Blinken yashimye urugwiro Perezida Kagame yamwakiranye ubwo aheruka mu Rwanda

  • NTAWITONDA JEAN CLAUDE
  • Mutarama 17, 2024
  • Hashize amezi 4
Image

Antony J. Blinken, Umunyamabanga wa Leta Zunze Ubumwe z’Amerika (USA) ushinzwe Ububanyi n’Amahanga, yashimiye urugwiro Perezida wa Repubulika Paul Kagame yamwakiranye ubwo aheruka gusura u Rwanda.

Blinken aheruka mu Rwanda ubwo yagiraga uruzinduko yakoreye mu bihugu bitatu by’Afurika hagati y’itariki ya 10 kugeza ku ya 12 Kanama 2022.

Tariki ya 11 Kanama 2022 ni bwo yahuye na Perezida Kagame ndetse mu mwaka ukurikiyeho wa 2023 abo bayobozi bombi bagiranye ibiganiro bibiri kuri telefoni byibanze ku bibazo by’umutekano muke muri Repubulika Iharanira Demokarasi ya Congo (RDC).

Ku wa Kabiri tariki ya 16 Mutarama 2024, Perezida Kagame na Blinken bongeye guhurira i Davos mu Busuwisi, ahari kubera Inama ngarukamwaka y’Ihuriro Mpuzamahanga ry’Ubukungu (WEF) ibaye ku nshuro ya 54.

Blinken ni ho yatangarije ko yanyuzwe n’uburyo Perezida Kagame yamwakiranye urugwiro, ati: “Ngushimiye kuba umpaye umwanya uyu munsi nkagushimira kandi n’urugwiro ndetse n’ibiganiro bihebuje twagiranye ubwo nagiraga amahirwe yo gusura u Rwanda, hashize umwaka.”

Perezida Kagame na we yashimiye Leta Zunze Ubumwe z’Amerika ibikorwa byinshi zikorana n’u Rwanda, ndetse n’imbaraga icyo gihugu gishyira mu gushaka umuti w’ibibazo byugarije Akarere k’Ibiyaga Bigari.

Mbere yo kugirana ibiganiro byabereye mu muhezo, Perezida Kagame ati: “Ntegerezanyije amatsiko ibiganiro byacu bigamije kureba uko dushobora kurushaho gutera intambwe no gukomeza gushyira imbaraga mu gushyira iherezo ku makimbirane.”

Ibiganiro by’abo bayobozi byibanze ku kongera imbaraga mu guhosha amakimbirane mu Burasirazuba bwa RDC.

Blinken yavuze ko Amerika yiyemeje gukora ibishoboka byose mu gushyigikira imbaraga zashyizwe mu biganiro by’amahoro bya Angola, ibya Kenya bigamije gukemura mu mahoro n’ubwumvikane amakimbirane ya Congo n’umwuka mubi uri hagati yayo n’u Rwanda.

Yashimye ingufu u Rwanda rwashyize mu guharanira kugera ku gisubizo kirambye, by’umwihariko mu mezi make ashize, ashimira abayobozi bakomeje kudatezuka ku nzira y’amahoro.

Perezida Kagame na Bkinken i Davos mu Busuwisi
  • NTAWITONDA JEAN CLAUDE
  • Mutarama 17, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE