Blinken yatangiye uruzinduko mu bihugu by’Afurika y’Iburengerazuba

  • ZIGAMA THEONESTE
  • Mutarama 22, 2024
  • Hashize ukwezi 1
Image

Kuri uyu wa 22 Mutarama 2024, Umunyamabanga wa Leta ushinzwe Ububanyi n’Amahanga muri Leta Zunze ubumwe z’Amerika Antony Blinken yatangiye uruzinduko rw’icyumweru rwo kuzenguruka mu bihugu by’Afurika y’Iburengerazuba.

Ni uruzinduko yatangiriye muri Cape Verde akazakomereza muri Côte d’Ivoire, Nigeria na Angola.

Africa News yanditse ko Blinken agiye muri ako karere ka Sahel mu rwego rwo guhangana n’ibihugu by’u Burusiya n’u Bushinwa bishaka kwigarurira ibihugu byo muri icyo gice ndetse no kuganira n’abayobozi ku kibazo cy’intambara muri Sahel.

Byatangajwe ko ari rwo ruzinduko rwa mbere agiriye mu gice cyo munsi y’ubutayu bwa Sahara mu gihe cy’amezi 10 yari amaze adakandagirayo.

Nubwo kandi Amerika itorohewe n’ibibazo birimo iby’intambara za Ukraine n’u Burusiya ndetse n’ihuje Isiraheli na Hamas, Perezida wayo Biden na we yari yijeje ko azasura Umugabane w’Afurika muri Werurwe 2023, icyakora ntiyigeze asohoza ayo masezerano.

Uku kuzenguruka muri ibyo bihugu kwa Blinken kuje nyuma y’uko muri ibyo bice hagiye haba impinduka zitandukanye mu buyobozi ndetse hanumvikanye Coup d’Etat za hato na hato kuva yabasura muri Werurwe 2023.

Igihugu cya Niger cyahinduye umuyobozi, Blinken yari yashyigikiye ko Perezida wahiritswe ku butegetsi ari we wakongera gutorwa.Kuri ubu, ubuyobozi bw’inzibacyuho muri Niger bivugwa ko burimo kwiyubaka bufatanyije n’u Burusiya ndetse bwanirukanye ingabo z’Abafaransa ku butaka bwa Niger.

Muri iki gihe u Burusiya bukomeje kwagura ubufatanye no kureshya ibihugu byo mu Burengerazuba bw’Afurika byiganjemo ibikoresha ururimi rw’igifaransa, ahakomeje kumvikana umutekano muke, mu gice cya Sahel aho imitwe yitwaje intwaro y’Abajihadisite ikomeje kugaba ibitero.

Amerika itangaza ko mu kuvugutira umuti ikibazo cy’umutekano muri Sahel, irimo gushaka aho yashyira ibirindiro by’indege zitagira abapilote (Drones) mu rwego rwo kugira ngo bakomeze guhangana n’ibitero by’Abajihadisite.

Muri Côte d’Ivoire, Blinken agomba kureba imikino y’igikombe cy’Afurika (CAN), kandi yakunze gusaba ubutegetsi bwa Perezida Alassane Outtara wagiye ku butegetsi muri 2011 kwimakaza Demokarasi.

Côte d’Ivoire ituranye n’ibihugu nka Mali na Burkina Faso bikunze kwibasirwa n’ibitero by’Abajihadisite aho ibihugu byiyemeje gufatanya mu bya gisirikare mu kurwanya iterabwoba.

Mu cyerekezo cy’ubutegetsi bwa Biden uyobora Amerika cyo mu myaka icumi iri imbere cyatangajwe mu mwaka ushize, harimo gushyigikira ibikorwa byo kubungabunga umutekano ndetse no kurwanya intambara mu bihugu nka Benin, Ghana, Guinea, Côte d’Ivoire na Togo.

Muri Cape Verde, Blinken yatangaje ko Leta Zunze Ubumwe z’Amerika (USA) zishimira uburyo iki gihugu cyimakaje Demokarasi.

Ni USA kandi yiyemeje gutera inkunga Cape Verde ya miliyoni hafi 150 z’amadolari y’Amerika, binyuze mu gushyigikira gahunda zitandukanye zirimo kwagura icyambu cy’umurwa mukuru, kubaka imihanda, gushyigikira ibikorwa bigamije gushakira amazi meza abaturage n’ibindi.

  • ZIGAMA THEONESTE
  • Mutarama 22, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE