Arabiya Sawudite igiye gufasha ibihugu by’ Afurika bifite imyenda iremereye

Arabiya Sawudite igiye kwemeza amasezerano afite agaciro kari hejuru ya miliyoni 500 z’amadolari n’ibihugu by’Afurika.

Ikigega gishinzwe iterambere cy’Arabiya Sawudite, kizasinyana amasezerano ya miliyoni 533 z’amadolari n’ibihugu by’Afurika.

Minisitiri w’imari wa Arabiya Sawudite, Mohammed Al-Jadaa yabivuze ejo ku wa Kane, mu nama y’ubukungu y’Arabiya Saudite n’Afurika, i Riyadh.

Jadaan yagize ati “Turimo gukorana n’abafatanyabikorwa kugira ngo dushyigikire Ghana n’ibindi bihugu by’Afurika mu bijyanye n’imyenda yabyo”.

Minisitiri ushinzwe ishoramari w’Arabiya Sawudite, Khalid Al-Falih, nyuma yavuze ko amadolari arenga miliyari 700 y’igihugu cye, azava mu kigega cy’ishoramari rusange ‘azahindura ibintu’ mu ishoramari ku mugabane w’Afurika.

Minisitiri ushinzwe ibitanga ingufu, igikomangoma Abdulaziz bin Salman, nawe muri iyo nama, yasinye amasezerano ya mbere n’ibihugu by’Afurika, harimo Nijeriya, Senegali, Cadi na Etiyopiya, mu bijyanye n’ubufatanye mu bitanga ingufu nkuko byatangajwe n’Ibiro Ntaramakuru by’Abongereza Reuters.

KAYITARE JEAN PAUL