Banki ya Kigali yahembewe guhiga izindi banki mu Rwanda 

  • Imvaho Nshya
  • Mata 4, 2022
  • Hashize imyaka 2
Image

Ikigo gitangaza amakuru y’urwego rw’imari kikanatanga ibihembo mpuzamahanga (Global Finance) cyongeye guhemba Banki ya Kigali nka banki ihiga izindi mu Rwanda.

Ni mu gihe no mu mwaka ushize wa 2021 iyi banki imaze kuba ubukombe ku isoko ry’imari mu Rwanda na bwo yabonye iki gihembo.

Banki ya Kigali ni ishami ry’Ikigo cy’Imari  BK Group gifite andi mashami atatu arimo BK Insurance, BK TecHouse and BK Capital.

Ikigo cy’itangazamakuru Global Finance, cyahaye igihembo Banki ya Kigali icyo gihembo kubera imbaraga ishyira mu guha serivisi nziza abakiliya bayo no kubakemurira ibibazo mu bihe bigoye by’ihungabana ry’ubukungu.

Umuyobozi Mukuru wa Banki ya Kigali Dr. Diane Karusisi, yagize ati: “Twishimiye kuba twahembwe na Global Finance nka banki ihiga izindi mu Rwanda mu 2022, ku nshuro ya kabiri yikurikiranyije. Iki gihembo kigaragaza ukuzirikana ubuyobozi bukomeye bwa banki ndetse n’impinduka nziza igaragaza ku isoko. Twiyemeje kudatezuka mu guha abakiliya bacu serivisi zizira amakemwa.”

Itangazo ryashyizwe ahagaragara na Global Finance rivuga ko abatsindiye ibihembo muri uyu mwaka ari banki zabashije kugaragaza ubunararibonye n’ubushishozi mu kwegera abakiliya bazo mu bihe bigoye ku isoko ry’imari rikomeje kugaragaramo impinduka zigoranye

Nubwo hari mu bihe bigoye, izi banki zagize uruhare rukomeye mu gutegura intsinzi y’ahazaza ku bakiliya bazo.  

Umuyobozi ushinzwe ubwandintsi bwa Global Finance Joseph D. Giarraputo, yagize ati: “Urwego rw’imari mu Isi irimo ibibazo nk’ibitero by’u Burusiya muri Ukraine, abayobozi b’ibigo bahura n’uruhurirane rw’ibibazo bishya birebana no guhitamo umubano bakubaka mu by’amabanki.”

Yakomeje agira ati: “Nyuma y’ingorane zimomeye zazanywe n’icyorezo, izi mpinduka zirasaba kongera ubwitonzi mu kubaka umubano w’ubucuruzi mu ruhando mpuzamahanga. Ibihembo byacu bishyigikira abafata ibyemezo mu guhitamo abafatanyabikorwa babo bahiga abandi.”

Ku nshuro ya 29, Banki ya Kigali yahembewe hamwe n’ibindi bigo by’imari 35 bituruka mu bice bitandukanye by’Isi. 

Guhitamo ibigo byiza kurusha ibindi bikorwa n’abanditsi ba Global Fikamce nyuma y’ubushakashatsi bwimbitse n’ibiganiro bikorwa mu bayobozi, ba nyiri banki n’impuguke mu by’amabanki, abasesenguzi n’impuguke mu by’ubukungu ku Isi. 

Mu gihe cy’amarushanwa, banki zisabwa gutanga ubusabe bushyigikira ububasha bwazo maze Global Finance ikagenzura ingingo zitandukanye yifashishije amakuru y’ubushakashatsi n’ibisubizo byatanzwe n’abayobozi n’izindi mpuguke.

Zimwe mu ngingo zigenderwaho mu kwemeza iyi banki harimo umutungo wayo, amahirwe y’urwunguko, imiterere y’uko yegera abakiliya, uko yubaka umubano ufite igisobanuro, guhanga udushya n’amahirwe mashya y’ubucuruzi.

Ku birebana n’amakuru atangwa mu biganiro harimo icyo abasesenguzi bayivugaho mu bijyanye n’uko yiyubatse, uko yorohereza abakiliya kubona inguzanyo, atangwa n’abajyanama n’abandi bakora muri uru rwego. 

Global Finance yashinzwe mu 1987, igamije guteza imbere ubukungu n’ishoramari ry’amabanki, sosiyete n’ibigo by’ubucuruzi ku rwego mpuzamahanga. Ibi bihembo byahindutse igipimo cyizewe cy’indashyikirwa ku muryango w’imari ku Isi.

  • Imvaho Nshya
  • Mata 4, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE