AS Muhanga yatsinze Vision FC ibitego 4-2 mu mukino wamaze iminsi 2

  • AKIMANA JEAN DE DIEU
  • Ukuboza 18, 2023
  • Hashize amezi 2
Image

Ikipe ya AS Muhanga na Vision FC wasojwe ku Cyumweru tariki ya 17 Ukuboza, nyuma y’iminsi ibiri ubwo hakinwaga iminota 23 yasigaye ku wa Gatandatu bikarangira As Muhanga itsinze ibitego 4-2 bya Vision FC.

Uyu mukino wimuriwe ku wundi munsi nyuma yo gusubikwa hakinwe iminota 67 kubera ko hari hikanzwe amarozi yateje imvururu nyuma y’uko ikipe ya Vision FC ikemanze urwambariro bateguriwe muri Sitade y’Akarere ka Muhanga.

Ni umukino wagombaga gusoza ku wa Gatandatu, ariko kubera izi mvururu ukaza guhyirwaho akadomo n’umusifuzi nyuma y’iminota 67 kubera ko abakinnyi batabashaga kubona umupira kandi nta n’amatara ahari kuri iyi sitade.

Uyu mukino wahagaritswe ikipe ya AS Muhanga ifite ibitego 3 byari byatsinzwe na Iyakaremye Christian ku munota wa 27 na 28 w’igice cya mbere cy’umukino mu gihe igitego cya Vision FC cyatsinzwe na Mutebi Rachid ku munota wa 43 w’iki gice.

Kuri iki Cyumweru tariki ya 17 Ukuboza 2023 ni bwo hakinwe iminota 23 yari yasigaye ndetse hongerwaho iminota 5 na yo irangira izi kipe zinganyije igitego 1-1 ku mpande zombi.

Bivuze ko uyu mukino warangiye ikipe ya AS Muhanga itsinze Vision FC ibitego 4-2 byanatumye ikipe ya AS Muhanga iba iya kabiri kuri Vision FC n’amanota 16 ariko ifite umukino w’ikirarane igomba kuzakonamo na Eperance FC mu gihe Vision FC ifite amanota 18.

Ikipe ya AS Muhanga ni yo kipe yonyine ishoboye gutsinda ikipe ya Vision FC.

Bamwe mu bakunzi b’umupira w’amaguru bo mu Karere ka Muhanga banenze bamwe mu bakina, abayobozi ndetse n’abatoza b’amakipe bizerera intsinzi mu myimuka mibi ari na byo byabaye intandaro y’umukino wamaze iminsi ibiri.

Mukeshimana Sarah avuga ko bibabaje kubona ikipe zizera amarozi ntizibashe gukina neza ngo zitsinde zabikoreye, zikumva ko zigomba kwizerera mu myuka mibi ibintu bigaragara nk’umwanda mu mupira w’amaguru.

Yagize ati: “Twebwe nk’abafana turanenga abantu bo mu makipe atandukanye bizera amarozi bakumva ko azabafasha kugera ku ntsinzi; ntabwo byashoboka kuko hari Ibihugu tuzi bifite abarozi bakomeye bitarajya mu bikombe by’Isi.”

Rubayiza Theodore avuga ko inzego bireba zikwiye guhagurukira bamwe mu bayoboye amakipe kuko bigaragara ko bakora ibintu bidashobora gutuma imikino itera imbere.

Yagize ati: “Twebwe nk’abafana dukunda kubona ibintu bigaragaza ko abagize cyangwa abakorera aya makipe bagaragaza ibikorwa byo kwizera imyuka mibi, ndetse tujya tunumva ko hari abatanganamo ibitambo kugira ngo badakina bakaba bavunika cyangwa bakamena amazi mabi mu kibuga, imyunyu ndetse n’indi mihango ya gipfumu ikorerwa mu rwambariro rw’amakipe.

Twabwe turasaba ko Leta yacu yadufasha igakurikirana ibi bintu nkuko yatangiye kurwanya abagabanya imyaka y’abana kugira ngo bahabwe amahirwe yo gukina mu mashuri y’amakipe y’umupira w’amaguru harimo Ishuri rya Paris Saint Germain na Bayern Muniich”.

Perezida w’Ikipe ya AS Muhanga Kimonyo Juvenal, yabwiye Imvaho Nshya ko ibijyanye n’amarozi bidakwiye mu mupira w’Amaguru kuko bigira ingaruka ku bakiri bato bashobora kubikuriramo bigatuma bumva ko intsinzi iboneka gusa mu gihe hifashishijwe amarozi.

Akomeza asaba abayobozi b’amakipe, abakinyi n’abatoza ndetse n’abafana kwirinda ibintu byose byatuma umukino udatangirira igihe, kandi agasaba amakipe kujya yoroherana (Fairplay) kuko gutinza umukino udafite ibimenyetso by’uko warozwe na byo ni ukwigiza nkana.

  • AKIMANA JEAN DE DIEU
  • Ukuboza 18, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE