Basketball: Mu Rwanda hatangiye umwiherero w’abangavu baturutse mu bihugu  21

  • Imvaho Nshya
  • Nzeri 27, 2023
  • Hashize amezi 8
Image

Ku wa Kabiri tariki 26 Nzeri 2023 muri BK Arena hatangiye umwiherero w’iminsi itatu  w’abakobwa bari munsi y’imyaka 16 “FIBA Africa Regional Youth Camp” mu rwego rwo kuzamura imikinire yabo kugira ngo bazavemo abakinnyi bakomeye mu minsi iri imbere.

Uyu mwiherero ubaye ku nshuro ya 3 nyuma y’uwabaye muri 2021 na 2022 utegurwa n’ishyirahamwe ry’umukino wa Basketball muri Afurika “FIBA Africa” muri gahunda yayo yo guteza imbere umukino wa Basketball bihereye mu bakiri bato.

 Abakinnyi 45 baturutse mu bihugu 21 ni bwo bitabiriye uyu mwiherero. Ibi bihugu birimo u Rwanda, Nigeria, Gambia, Cote d’Ivoire, South Africa, Mali, Maroc, Burundi, Madagascar, Tanzania, Tunisia, Zambia, Malawi, Ghana, Misiri, Uganda, Burkina Faso, Cameroun, Togo, Central Africa Republic na Congo Brazzaville.

Aba bakobwa bitabiriye barimo gutozwa n’abatoza b’inzobere  barimo Cheick Sarr usanzwe ari umutoza w’ikipe y’igihugu y’u Rwanda ndetse n’abandi batoza b’abakobwa bavuye mu bihugu bitandukanye harimo n’Abanyarwanda.

Umuyobozi wa Tekinike mu ishyirahamwe ry’umukino wa Basketball mu Rwanda “FERWABA”, Mutokambali Moise  yatangaje ko uyu mwiherero ari umwanya mwiza wo guha umwana w’umukobwa umwanya wo guhura n’abandi ndetse n’abatoza beza kugira ngo bamwongerere ubumenyi mu bya Tekinike.

Guesbeogo Franck Traoré, ushinzwe ibikorwa muri NBA Africa yatangaje ko iyi ari gahunda y’ubufatanye bihaye  igamije gufasha abakiri bato kugira ngo berekane impano zabo bafashwe kuzizamura bagere ku rwego rwo guserukira ibihugu byabo.

Yakomeje avuga ko muri Afurika hari abana benshi bafite impano, igikenewe akaba ari ugushyiraho uburyo nk’ubu bwo kubafasha kuziteza  imbere bakagera ku rwego rwiza.

Umuyobozi wa Komisiyo y’iterambere ry’umukino wa Basketball muri FIBA Africa, Jean Michel Ramaroson yavuze ko ubu ari ubugira gatatu iyi gahunda ikorwa. Akomeza avuga ko intego nyamukuru ari uguha abakiri bato  ubumenyi bwisumbuye ariyo mpamvu baba bakeneye abatoza beza bari ku rwego rwo hejuru.

Jean Michel  yasabye aba bana bitabiriye umwiherero gukora cyane kugira ngo bazaserukire ibihugu byabo mu marushanwa y’abatarengeje imyaka 18 ari imbere.

Uyu mwiherero mu cyiciro cy’abakobwa uzasozwa tariki 28 Nzeri 2028  urimo kuba nyuma y’umwiherero w’abahungu wabereye i Bamako mu Misiri kuva tariki 20 kugeza 22 Nzeri 2023.

Kuva iyi gahunda “FIBA Africa Youth Camp” yatangira muri 2021 yageze mu bihugu 43 aho abana 240 bamaze guhugurwa bakaba barimo 90 b’abakobwa.

NYIRANEZA JUDITH

  • Imvaho Nshya
  • Nzeri 27, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE