Baravuga imyato umushinga wa miliyari 2.7 Frw wabakuye mu bukene

  • NTAWITONDA JEAN CLAUDE
  • Kamena 27, 2022
  • Hashize imyaka 2
Image

Abagore bayoboye ingo zari mu bukene bukabije baravuga imyato umushinga watangijwe n’ Ikigo cya Koreya y’Epfo gishinzwe Ubutwererane Mpuzamahanga (KOICA) ufite agaciro ka miliyoni 2.7 z’amadolari y’Amerika, ni ukuvuga asaga miliyari 2.7 z’amafaranga y’u Rwanda, urimo kububakira umusingi w’iterambere.

Abagore batanze ubuhamya ubwo basurwaga n’abakozi ba KOICA Rwanda taliki ya 23 n’iya 24 Kamena, hagenzurwa ibimaze kugerwaho mu mushinga ugamije gukura mu bukene abagore bayoboye ingo (KOICA Ultra Poor Graduation Project for Women Headed Household).

Uwo mushinga w’imyaka ibiri washyizwe mu bikorwa mu Turere twa Rutsiro na Rwamagana guhera mu 2021 ukazageza mu 2023, ukaba ushyirwa mu bikorwa ku bufatanye n’Umuryango World Vision na The Better World.

Wibanze ku miryango iyobowe n’abagore ikennye kurusha iyindi, bakaba bafashwa kwikura mu bukene babifashijwemo n’ikoranabuhanga. Abakozi ba KOICA basuye abagenerwabikorwa bahize abandi mu kwiteza imbere binyuze muri uwo mushinga, hanagenzurwa ishyirwa mu bikorwa ryawo kugira ngo hategurwe urugendo rwo kwesa imihigo.

Umwe mu bagenerwabikorwa basuwe ni uwitwa Claudine warereraga abana batandatu mu bukene bukabije, ariko yemeza ko nyuma yo guterwa inkunga no guhindurirwa imyumvire binyuze muri uwo mushinga, yabashije kwiga gucunga umutungo no kwizigama.

Binyuze mu mafaranga yatangiye kwizigama, yaguze icyarahani atangira kudoda imyenda ari na byo byamuzahuye ku buryo ari mu rugendo rwo gusezerera ubukene burundu.

Uyu munsi Claudine atunze ihene eshanu, inkoko eshatu n’inka ebyiri. Ubworozi bumufasha kurushaho kunoza imirire mu muryango we ari na ko yongera inyungu zibukomokaho.

Daphrose asigaye ahinga urusengda rukamuha amafaranga atubutse buri cyumweru

Yagize ati: “Ntewe ishema no kuba narahindutse urugero rwiza mu itsinda ryo kwizigama mbamo ndetse ndashimira byimazeyo uyu mushinga waduhaye inkunga ihagije haba kuri jye ubwanjye no ku muryango wanjye.  

Undi witwa Daphrose na we akimara gupfakara ngo ntiyabashaga kwitabira ibikorwa rusange bihuza abaturage kuko yari atakigira umwenda muzima wo kwambara, abana be bose bari barataye ishuri.

Nyuma yo kubona ubufasha binyuze mu mushinga, yatangiriye ku buhinzi bw’amashu, karoti, beterave n’izindi mboga z’ubwoko butandukanye, none ubu asigaye ahinga urusenda rumuha inyungu nyinshi kuko arugurisha buri cyumweru.

Yagize ati: “Nkimara kwitabira uyu mushinga, nabashije gutunga abana banjye nkababonera indyo yuzuye buri gihe ndetse mbasha no kwishyurira umuryango wanjye wose ubwisungane mu kwivuza. Ndashimira buri wese washyigikiye ishyirwa mu bikorwa ry’uyu mushinga.”   

Mu mwaka wose ushize uyu mushinga ushyirwa mu bikorwa, wakozwemo gahunda zinyuranye zagize uruhare mu guhindura imibereho myiza y’abagore bayoboye ingo mu Turere uyu mushinga ukoreramo.

Abo bagore babashije kubona ibyangombwa nkenerwa mu buzima bwa buri munsi, kuri ubu batangiye kugira inzozi zo kurushaho kwagura ibikorwa bibateza imbere batagihangayikishijwe no kubara ubukeye kuri ubu bafite icyizere cy’uko bamaze kubona ubushobozi buhagije mu bijyanye n’ubuhinzi ndetse no gucunga umutungo mu buryo buboneye.  

Uretse ubukangurambaga bwakozwe mu ngo zari zifite ibibazo, hanatangijwe ikoranabuhanga rya telefoni rikusanya amakuru (LMMS/Last Mile Mobile Solution) ryifashishwa mu ishyirwa mu bikorwa ry’uwo mushinga no kurushaho kunoza umusaruro ugira ku bagenerwabikorwa.

Ibiro bya KOICA Rwanda, World Vision na The Better World bikomeje gushyira imbaraga zifatika mu gushyigikira ingo ziyobowe n’abagore, hibandwa ku kuzubakira umusingi ufatika uganisha ku kwigobotora ubukeke bukabije binyuze mu nzego zitandukanye, uhereye ku kwagura ibikorwa by’ubuhinzi, kongera ubworozi, no gufungura ubucuruzi bushingiye ku bumenyi bahabwa mu by’icungamutungo.

  • NTAWITONDA JEAN CLAUDE
  • Kamena 27, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE