Babitse amateka ya Jenoside yakorewe Abatutsi mu muvugo uri mu ndimi 5 

  • NTAWITONDA JEAN CLAUDE
  • Kamena 6, 2023
  • Hashize amezi 11
Image

Abanyarwanda batandatu batuye ku mugabane w’u Burayi bakoze mu nganzo bahimba umuvugo “IKIRANGO” ugaruka ku mateka ya Jenoside yakorewe Abatutsi mu 1994, bakaba ari umusanzu bahamya ko ukomeye mu kubika amateka no gutanga ubutumwa.

Ubwanditsi, Ubusizi mu mateka y’Isi ni ntwaro abahanga bifashisha mu gutanga ubutumwa no gusigasira amateka agahererekanywa mu binyejana byinshi bibyuze muri ubwo butumwa buhabwa injyana n’ubuhanga bwa gihanzi butuma burushaho kuryoha. 

Abo Banyarwanda baba i Burayi ni urubyiruko rwagiye kwiga mu bihugu binyuranye by’i Burayi ariko rukaba ruhoza inkomoko yarwo ku mutima. 

Bishimiye gutanga umusanzu wabo mu gihe mu Rwanda no ku Isi yose bakomeje gahunda zo kwibuka ku nshuro ya 29 Jenoside yakorewe Abatutsi. 

Barimo Joseph Uwagaba Caleb, umwanditsi akaba n’umunyeshuri Samira Uwase, Umusizi akaba n’umunyeshuri Arnaud Bwami,  umunyamideli wabigize umwuga akaba n’umusizi Charlotte Cici Umulisa, umunyeshuri akaba umuhanga mu ndimi Anderson Mwiza Andy hamwe na  Laetitia D. Mulumba. 

Laetitia D. Mulumba usanzwe ukora indirimbo zo guhimbaza Imana akaba atuye mu gihugu cy’u Bufaransa. 

Mu kiganiro Uwagaba yagiranye n’Imvaho Nshya, yavuze ko uwo muvugo wiswe “IKIRANGO” ari igihangano cyandikanywe ubuhanga kibaka kiri mu ndimi 5 ari zo Ikinyarwanda, Icyongereza, Igifaransa, Igiswahili, Igipolonye. 

Yagize ati: “Aba bagize uruhare muri iki gihangano bahurije imbaraga hamwe mu gutanga umusanzu ku mateka y’u Rwanda rwacu no kurushaho kuyasobanura uko ari hagamijwe kwibuka Jenoside yakorewe Abatutsi mu 1994.”

We na bagenzi be, bahamya ko umusanzu w’umwanditsi ukwiriye kuba gutangaza ukuri, gutanga ubutumwa ndetse no kwigisha abantu cyane cyane abakiri bato bakarushaho gusobanukirwa aho Igihugu cyavuye ndetse n’aho kijya mu gukumira ko amahano yabaye atakongera kugira ahandi aba ku Isi.

Uwo muvugo utangira ugaragaza uburyo u Rwanda rwa mbere y’ubukoloni rwatembaga amata n’ubuki, aho Abanyarwanda bari bashyize hamwe. 

Urwango n’amacakubiri byamaze imyaka bicengezwa mu matwi y’Abanyarwanda kugeza muri Mata 1994 ubwo abarenga miliyoni bicwaga mu minsi 100 gusa muri Jenoside yakorewe Abatutsi. 

Abo banditsi n’abasizi basoje ubutumwa bwabo bashimira Ingabo za RPA- Inkotanyi zitanze zigahagarika Jenoside yakorewe Abatutsi mu 1994, ndetse zikabohora u Rwanda mu maboko y’imiyoborere yamunzwe n’amacakubiri afite inkomoko mu bakoloni.

Bifuza kandi ko buri wese mu Rwanda akwiye gukura isomo ku byabaye, iteka aharanira amahoro ndetse akirinda kwibagirwa inzirakarengane zishwe muri Jenoside yakorewe Abatutsi.

Joseph Uwagaba Caleb
Anderson Mwiza Andy
Charlotte Cici Umulisa
Laetitia D. Mulumba
Samira Uwase
Arnaud Bwami
  • NTAWITONDA JEAN CLAUDE
  • Kamena 6, 2023
  • Hashize amezi 11
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE