubari, ibigo by’ubukerarugendo, amashuri mpuzamahanga n’ibindi bikorwa bihuza Abanyarwanda n’abanyamahanga, bemerewe kwishyurwa mu mafaranga y’amahanga hubahirijwe ibiteganywa n’amategeko.

Abandi bantu bahererekanya amafaranga y’amahanga batabifitiye uburenganzira basabwa kubisaba muri BNR kugira ngo bahabwe ibyangombwa bibemerera kubikora.

Iryo tangazo ryaje rikurikira impungenge zazamuwe n’abavuga ko amadolari y’Amerika agenda aba make cyane ku isoko ry’u Rwanda bikajyana no kuba n’ifaranga ry’u Rwanda ryaratakaje agaciro ku muvuduko wo hejuru.

Gusa ku wa 27 Ugushyingo, John Rwangombwa yabwiye abagize Inteko Ishinga Amategeko ko idolari ry’Amerika ritarabura ku isoko ry’u Rwanda burundu ariko avuga ko kuba amadolari ari makeya cyane byashyize igitutu ku isoko ryo kuvunjisha.

Yongeyeho ko kutishingikiriza ku madolari mu gukora ihererekanya mpuzamahanga ry’amafaranga ari ikintu kikiri inzozi, kitagerwaho mu ijoro rimwe.

Yasubije bamwe mu Badepite bibazaga impamvu amadolari yabaye make ku isoko no kuba yarahenze, ko Banki Nkuru y’u Rwanda yatangiye ubugenzuzi mu bigo by’ivunjisha (forex bureaus) birangira ihagaritse ibigera kuri bitandatu, ibindi bicibwa ibihano mu kubwihwitura ku mikorere idahwitse byasanzwemo.

Raporo ya BNR igaragaza ko mu mwaka wa 2022/2023 amafaranga y’u Rwanda yatakaje agaciro ku idolari y’Amerika ku kigero cya 8.76%, umuvuduko ukaba wari hejuru ugereranyije n’uko byari byifashe mu mwaka wa 2021/2022 aho ryatakaje agaciro ku kigero cya 3.78%.

Ibyo bibazo bivugwaho kuba byaratewe n’uko icyuho kiri hagati y’ibikorerwa mu Rwanda n’ibitumizwa mu mahanga cyakomeje kwiyongera, no kuba Leta Zunze Ubumwe z’Amerika zararushijeho gukaza ingamba zigamije kurinda ubusugire bw’idolari ku Isi.

Ubuyobozi bwa BNR burasaba abantu bose bagana isoko ry’ivunjisha kwigengesera bakajya babanza gushishoza no kumenya ko ikigo cy’ivunjisha bagiye gukorana na cyo cyemewe kandi gifite ibyangombwa bitararenza igihe.

Na none kandi, umuntu wese ugiye kugura cyangwa kugurisha amadolari n’andi mafaranga y’amahanga, akwiye kugaragaza indangamuntu cyangwa pasiporo itararenza igihe kandi na we agasaba bordereau igaragaza igikorwa cyakozwe.

Abaturage basabwe gutanga amakuru ku kigo cy’ivunjisha cyose cyanga kugurisha amafaranga y’amahanga kandi bizwi neza ko kiyafite.

BNR yibutsa abaturarwanda bose ko ibihano bitegereje umuntu wese ukora ihererekanya ry’amafaranga y’amahanga mu buryo butemewe ku isoko ry’ivunjisha.

Umuntu wese ugura cyangwa akagurisha amafaranga y’amahanga mu buryo bunyuranyije n’amategeko aba akoze icyaha, iyo abihamijwe n’urukiko ahanishwa igifungo kitari munsi y’amezi atandatu ariko ntikirenge imyaka ibiri, n’ihazabu y’amafaranga atari munsi ya 200,000 ariko atarenga miliyoni eshatu, cyangwa kimwe gusa muri ibyo bihano biteganywa n’Itegeko ryo ku wa 30 Kanama 2018 ryavuguruwe ku wa 4 Ukuboza 2023.

Umuntu wese wishyuza ibicuruzwa na serivisi mu mafaranga y’amahanga atabifitiye uburenganzira azahanishwa gufatira amafaranga yafatiwe mu ihererekanywa nk’uko biteganywa n’ingingo ya 34 y’amabwiriza yo ku wa 4 Mata 2022 agenga ibikorwa byo guhererekanya amafaranga y’amahanga.

  • NTAWITONDA JEAN CLAUDE
  • Mutarama 2, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE