Bimwe mu byaranze siporo y’u Rwanda mu 2023

  • SHEMA IVAN
  • Ukuboza 27, 2023
  • Hashize amezi 2
Image

Mu gihe hasozwa umwaka wa 2023, siporo nyarwanda yaranzwe na byinshi bitandukanye birimo ibyiza haba muri ruhago dore ko ari yo ikunzwe cyane kurusha izindi siporo, ariko no mu yindi mikino hagaragaramo abitwaye neza bahesha igihugu ishema mu ruhando mpuzamahanga.

Abakinnyi cyangwa amakipe yahagarariye igihugu mu bihe bitandukanye ndetse n’amarushanwa atandukanye, aha akaba ari ho haherwa harebwa abitwaye neza mu gutuma intego igihugu cyihaye mu kuzamura siporo zigerwaho.

Muri iyi inkuru Imvaho Nshya yagerageje kwegeranya bamwe muri bo babashije guhiga abandi mu mikino, by’umwihariko bamwe bikaba ari ubwa mbere bari bageze kuri urwo rwego.

U Rwanda rwakiriye Inteko Rusange ya FIFA

Imwe mu nkuru zikomeye zagarutsweho umwaka wa 2023 mu Rwanda, ni iy’Inama y’Inteko Rusange ya 73 y’Ishyirahamwe rya Ruhago ku Isi, FIFA.

Inama y’Inteko Rusange ya FIFA ni kimwe mu bikorwa bya siporo bikomeye byabereye mu Rwanda muri uyu mwaka

Ni inama yari ikomeye cyane kuko yari iteganyijwemo amatora, yasojwe Gianni Infantino yongeye gutorerwa gukomeza kuyobora FIFA muri manda y’imyaka ine izarangira mu 2027.

Mu gihe cy’iyi nama kandi, Stade ya Kigali yahinduriwe izina yitwa Kigali Pelé Stadium, aho yitiriwe Umunyabigwi muri Ruhago y’Isi, Umunya Brésil Edson Arantes do Nascimento wamamaye nka Pelé, witabye Imana mu 2022.

APR FC na Police FC zasubiye ku banyamahanga

Imwe mu nkuru zikomeye zaranze uyu mwaka muri ruhago ni ukubona amakipe ashamikiye ku nzego z’umutekano ari yo APR FC, Marines FC ndetse na Police FC zisubiye kuri politiki yo gukinisha abanyamahanga.

By’umwihariko, Ikipe y’Ingabo yayisubiyeho nyuma y’imyaka irenga 11; Umurundi Nshimirimana Ismael ’Pitchou aba uwa mbere watangajwe na yo avuye muri Kiyovu Sports, akurikirwa n’abandi barindwi bavuye mu bihugu bitandukanye by’Afurika.

Byari ibyishimo byinshi ku bafana ba APR FC ari na ko bikubitaga ku gatuza bavuga ko imikino nyafurika yababereye ibamba bagiye gutangira kuyibasha bakitwara neza.

Ni mu gihe Police FC na yo yahise igura abakinnyi barimo Abarundi, Bigirimana Abedi, Rukundo Onesme, Ndizeye Samuel n’abandi.

Umupira w’amaguru

Amavubi yabonye itsinzi nyuma y’imyaka 2

Muri uyu mwaka wa 2023 ni bwo ikipe y’igihugu Amavubi yongeye kubona intsinzi mu marushanwa mpuzamahanga nyuma yo gutsinda Afurika y’Efpo ibitego bibiri ku busa mu gushaka itike y’igikombe cy’Isi cya 2026 kizabera muri Amerika, Canada na Mexico.

Abanyarwanda benshi bakunda Amavubi bongeye kumwenyura nyuma y’igihe barabuze intsinzi dore ko amavubi yaherukaga gutsinda umukino tariki 24 Werurwe 2021 batsinda Mozambique gushaka itike y’igikombe cy’Afurika cyabereye muri Cameroun.

APR FC yatwaye igikombe cya shampiyona ku nshuro ya kane yikurikiranya

APR FC yegukanye Igikombe cya Shampiyona ku nshuro ya kane yikurikiranya.

Muri Gicurasi uyu mwaka ikipe y’ingabo z’igihugu APR FC yegukanye igikombe cya shampiyona cya 2022-2023 kiba igikombe cya kane itwaye yikurikiranya.

Yegukanye igikombe ifite amanota 63 n’ibitego 26 izigamye, aho yanganyaga na Kiyovu Sports ya kabiri, ariko yo izigamye ibitego 17.

Rayon Sports yegukanye Igikombe cy’amahoro

Muri Kamena uyu mwaka Rayon Sports yegukanye igikombe cy’amahoro itsinze umukeba APR FC igitego 1-0 nyuma y’imyaka 7 mu mukino wabereye kuri Stade mpuzamahanga ya Huye, inatwara icya Super Cup kandi byombi ibitwara itsinze mukeba wayo, APR FC.

Rayon Sports kandi yegukanye igikombe cya RNIT Savings Cup itsinze Kiyovu Sports 3-0, yaraherukaga kuyitsinda mu 2019.

Rayon Sports yegukanye igikombe cy’amahoro nyuma y’imyaka 7 itsinze APR FC

Uretse iyi kipe y’abagabo, Rayon Sports WFC na yo yatwaye Igikombe cya Shampiyona y’Abagore mu Cyiciro cya kabiri, none ubu iri gukina Icyiciro cya mbere ndetse inganya amanota na AS Kigali WFC imaze hafi imyaka 12 yarigaruriye ruhago y’abagore.

PSG Academy Rwanda yegukanye ibikombe bibiri by’Isi

Zimwe mu mpinduka ziri kugaragara muri siporo y’u Rwanda ni ukubaka imikino ihereye ku bana bakiri bato. Ku ruhande rwa ruhago ntitwakwibagirwa kuvuga ko Irerero rya PSG mu Rwanda ryahesheje igihugu ishema mu Gikombe cy’Isi cy’uyu mwaka gihuza amarerero y’Ikipe ya Paris Saint-Germain mu Bufaransa.

Uyu mwaka muri Kamena, ni bwo PSG Academy Rwanda yongeye kwitabira aya marushanwa, yegukana ibikombe bibiri mu batarengeje imyaka 11 ndetse n’abatarengeje imyaka 13 nyuma yo gutsinda Brésil ku mukino wa nyuma.

Académie ya PSG mu Rwanda yitwaye neza mu gikombe cy’Isi cy’Amarerero y’iyi kipe yo mu Bufaransa

Uwikunda Samuel yashyizwe mu basifuzi 25 ba CAF

Muri Gicurasi, Impuzamashyirahamwe y’Umupira w’Amaguru ku Mugabane w’Afurika (CAF) yashyize Abanyarwanda babiri; Mukansanga Salima na Uwikunda Samuel ku rutonde rw’abasifuzi b’abanyamwuga 25.

Urutonde rwa CAF rwerekana ko aba basifuzi barimo 20 b’abagabo mu gihe abagore ari batanu, bose basinye amasezerano y’umwaka umwe ndetse bazajya bahembwa n’iyi Mpuzamashyirahamwe ya Ruhago Nyafurika.

Iyi yari inkuru nziza kuri Uwikunda Samuel w’imyaka 36, wabaye umusifuzi mpuzamahanga kuva mu 2017 ndetse akaba aheruka gutoranywa mu basifuzi bo hagati bazasifura Igikombe cy’Afurika cya 2023 muri Côte d’Ivoire.

CAF yashyize Uwikunda Samuel na Mukasanga Salima ku rutonde rwabasifuzi 25 b’abanyamwuga izajya ihemba

Mukansanga wasifuye Igikombe cy’Isi cy’Abagore mu mpeshyi, we yari asanzwe kuri uru rutonde kuva mu 2022 ndetse na we azasifura CAN 2023 izabera muri Cote d’Ivoire guhera tariki 13 Mutarama- 14 Gashyantare 2024, akaba ari mu bakoresha ikoranabuhanga ry’amashusho rizwi nka VAR.

VOLLEYBALL

Ikipe y’Igihugu y’abagore yitwaye neza ku rwego Nyafurika

Ikipe y’igihugu y’abagore mu mukino wa Volleyball muri uyu mwaka wa 2023 nayo yahesheje ishema igihugu mu mukino y’igikombe cy’Afurika cyabereye Cameroun aho yasoreje ku mwanya wa kane nyuma yo gutsindwa n’iya Cameroun amaseti 3-1.

Ikipe y’Igihugu y’u Rwanda yasoje ku mwanya wa kane mu gikombe cy’Afurika

Muri iri rushanwa Munezero Valentine ukinira APR W VC akaba na Kapiteni w’Ikipe y’Igihugu y’Abagore yahembwe nk’umukinnyi mwiza mu gutangiza umukino.

Umukino w’amagare

Mwamikazi Djazilla yegukanye Shampiyona Nyafurika ya Mountain Bike

Umunyarwandakazi Mwamikazi Djazilla yabaye umukinnyi mwiza muri uyu mwaka wa 2023 kuko yegukanye amarushanwa atandukanye harimo ay’imbere mu gihugu ndetse n’andi mpuzamahanga.

Irikomeye uyu mukobwa yitabiriye ni iryabaye muri Kamena 2023, ubwo yajyaga muri Afurika y’Epfo mu Mujyi wa Johannesburg agatwara umudali wa Zahabu muri Shampiyona y’Amagare yo mu Misozi “2023 CAC MTB African Championships”, ariko mu batarengeje imyaka 23.

Mwamikazi Djazila yazamuye ibendera ry’u Rwanda mu mikino nyafurika yo gusiganwa ku magare mu misozi

Henok Mulubrhan yegukanye Tour du Rwanda 2023 yarebwe na Perezida Kagame

Muri Gashyantare uyu mwaka Umunya-Eritrea Henok Mulubrhan ukinira Green Project-Bardiani CSF-Faizanè yo mu Butaliyani, yegukanye Tour du Rwanda 2023 yitabiriwe na Perezida Paul Kagame ku i Rebero.

Henok Mulubrhan yishimiye guhembwa na Perezida Kagame nyuma yo kwegukana Tour Du Rwanda 2023

Umutesi Uwase Magnifique yegukanye imidali ya Zahabu mu gusiganwa ku maguru

Umunyarwandakazi Umutesi Uwase Magnifique w’imyaka 18, wiga kuri Groupe Scolaire Remera- Rukoma mu Karere ka Kamonyi, yahiriwe n’uyu mwaka wa 2023 kuko yegukanye imidali ibiri ya Zahabu nyuma yo kuba uwa mbere mu gusiganwa ku maguru intera ya metero 100 na metero 400 mu Mikino ya FEASSSA ihuza ibigo by’amashuri yo muri Afurika y’Iburasirazuba, uyu mwaka yabereye i Huye muri Kanama.

Mu gusiganwa metero 100, Magnifique yakoresheje amasegonda 12 yasize ibice bitandatu Rebecca Juma wo muri Kenya, naho muri metero 400 akoresha amasegonda 55,5 yasize amasegonda 2,1 Umunya-Uganda Anamu Vicky wamukurikiye.

Umutesi Uwase Magnifique yigaragaje mu gusiganwa ku maguru yegukana imidali ya zahabu mu mikino ya FEASSSA

Uyu mukobwa benshi bakeka ko ari umuhungu iyo bataramuvugisha, uyu ni wo mwaka yahishuyemo ko iyo abwiwe atyo bimutera imbaraga zo gukora cyane kandi mu myaka ikurikira azakora andi mateka.

CRICKET

Ishimwe Henriette ukina Cricket yanikiye abanyamahanga

Ishimwe Henriette ukinira Ikipe y’Igihugu y’u Rwanda muri Cricket, yahawe Igihembo cy’Umukinnyi Mwiza w’Ukwezi kwa Werurwe ku Isi muri uyu mwaka wa 2023.

Ni igihembo yari ahanganiye na Ravina Oa ndetse na Sibona Jimmy, bombi bakinira Ibirwa bya Papouasie-Nouvelle-Guinée biherereye ku Mugabane wa Oceania.

Ishimwe w’imyaka 19, wegukanye iki gihembo, yabigezeho abikesha kwitwara neza mu mikino Ikipe y’Igihugu ya Cricket mu bagore yitabiriye muri Nigeria.

Ishimwe Henriette yegukanye igihembo cy’umukinnyi w’ukwezi kwa Werurwe 2023 ku Isi muri Cricket

Muri iyi mikino, u Rwanda rwasoreje ku mwanya wa kabiri nyuma yo gutsindirwa ku mukino wa nyuma na Nigeria ku kinyuranyo cy’amanota icyenda. Uyu mukobwa kandi yakoze amateka yo gutsinda ‘hat-trick’ (gusohora abakinnyi ku dupira dutatu twikurikiranya).

EALA Games 2023

Mu Kuboza 2023, u Rwanda rwakiriye imikino ihuza Inteko Zishinga Amategeko zo mu Karere k’Afurika y’Iburasirazuba, izwi nka EALA Games.

Hon Mukabalisa na Rwaka bitwaye neza muri mikino ya EALA

Depite Mukabalisa Germaine yegukanye umudali wa zahabu mu gusiganwa metero 400 mu gihe Depite Rwaka Pierre Claver yawegukanye muri Darts bakina bicaye, mu Mikino ihuza Inteko Zishinga Amategeko z’ibihugu byo mu Muryango w’Afurika y’Iburasirazuba (EAC).

Mukabalisa Germaine ari mu bahagarariye neza u Rwanda, ahiga abandi mu gusiganwa metero 400 mu mikino ya EALA

Muri iyi mikino yabaye ku nshuro ya 13 ndetse ikabera mu Rwanda, byari ku nshuro ya kabiri yikurikiranya Mukabalisa abasha kuyitwaramo neza nyuma y’aho mu 2022 yegukanye umudali w’Umuringa.

Handball

U Rwanda rwakoze andi mateka yo kwitabira bwa mbere igikombe cy’isi

Hari ku wa Gatanu tariki ya 2 Nzeri 2022 muri BK Arena, ubwo u Rwanda rwandikaga amateka mu mukino wa Handball, aho rwabonye itike y’igikombe cy’Isi cyagombaga kubera muri Croatia mu 2023, nyuma yo kunganya na Algeria ibitego 30-30.

Mu mikino irindwi u Rwanda rwakinnye mu gikombe cy’Isi, rwasoje irushanwa rutsinzemo itatu rutsindwa ine, mu mikino y’amatsinda u Rwanda rwatsinzwe itatu (Portugal, Croatia na Algeria), ruza kujya mu mikino yo guhatanira imyanya, muri iyo mikino u Rwanda rwatsinzemo itatu irimo Maroc, Nouvelle Zélande ndetse na Leta Zunze Ubumwe z’Amerika, rusoza ku mwanya wa 27

Rwanda rwabashije gutsinda imikino itatu muri irindwi bakinnye mu gikombe cy’Isi cya Handball

Abatarengeje imyaka 17 begukanye igikombe muri Tanzania

Ikipe y’u Rwanda y’abangavu batarengeje imyaka 17 yegukanye igikombe itsinze u Burundi ibitego 32-13, mu mikino y’Akarere ka gatanu muri Handball yasojwe tariki 30 Mata 2023 muri Tanzania, bibahesha itike yo kwerekeza ku rwego rw’Afurika, aho begukanye umwanya wa gatatu muri Afurika mu irushanwa ryabereye muri Côte d’Ivoire.

U Rwanda rwegukanye umwanya wa gatatu muri Afurika i Brazzaville

U Rwanda rwegukanye igikombe U 17 muri Tanzania

Nyuma yo kwegukana igikombe cy’akarere ka gatanu mu batarengeje imyaka 20 i Nairobi muri Kenya, u Rwanda rwabonye itike yo guhatanira iki gikombe cy’Afurika cyabereye i Brazzaville, irushanwa riza kurangira u Rwanda rwegukanye umwanya wa gatatu.

Basketball

U Rwanda rwakiriye AfroBasket mu bagore

Muri Kanama uyu mwaka u Rwanda rwakiriye igikombe cy’Afurika cy’abagore, AFRO BASKET WOMEN 2023, aho ndetse rwaje kwegukana umwanya wa 4 nyuma yo gutsindwa na Mali mu mukino wo guhatanira umwanya wa 3, aho u Rwanda rwari rwaratsinzwe na Nigeria muri ½.

U Rwanda rwegukana umudali wa bronze muri AfroCan 2023

Muri Nyakanga uyu mwaka, Ikipe y’igihuguy’u Rwanda ya Basketball y’abagabo yegukanye umudali wa Bronze mu irushanwa Nyafurika rya Basketball ‘FIBA AFROCAN2023″ ryaberaga muri Angola nyuma yo gutsinda Repubulika Iharanira Demokarasi ya Congo (RDC) amanota 82 -73. Mu mukino wo guhatanira umwanya wa gatatu.

U Rwanda rwegukanye umudali wa bronze muri AfroCan 2023

REG WBBC yasoreje ku mwanya wa kane mu mikino Nyafurika

Mu Kuboza uyu mwaka REG W BBC yasoreje ku mwanya wa kane mu mukino nyafurka ya ‘FIBA Africa Women’s Basketball League’ yaberaga mu Misiri nyuma yo gutsindwa na Inter Clube yo muri Angola amanota 83-68 mu mukino wo guhatanira umwanya wa gatatu.

APR BBC yegukanye igikombe cya shampiyona nyuma y’imyaka 14

Muri Nzeri uyu mwaka nyuma y’imyaka 14 APR BBC yongeye kwegukana igikombe cya shampiyona nyuma yo gutsinda REG BBC imikino 4-0 mu mikino y’akamarampaka ibona itike yo guhagararira u Rwanda mu mukino ya BAL 2024.

APR WBBC yegukanye igikombe cya shampiyona nyuma yo gutsinda REG WBBC imikino 4 kuri 1 mu mikino ya kamarampaka. 

APR BBC yatwaye shampiyona ya 2023 nyuma y’imyaka 14
APR WBBC yegukanye igikombe cya shampiyona itsinze REG WBBC imikino 4 kuri 1
REG WBBC yasoreje ku mwanya wa kane mu mikino nyafurika yabereye mu Misiri
  • SHEMA IVAN
  • Ukuboza 27, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE