BasiGo yemereye u Rwanda bisi 200 zikoresha amashanyarazi

  • NTAWITONDA JEAN CLAUDE
  • Nyakanga 27, 2023
  • Hashize amezi 10
Image

Ikigo BasiGo gitunganya bisi zikoresha amashanyarazi cyatangaje gahunda yo kohereza mu Rwanda bisi zirenga 200 bitarenze mu mwaka wa 2024, aho iza mbere zitangira kugera i Kigali mu ntangiriro z’igihembwe cya kane cy’uyu mwaka.

Bivugwa ko u Rwanda rugiye kuba igihugu cya kabiri kibaye isoko rya BasiGo nyuma ya Kenya nk’Igihugu kimaze kumenyera gukoresha izo bisi nk’uburyo bugezweho bwo gutwara abantu mu mujyi munini wa Nairobi.

Ubuyobozi bwa BasiGo bwanatangaje ko bwatangiye ubufatanye n’Ikigo AC Group gitanga amakarita yo kwishyuriraho serivisi z’ingendo, kugira ngo umunsi izo bisi zizaba zageze mu Rwanda abagenzi bazakomeze gukoresha uburyo bamenyeye bwo kwishyura.

Umuyobozi Mukuru wa BasiGo akaba ari na we wayishinze Jit Bhattacharya, yavuze ko bishimira kuba ubufatanye batangiranye na AC Mobility butazorohereza abagenzi gusa ahubwo buzanafasha ibigo bya taransiporo bizahabwa izo bisi kuba byagenda bizishyura uko zikoreshwa.

Yagize ati: “Izo bisi zikoresha amashanyarazi zikuraho impungenge ku izamuka ry’ibiciro by’ibikomoka kuri peteroli, ariko nanone zikanagira uruhare mu kugabanya ibyuka bihumanya ikirere. Ikindi kandi binyuze muri gahunda yo kwishyura uko utwaye (Pay-As-You-Drive), tunejejwe no kuzana igisubizo cya bisi z’ikoranabuhanga zoroshye kwishyura, zihendutse kandi zorohera buri kigo gitanga serivisi za taransiporo mu Rwanda.”

BasiGo na AC Mobility byasinyanye amasezerano yo gutangirana na sosiyete zitanga serivisi zo gutwara abantu mu buryo bwa rusange mu Mujyi wa Kigali, ari zo Kigali Bus Service, Royal Express, na Volcano Express.

Urwego rwo gutwara abantu mu Mujyi wa Kigali ruzaba rwatangiye kugaragara mu isura nshya

Jones Kizihira Umuyobozi Mukuru wa AC Mobility, yagize ati: “Tunejejwe no gutangirana ubufatanye na BasiGo bwo kuzana impinduka muri gahunda yo gukoresha bisi zikoresha amashanyarazi mu Rwanda. Igihugu cyageze ku iterambere ryihuse, bituma hakenerwa uburyo bwo gukora ingendo za rusange bugezweho kandi buhendutse.  Bisi zikoresha amashanyarazi zizanafasha mu koroshya igiciro cy’imodoka zitwara abantu mu buryo bwa rusange ndetse binafashe igihugu kwimukira ku buryo bwo gutwara abantu butangiza ibidukikije. “

Kizihira yakomeje avuga ko biteguye gukorana na BasiGo babyaza umusaruro ubunararibonye bwose bafite mu gukora no gukoresha bisi z’amashanyarazi, mu rugendo rw’u Rwanda rwo kubaka urwego rwa taransiporo ruramba mu Rwanda.

Imikoranire ya BasiGo n’u Rwanda ije mu gihe Guverinoma yashyize imbaraga mu kuvugurura urwego rwa taransiporo mu Mujyi wa Kigali by’umwihariko, aho binateganywa ko mu mezi make ari imbere hazaba hamaze kugezwa bisi zikoresha lisansi zirenga 100 zo kuziba icyuho gihari.

Gahunda ihari ni uko izo bisi zikoresha lisansi zaba inshyashya n’izisanzwe, zose zizagenda zisimburwa buhoro buhoro, kugeza igihe uru rwego ruzasigaramo bisi zikoresha ingufu zitangiza ibidukikije, ku buryo  20% bya bisi zikorera mu Mujyi wa Kigali zizaba zamaze gusimbuzwa bitarenze 2030.

Ku rundi ruhande, Ikigo BasiGo kimaze gushyira bisi 19 i Nairobi guhera mu 2021 ubwo cyatangiraga kuri iryo soko, ndetse cyamaze no gutegura izindi zirenga 100 ziziyongera i Nairobi no mu yindi mijyi ifite ibikorwa remezo bihagije.

Kugeza ubu icyo kigo kivuga ko bisi zacyo ziri mu muhanda zimaze gukora ibilometero 460,000 no gutwara abagenzi barenga 580,000.

Bisi 200 zikoresha amashanyarazi zitezwe i Kigali bitarenze mu mpera z’umwaka utaha, ahateganyijwe ko hari n’izindi zizagenda ziza ku bufatanye bwa Leta n’abafatanyabikorwa batandukanye.

  • NTAWITONDA JEAN CLAUDE
  • Nyakanga 27, 2023
  • Hashize amezi 10
TANGA IGITEKEREZO
Issa says:
Kanama 1, 2023 at 2:32 pm

Very good.

Andika igitekerezo

AMATEGEKO AGENGA IYANDIKA RY'IGITEKEREZO CYAWE