Badminton: Abatoza n’abakinyi bongerewe ubumenyi

  • NYIRANEZA JUDITH
  • Mutarama 9, 2024
  • Hashize amezi 2
Image

Kuva tariki 03 kugeza 07 Mutarama 2024 muri Maison des Jeunes Kimasagara habereye amahugurwa y’umukino wa Badminton ku barimu ndetse n’abakinnyi akaba yarateguwe n’ishyirahamwe ry’uyu mukino mu Rwanda “RBSF”.

Ayo mahugurwa  akaba yaratanzwe n’impuguke ebyiri zirimo   iyavuye mu Impuzamashyirahamwe y’uyu mukino ku rwego rw’Afurika , Bokpe Nonvide Bernardin ukomoka muri Benin    ndetse n’iyoherejwe n’ihuriro ry’amashyirahamwe y’umukino wa Badminton  mu bihugu bikoresha ururimi rw’Igifaransa, Lamidi Eliassou ukomoka muri Togo.

Aya mahugurwa yabaye mu byiciro bibiri harimo icyiciro cya mbere cyahariwe abarimu 42 bari baturutse mu mashuri yo hirya no hino mu gihugu.  Ibi bikaba biri muri gahunda “Shuttle Time” yatangijwe n’ishyirahamwe ry’umukino wa Badminton ku Isi “BWF” ikaba igamije guteza imbere uyu mukino binyuze mu mashuri.

Iki cyiciro cyabaye iminsi ibiri, kuva tariki 03 kugeza 04 Mutarama 2024.

Mu cyiciro cya kabiri, abakinnyi 22 bongerwe ubumenyi mu gihe cy’iminsi 3, kuva tariki 05 kugeza 07 Mutarama 2024.

Bamwe mu bahuguwe muri ibi byiciro byombi batangaje ko aya mahugurwa ari ingirakamaro kuko bungukiyemo byinshi bizabafasha mu guteza imbere umukino wa Badminton.

Girumwete Aimé waturutse muri UR-Huye, yavuze ko nk’abarimu ibyo bigishijwe bagiye kubisangiza abanyeshuri basanzwe bigisha siporo mu bigo basanzwe bakoreramo.

Yakomeje avuga ko hari aho u umukino wari usanzwe ukinwa ariko bagiye kongera imbaraga mu kuwutoza abandi bakinnyi bityo bazamure urwego.

Uwihoreye Tufaha usanzwe akina uyu mukino, nyuma y’amahugurwa yagaragaje ko bize uburyo bwiza bw’imikinire igezweho kuko kuba abatangira ari bwo bwa mbere habawe amahugurwa nk’aya abereka uburyo bakina ndetse no guhagarara mu kibuga.

Yakomeje avuga ko nk’abakinnyi bagomba gukomeza gukorana bakungurana ubumenyi bityo imikinire ikazamuka ikagera ku rwego rwiza.

Bokpe Nonvide Bernardin, umwe mu batanze amahugurwa

Umwe mu batanze aya mahuguwa, Bokpe Nonvide Bernardin yatangaje ko mu Rwanda hari abakinnyi beza, aya mahugurwa akaba wari umwanya mwiza yo kubafasha kuzamura ubumenyi mu mikinire kugira ngo mu minsi iri imbere bazaserukire u Rwanda mu marushanwa mpuzamahanga atandukanye.

Yakomeje avuga ko abahuguwe bose bagaraje ishyaka. Ati: “Ku barimo hari abari basanzwe bigisha uyu mukino, twaberetse rero uburyo bwiza bwo kwigisha abana, ku bakinnyi na bo bagaragaje urwego rwiza kandi ni byiza mu mukino wa Badminton mu Rwanda”.

Perezida w’Ishyirahamwe rya Badminton mu Rwanda “RBSF” Muhama Alphonse yagaragaje ko ubumenyi mu bijyanye na Tekinike bwatanzwe muri aya mahugurwa buzafasha mu kuzamura uyu mukino  ku buryo mu minsi iri imbere  hazaboneka abakinnyi bazajya bahagararira igihugu.

Yakomeje avuga ko uretse kuba abakinnyi bagiye kuzamura urwego rw’imikinire, umukino wa Badminton ugiye gukwirakwira mu gihugu hose kuko abarimu bahuguwe baturutse mu bice byose by’igihugu.

Badminton ni umukino ukinwa hifashishijwe Racket mu gutera agapira kameze nk’akarabo “Volant”. Uyu mukino ukinwa mu byiciro bibiri hari  icyiciro cy’abakina ari babiri bahanganye “Singles” n’abakina ari babiri babiri bahanganye “Doubles”.

Kugira ngo intsinzi iboneke ni uko umuntu atsinda amanota 21, gusa iyo abakinnyi banganyije 20-20 bisabwa ko utsinda ashyiramo ikinyuranyo cy’amanota 2. Mu gihe abakinnyi banganyije amanota 29-29, utsinze inota rya 30 ni we uba wegukanye intsinzi.

Uyu mukino watangiriye mu Bwongereza mu 1860. Kuva mu 1981 wemewe ku rwego rw’Isi naho kuva mu 1992 watangiye gukinwa mu mikino Olempike. Mu Rwanda uyu mukino watangiye gukinwa muri 2007.

Perezida w’ishyirahamwe ry’umukino wa Badminton mu Rwanda RBSF, Muhama Alphonse
Girumwete Aimé, umwe mu barimo bahuguwe
  • NYIRANEZA JUDITH
  • Mutarama 9, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE