BAL 2022: Ikipe ya REG BBC yatsinze US Monastir ibona itike ya ¼

  • NTAWITONDA JEAN CLAUDE
  • Werurwe 15, 2022
  • Hashize imyaka 2
Image

REG BBC 77-74 US Monastir

AS Salé 91-81 SLAC

Taliki 15-03-2022

CFV Beira-REG BBC (Dakar Arena-19h30)

DUC- AS Salé (Dakar Arena-23h00)

Kuri uyu wa Kabiri taliki 15 Werurwe 2022 ni bwo hasozwa  imikino  y’amajonjora yo mu itsinda rya mbere “Sahara Conference” mu gushaka itike ya ¼ cy’irangiza cy’irushanwa rya BAL 2022.

Mu mikino ibanziriza iya nyuma yabaye ejo hashize taliki 14 Werurwe 2022, ikipe ya REG BBC ihagarariye u Rwanda yitwaye neza itsinda  US Monastir amanota 77 kuri 74.

Ikipe ya US Monastir yegukanye umwanya wa kabiri muri BAL 2021 yatangiye neza itsinda uduce tubiri twa mbere  ku manota 26-21 na 16-15. Ikipe ya REG BBC  yitwaye neza itsinda uduce tubiri twa nyuma ku manota 20-13 na 21-19.

Umukinnyi wa REG BBC, Pitchou Manga ni we witwaye neza muri uyu mukino aho yatsinze amanota 16 agarura imipira 10 itageze mu nkangara “Rebounds” ndetse anazibira imipira 5 “Blocks”.

Ikipe ya REG BBC yahise ifata umwanya wa kabiri aho imaze gutsinda imikino 3 muri 4 imaze gukina bituma ihita ibona itike ya ¼ cy’iragiza hamwe na US Monastir yo yagiye gukina umukino yaramaze kubona itike.

Undi mukino wabaye, ikipe ya AS Salé yo muri Maroc yatsinze SLAC  yo muri Guinea amanota 91 kuri 81.

Amadou Harouna ukinira AS Salé ni we witwaye neza muri uyu mukino aho yatsinze amanota 25 anatanga imipira 3 yavuyemo amanota.

Mu gusoza iyi mikino y’amajonjora, kuri uyu wa Kabiri taliki 15 Werurwe 2022 hateganyijwe imikino 2 aho ikipe ya REG BBC ikina na CFV Beira (19h30) naho DUC ikine na  AS Salé (23h00).

Iyi mikino y’amajonjora ni iyo mu itsinda rya mbere “Sahara Conference” rigizwe na  US Monastir  (Tunisia), AS Salé (Maroc), SLAC (Guinea), DUC (Senegal), Ferroviário da Beira (Mozambique) na REG BBC (Rwanda). Nyuma yo gukina hagati yayo, amakipe 4 ya mbere azakomeza muri ¼.

  • NTAWITONDA JEAN CLAUDE
  • Werurwe 15, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE