Batewe inkeke n’iteme ry’ibiti bidigadiga mu Mujyi wa Muhanga

  • AKIMANA JEAN DE DIEU
  • Gashyantare 27, 2024
  • Hashize amezi 2
Image

Bamwe mu baturage bo mu Kagari ka Makera, Umurenge wa Cyeza n’abo mu Kagari ka Gitarama ho mu Murenge wa Nyamabuye mu Mujyi wa Muhanga, Akarere ka Muhanga, batewe impungenge n’iteme rya Makera riherereye mu gice cy’umujyi kitaragezwamo ibikorwa remezo byinshi.

Bamwe mu bavuganye n’Imvaho Nshya, bavuga ko iri teme rikoreshwa n’abaturage bo mu Mirenge yombi ikora ku mujyi, ariko ngo bahorana impungenge ko rishobora kubateza impanuka.

Bavuga ko abateje ikibazo cyane ari  abana bato bahanyura bajya cyangwa bava kwiga ndetse n’abarema amasoko.

Tuyishime Jean Paul avuga ko babwiye inzego bireba zirimo ubuyobozi bw’Utugari n’Imirenge batuyemo, ndetse bageza ikibazo no ku Karere ariko ngo nta kintu kirakorwa.

Yagize ati: “Iki kibazo twakigejeje ku bayobozi bose baba abo mu Kagari ndetse n’abo ku Karere ariko ntacyo burakora kandi hateje ikibazo abantu basigaye baritinya bagaca mu mazi.”

Nyiraneza Redempta avuga ko bimusaba kujya kwambutsa abana be bagiye kwiga ku Ishuri Ribanza rya Gatenzi, ndetse akahahurira n’abandi bajya kwiga mu mujyi na bo bagorwa no kwambuka kuri ibi biti bitanu bidigadiga.

Yagize ati: “Njyewe binsaba guherekeza abana bagiye kwiga kuko ari bato nkabambutsa bakajya kwiga i Gatenzi ariko kandi ushobora kuhagera mu gitondo ukambutsa benshi kuko ibi biti usanga unabyambukiraho byamutamo kuko birabyina.”

Sibomana Simeon avuga ko baterwa ipfunwe no kuba babarizwa mu gice cy’umujyi ariko ugasanga ibikorwa remezo babibona babanje gusiragira.

Ibiti biri kuri iryo teme biradigadiga, abantu bagatinya kuba bagwa mu mworera wacukuwe n’amazi

Yagize ati: “Iri teme ritera ubwoba kuko riteye nabi, abanyantege nkeya ntabwo bashobora kuryambuka bibasaba kururuka bagaca mu mazi. Ikindi iki gice bigaragara ko nubwo kiri mu mujyi ntabwo kijyana n’umuvuduko kiri inyuma cyane mbese ntabwo cyitaweho.”

Umuyobozi w’Akarere ka Muhanga Kayitare Jacqueline, yabwiye Imvaho Nshya ko muri aka Karere hari amateme menshi n’ibiraro bigomba gusanwa ndetse niri teme na ryo riri mu bizaherwaho.

Yaguze ati: “Mu Karere kacu dufite amateme n’ibiraro bigomba gusanwa n’iri ririmo, ariko aya mateme agenda akorwa uko ubushobozi bugenda buboneka. Ariko kandi hari ibimaze gukorwa, ibirimo gukorwa n’ibizakorwa mu gihe kizaza, twizeye ko nitubona ubushobozi hazakorwa byinshi.”

Bivugwa ko igishanga iri teme ribonekamo kiri hafi gutunganywa mu mushinga CDAT, bikaba bishobora kurangira na ryo rikozwe.

Abaturage bavuga ko bibagoye kuko iki gishanga cyamaze gucukunyuka ku buryo aha hantu nta muganda wahakora ngo bishoboke ahubwo hakenewe ibikoresho bikomeye byakoreshwa hakaramba.

  • AKIMANA JEAN DE DIEU
  • Gashyantare 27, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE