Arsenal FC yifatanyije n’u Rwanda mu Kwibuka30

  • SHEMA IVAN
  • Mata 7, 2024
  • Hashize ukwezi 1
Image

Abakinnyi b’ikipe ya Arsenal FC yo mu Bwongereza bifatanyije  n’Abanyarwanda mu bihe byo Kwibuka ku nshuro ya 30 Jenoside yakorewe Abatutsi mu 1994, bashima aho igihugu kigeze nyuma y’imyaka 30 ishize Jenoside ihagaritswe.

Ni ubutumwa batanze mu gihe u Rwanda rwifatanyije n’Isi mu gutangira Icyumweru cy’Icyunamo n’iminsi 100 yo Kwibuka ku nshuro ya 30 Jenoside yakorewe Abatutsi.

Perezida Paul Kagame na Madamu Jeannette Kagame ni bo batangije iki gikorwa kuri iki cyumweru, tariki ya 7 Mata 2024, cyabereye ku Rwibutso rwa Jenoside rwa Kigali ku Gisozi aho bunamiye imibiri y’inzirakarengane za Jenoside, banacana urumuri rw’icyizere ruzamara iminsi 100.

Arsenal FC iri mu makipe yifatanyije n’u Rwanda aho mu butumwa bw’abakinnyi bayo, bashimye uko igihugu kitaheranwe n’amateka ashaririye cyanyuzemo.

Abakinnyi batatu ba Arsenal basuye u Rwanda ni bo bagaragaye mu mashusho yo kwifatanya n’Abanyarwanda muri ibi bihe byo Kwibuka.

Abo ni Umuholandi Julien Timber, Caitlin Foord wo muei Australia, Katie McCabe wo muri Ireland na Eduardo César Daud Gaspar wo muri Brazil uyobora siporo.

Mu butumwa bwe Jurrien Timber yagize ati: “Mu rugendo rwanjye ruheruka mu Rwanda, nasuye urwibutso rwa Jenoside rwa Kigali menya byinshi ku mateka ya Jenoside yakorewe Abatutsi.”

Tumber yasabye abakiri bato muri ruhago gukora cyane, ati: “Ubutumwa nagenera abakinnyi bakiri bato ni ugukomeza gukora cyane, kuguma hamwe kugira ngo bakabye inzozi zabo.”

Katie MCcabe na we yagize ati: “Ibyo nabonye bya byakonze ku mutima; birababaje kubona uko Igihugu cyari kimeze mu bihe byashize, aho kigeze ubu harashimishije.”

Tariki ya 7 Mata, ni Umunsi Mpuzamahanga ngarukamwaka Isi yose yibukaho Jenoside yakorewe Abatutsi mu 1994 yahitanye abasaga miliyoni mu mezi atatu gusa.

Arsenal FC ifitanye umubano n’u Rwanda kuko kuva muri Gicurasi 2018 Urwego rw’Igihugu rw’Iterambere (RDB) rwinjiye mu bufatanye n’iyi kipe yo muri Premier League, u Rwanda ruyibera umuterankunga wa mbere ku maboko y’imipira yambara, aho yambara ‘Visit Rwanda’ ku kuboko kw’ibumoso ku ikipe nkuru, iy’abatarengeje imyaka 23 no mu ikipe y’abagore.

Ni amasezerano yafashije u Rwanda mu ngeri nyinshi, aho rubasha kwinjiza amafaranga aturuka mu bukerarugendo ndetse n’isura hamwe n’amateka yarwo akarushaho kumenyekana.

  • SHEMA IVAN
  • Mata 7, 2024
  • Hashize ukwezi 1
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE