AS Kigali y’abakinnyi 10 yahembukiye kuri Rayon Sports

  • SHEMA IVAN
  • Ukuboza 9, 2023
  • Hashize amezi 6
Image

Ikipe ya As Kigali y’abakinnyi 10 yatsinze Rayon Sports ibitego 2-1 mu mukino w’umunsi wa 14 wa shampiyona, mu gihe yari imaze imikino irindwi idatsinda.

Uyu mukino wabaye ku mugoroba wo kuri uyu wa Gatandatu tariki 9 Ukuboza 2023, kuri Kigali Pele Stadium.

Amakipe yombi yatangiye asatirana ku mpande zombi.

Ku munota wa 17 AS Kigali yafunguye amazamu ku gitego cyatsinzwe na Erisa Ssekisambu arobye Umunyezamu Simon Tamale.

As Kigali yarushakaga cyane Rayon sports yabonye igitego cya kabiri ku munota wa 23 cyatsinzwe na Erisa Ssekisambu watsindaga igitego cya kabiri cye ku mupira yacomekewe na Rafael Osaluwe.

Ku munota wa 39 Rayon Sports ihushije uburyo bw’igitego ku mupira Luvumbu yateye ugendera hejuru, Esenu ananirwa kuroba umunyezamu Pascal, umupira ujya muri koruneri.

Ku munota wa 45 mbere y’uko igice cya mbere kirangira Rayon Sports yabonye igitego cya mbere cyatsizwe na Muhire Kevin ku ishoti rikomeye yateye Umunyezamu Niyonkuru akozeho ariko ntiyabasha kurihagarika.

Igice cya mbere cyarangiye As Kigali iyoboye umukino n’ibitego 2-1.

Mu gice cya kabiri AS Kigali yatangiye ishaka igitego cya gatatu ariko na Rayon Sports ishaka kwishyura.

Ku munota wa 48 AS Kigali yahushije uburyo bwo gutsinda igitego cya gatatu ku mupira Ishimwe Fiston yacomekeye Ssekisambu ageze mu rubuga rw’amahina, ateye ishoti rijya hejuru y’izamu rya Simon Tamale wari wamaze kwicara.

Ku munota wa 74 Rayon Sports yabonye amahirwe yo kwishyura ku mupira mwiza Tuyisenge Arsene yahinduye mu rubuga rw’amahina, ugeze kuri Esenu akina n’umutwe, ufatwa neza na Niyonkuru Pascal.

Ku munota wa 76 As Kigali yabonye ikarita itukura yahawe Akayezu Jean Bosco ku ikosa yakoreye kuri Tuyisenge Arsene, ahabwa iya kabiri y’umuhondo nyuma y’uko yanadunze umupira mu maso y’umusifuzi Umutoni Aline.

Rayon Sports yongeye kubona amahirwe yo kwishyura igitego ku mupira mwiza Serumogo Ali yahinduye  mu rubuga rw’amahina, abakinnyi bose barawuhusha, urengera muri koruneri.

Umukino warangiye As Kigali itsinze Rayon Sports ibitego 2-1 yongera kubona intsinzi nyuma y’imikino irindwi muri shampiyona.

As Kigali yahise igira amanota 14 ifata umwanya wa 14 mu gihe Rayon Sports yagumye ku mwanya wa kane n’amanota 26, irushwa ane na APR FC ya mbere.

  • SHEMA IVAN
  • Ukuboza 9, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE